Yal Wơl 33 - Sră Goh 2018

Môise ai lơngai ală jơi bơtiàn Israel in

¹ Do la bơta lơngai mơ Môise cau Yàng Tom Trồ dê neh ai lơngai cau Israel in lài mơ tŭ khai chơt.

² Khai neh đơs lah: “Yàng Jehôwa neh bơh di Sinai, mơ tus hơđang bol khai bơh di Seir; Kơnràñ gơcrà àng bơh mơnơm Pharan. Kơnràñ neh tus bal mơ rbô rhiang cau sàng goh; tòm tê ma Kơnràñ dê gơlik ồs bơta boh lam bol khai in.

³ Di ngan Kơnràñ kòñ gơboh di làng bol; jơh ală cau sàng goh ơm tòm tê Kơnràñ dê; di jơng Kơnràñ jơh tơl nă bol khai cùn khoai, mơ bơh di Kơnràñ bol khai dòp geh jơnau bơto tơnggit.

⁴ Hơ̆ la bơta boh lam mơ Môise neh ai bol hi in, la sre brê mpồl jơnum Jakôp dê.

⁵ Tềng hơ̆ gơs dô bơtau geh bơtào tòm Jesurun tòm tŭ ală cau kwang lam bồ làng bol di pơjum bal mơ ală jơi bơtiàn Israel dê.

⁶ Lòi tĕ Ruben geh kis, mơ ò chơt, bulah ntum khà bol khai dê gơs mìng dô êt.”

⁷ Mơ do la jơnau khai neh đơs bơh Juda: “Ơ Yàng Jehôwa, dan iat jơnau hòi dan Juda dê; Dan cèng khai hơ làng bol khai dê; lơh pràn kơldang tê khai in, mơ dong kòl khai tòmdră mơ ală cau sò tơm khai dê!”

⁸ Bơh Lebi khai neh đơs lah: “Thumim dan ai Lebi in, mơ ai Urim cau Kơnràñ kòñ gơboh. Kơnràñ neh lòng khai tòm Masa; Kơnràñ neh tòm pơndang mơ khai tòm dà Meriba;

⁹ khai neh đơs bơh bèp mơ bơh mè khai dê lah: ‘Añ ò sền bol khai dờng màng;’ khai ò đal git ală oh mi khai dê, hala dòp git ală kòn sau tòm khai dê. Bơh khai lơh jat jơnau Kơnràñ dê, mơ prap gàr bơta ho bal Kơnràñ dê.

¹⁰ Khai bơto ală jơnau sồr Kơnràñ dê Jakôp in mơ bơto bơta boh lam Kơnràñ dê Israel in; khai chu kơlhô di đap Kơnràñ, mơ ơn wil tơl ală phan ơn duh khoai chu pơrguc hơđang cơnòng ơn phan duh khoai Kơnràñ dê.

¹¹ Ơ Yàng Jehôwa, dan ai lơngai hơđang jơh ală bơta chài rgơi khai dê, mơ dan niam nùs di broă tê khai lơh. Dan pòng pă but cau sò tơm di khai, ală cau gơjrañ khai tồ bol khai ò guh tai.”

¹² Bơh Benjamin khai neh đơs lah: “Dan lòi cau kòñ gơboh di Yàng Jehôwa ơm rlô ring lơngai, Yàng Tom Trồ Hơđang Rlau Jơh jơm gòm khai jơh ngai mang, cau kòñ gơboh geh rlô digùl pơnì Kơnràñ dê.”

¹³ Bơh Jôsep khai neh đơs lah: “Dan Yàng Jehôwa ai lơngai lơgar khai in bơh dà mơryuh kwơ màng bơh đang trồ ai pà, mơ bơh ală dà tòm tiah jrô hơđơm;

¹⁴ bơh bơta plai chi bơkah rlau jơh mattơngai dê, mơ bơta tơnggơs pas sơm ală kơnhai dê;

¹⁵ bơh ală phan niam rlau jơh tơnggơs bơh ală mơnơm rài yau dê, mơ bơta lìu làc bơh ală kơh gam sùm sùm dê;

¹⁶ bơh ală phan pà niam rlau jơh plai ù dê mơ bơta bềng lìu gơ dê, mơ bơta nđàc bơtau ơm tòm hơđang Sinai. Lòi tĕ jơh ală bơta do ơm hơđang bồ Jôsep, mơ hơđang bìng liang cau at bồ digùl ală oh mi khai dê.

¹⁷ Tòm bơta ryŭ ryơm gen khai kung be dô nơm kơnrồ dam tơnhoa; ală ngke khai dê la ală ngke dô nơm kơnrồ dam brê. Kơnòm di ală ngke, khai gĕ ală làng bol, bơtrơh bol khai tus di ală làng bol ơm tòm ală tiah lồi dut plai ù. Hơ̆ la jơt rbô Epraim dê; hơ̆ la rbô Manase dê.”

¹⁸ Bơh Jebulun khai neh đơs lah: “Ơ Jebulun, hòn chò tĕ tòm tŭ mê lik lòt, mơ Isakar, hòn chò tĕ tòm ală sàl mê dê.

¹⁹ Bol khai rơp pơjum ală làng bol hơđang mơnơm mơ tềng hơ̆ rơp ơn ală phan duh khoai chu pơrguc bơta song ring dê; bol khai rơp ñô sa dờng bơh bơta lìu làc ală dàlềng dê, bơh ală phan màng pồn ndơp tòm bràs.”

²⁰ Bơh Gat khai neh đơs lah: “Lơngai cau in pò ơnàng lơgar Gat dê! Gat ơm kis kung be dô nơm klìu triă, crè tơwòr tê mơ gơltau bồ.

²¹ Khai neh sac rwah ù tiah niam rlau jơh să tòm khai in; pơnah ơn is ală cau kwang at bồ in neh geh prap lòi khai in. Tòm tŭ ală cau at bồ làng bol pơjum bal, khai lơh jat nùs kòñ song ring Yàng Jehôwa dê, mơ ală bơta cahrña Kơnràñ dê gơwèt mơ Israel.”

²² Bơh Dan khai neh đơs lah: “Dan la dô nơm klìu triă kòn, sơnđoh bơh di Basan.”

²³ Bơh Neptali khai neh đơs lah: “Neptali geh bềng lìu bơta nđàc Yàng Jehôwa dê, mơ geh bềng bơta lơngai lơngò Yàng Jehôwa dê; dòp geh đah mattơngai mut mơ đah đơm.”

²⁴ Bơh Aser khai neh đơs lah: “Ală cau geh lơngai lơngò rlau jơh ală kòn klau Aser dê lòi tĕ khai geh bơta nđàc bơh di ală oh mi khai dê, mơ lòi tĕ khai rào jơng khai dê tòm mơñà.

²⁵ Ală kai mpồng dờng mê dê rơp lơh mơ lòs mơ kòng, rài kis mê jŏ kàr lơi, gen bơta pràn kơldang mê dê rơp dròm kàr hơ̆.”

²⁶ “Ò gơs yàng lơi ndai kung be Yàng Tom Trồ Jesurun dê, Kơnràñ hào hơđang ală tap trồ nàng dong kòl mê, mơ hơđang ală mhwal tòm bơta ryŭ ryơm Kơnràñ dê.

²⁷ Yàng Tom Trồ gam kis sùm sùm la tiah kìng crŭ mê dê, mơ hơđơm tiah hơ̆ gơs ală tơwòr tê gam sùm sùm. Kơnràñ rơp ting bơtrơh cau sò tơm mê dê bơh di đap mê, mơ đơs lah: ‘Tơnroh tĕ khai!’

²⁸ Behơ̆ Israel rơp kis tòm bơta lơngap lơngai, Jakôp kis tòm bơta lơngap lơngai tòm lơgar gơs kòi mbo mơ tơrnòm, la tiah ală tap trồ dùh dà mơryuh.

²⁹ Ơ Israel, lơngai lơngò mê in! Ñcau ndròm be mê la dô nơm làng bol geh Yàng Jehôwa dong klàs, Kơnràñ la khèl đo mơ la bơta dong kòl mê dê, mơ la đào bơta pha lin mê dê. Ală cau sò tơm mê dê rơp cùn khoai di đap mê, mơ mê rơp jă hơđang ngkòi bol khai dê.”