Yal Wơl 34 - Sră Goh 2018

Bơta chơt Môise dê

¹ Lồc behơ̆ Môise guh hơđang mơnơm Nebô bơh di ƀlàng ring Môap tus hơđang bồ Phisga, đah ne Jerikô. Tềng hơ̆ Yàng Jehôwa sơnio khai in sền gŏ jơh dô nơm lơgar, bơh di Galaat tus hơ Dan,

² jơh ù tiah Neptali, ù tiah Epraim mơ Manase, jơh ù tiah Juda dê, ngài tus hơ Dàlềng Đah Mattơngai Mut,

³ Negep mơ jơh tòm dô kơnhwàl bơh di thòng Jerikô, Ƀòn Dờng ală Tòm chi Gòl ngài tus di Joar.

⁴ Lồc behơ̆ Yàng Jehôwa đơs mơ khai lah: “Hơ̆ la lơgar mơ Añ neh srat să ho mơ Abraham, Isak mơ Jakôp tòm tŭ Añ đơs lah: ‘Añ rơp ai gơ ală kòn sau mê in.’ Añ neh lòi mê sền gŏ gơ mơ mat tòm mê dê, mơya mê rơp ò lòt gan mơ mut tòm hơ̆.”

⁵ Mơ Môise, cau duh broă Yàng Jehôwa dê chơt tềng hơ̆ tòm Môap, tòm toh jat be Yàng Jehôwa neh đơs.

⁶ Kơnràñ neh tơp khai tòm Môap, tòm thòng tòm toh đah ne mơ Bet Pheor, mơya jơl tus di ngai do ò gơs cau lơi git ntềng đah bơtô ƀồc khai dê.

⁷ Môise neh dô rhiang bàr jơt nam tòm tŭ khai chơt, bulah behơ̆ mat khai ò lu li bơta pràn kơldang khai dê ò roh.

⁸ Cau Israel ñìm ƀồc Môise dê tòm ƀlàng Môap tòm pe jơt ngai, jơl tus di tŭ tơngai ñìm mơ rac ròc neh rlau.

⁹ Mơ tai, Jôsue kòn klau Nun dê neh geh bềng lìu hwềng bơta jak chài dê tài bơh Môise neh ơn tê hơđang khai. Behơ̆ ală cau Israel neh iat jơnau khai mơ neh lơh jat bơta Yàng Jehôwa neh sồr Môise.

¹⁰ Bơh ngai hơ̆, ò gơs cau gơnoar hwơr lơi geh tơngguh tòm Israel tòm toh be Môise, la cau mơ Yàng Jehôwa neh git mat tòm toh mat.

¹¹ La cau neh lơh gơs jơh ală bơta krơi tềl is mơ Yàng Jehôwa neh sồr khai lơh tòm Ejiptơ di đap Pharaôn, di đap jơh ală cau kwang at bồ khai dê, mơ di đap jơh dô nơm lơgar khai dê.

¹² Bơh ò gơs cau lơi neh gơs tŭ lơi git gơnap gơnoar dờng pràn rlau jơh hala neh lơh ală broă pal rngòt rngơt mơ Môise neh lơh di đap mat jơh Israel.