Yal Wơl 32 - Sră Goh 2018

¹ “Ơ ală tap trồ, ơm iat tĕ, mơ añ rơp đơs; Ơ plai ù, ai tồr iat tĕ ală jơnau đơs bơr añ jê.

² Dan jơnau bơto sồr añ jê gơdùh be mìu, mơ ală jơnau đơs añ jê gơ mù be dà mơryuh, kung be mìu nhàc hơđang ñhơt pa hòn, kung be mìu dờng hơđang ƀlàng ñhơt.

³ Añ rơp bơto yal sơnđan Yàng Jehôwa dê, bơta dờng ryŭ gơrê hơ Yàng Tom Trồ bol he dê!

⁴ Kơnràñ la Pơnai Lŭ, broă lơh Kơnràñ dê la wil tơl, mơ jơh ală gùng dà Kơnràñ dê la song ring. Yàng Tom Trồ Bơtau dòn song, ò blac pơrlồm, Kơnràñ la Bơtau song ngan mơ song ring;

⁵ mơ ală kòn sau neh lơh blac pơrlồm gơwèt mơ Kơnràñ, dô jơi bơtiàn kră kơldang mơ lac lèo,

⁶ Ơ làng bol bơrngơl gơla mơ ò kwơ, bol mê tơm wơl Yàng Jehôwa in behơ̆ ơ?” Kơnràñ ò di la Bèp bol mê dê la Bơtau Crơng gơs, Bơtau mòn gơs mơ bơtào gơs bol mê ò ơ?

⁷ Kah wơl tĕ ală ngai yau òr, kơlôi tĕ bơh ală rài neh rlau jŏ rau. Lùp tĕ bèp bol mê dê mơ khai rơp yal bol mê in, Lùp tĕ ală cau kwang kra bol mê dê gen bol khai rơp yal tơlik bol mê in.

⁸ Tòm tŭ Bơtau Hơđang Rlau Jơh tòmpà ală làng bol lơh gơs sre brê, tòm tŭ Kơnràñ cah is ală jơi kòn mơnus, Kơnràñ bơtào gơs ală nhàr lơgar ală làng bol in Jat ntum khà ală kòn klau Israel dê.

⁹ Bơh pơnah gơrê bal mơ Yàng Jehôwa la làng bol Kơnràñ dê. Jakôp la sre brê neh tă khà ai Kơnràñ in.

¹⁰ Tòm tiah ƀlàng ngềt ngơt dê Kơnràñ neh jòi bàn khai, tòm ƀlàng sang gòi mìng gơs càl khồm, ò gơs chi che. Kơnràñ jơm gòm khai kơlôi rcang bơh khai. Kơnràñ sền gàr khai kung be kòn mat Kơnràñ dê,

¹¹ kung be dô nơm sềm klàng bung phà tơrlah rsòn gơ dê, mơ par hơđang kòn dềt gơ dê, gơ pò đar gơ dê nàng đo bol gơ, mơ cèng bol gơ hơđang đar gơ dê.

¹² Mìng Yàng Jehôwa tề lam khai; ò gơs yàng làng bơdìh ơm mơ khai.

¹³ Kơnràñ lơh khai in hào hơđang ală tiah jơnhoa ù tiah dê, mơ ròng khai bơh plai đo ală ƀlàng sre dê. Kơnràñ siam khai mơ dà lơwe bơh di pơnai lŭ, Mơ mơñà bơh di tiah dàng lŭ kră kơldang dê;

¹⁴ dơngi dà toh mơ dà toh bơh di mpồl kơnrồ mơ belàt, mơ bơh ală belàt kòn mơ ală be lơmă, bơh ală belàt sac rwah Basan dê mơ ală gar kòi mi niam rlau jơh. Mê hùc tơrnòm ño bơkah bơh dà bơsơt plai ño dê.

¹⁵ Jesurun sơlo pas sơm mơya pơrlơ̆ dră; khai gơlik gơs dờng mơ lơmă, Khai sang lòi Yàng Tom Trồ la Bơtau neh crơng gơs khai mơ sền òsơp Pơnai Lŭ Bơtau Dong klàs khai dê.

¹⁶ Bol khai lơh Kơnràñ in ƀoah pơrñat bơh ală yàng lơgar ndai, mơ lơh Kơnràñ in gơjrañ mañ bơh ală broă iơh rmơh.

¹⁷ Bol khai ơn phan duh khoai chu pơrguc ală cà in, ò di la Yàng Tom Trồ, la ală yàng mơ bol khai òhềt git, ală yàng pa tơlik mat, ală yàng mơ ală ồng pàng bol mê dê ò duh rngòt.

¹⁸ Bol mê ò ơn nùs kơlôi di Pơnai Lŭ neh tơnggơs bol mê; bol mê neh hŭi Yàng Tom Trồ la Bơtau neh deh bol mê.

¹⁹ Yàng Jehôwa neh gŏ bơta hơ̆ mơ ƀoah pơrñat, Kơnràñ sang lòi ală kòn klau mơ ală kòn ùr Kơnràñ dê.

²⁰ Kơnràñ đơs lah: “Añ rơp pồn mat Añ bơh di bol khai, Añ rơp sền ñchi bơta rơp gơlik gơs lồi dut bol khai dê; bơh bol khai la dô jơi bơtiàn kơldang bồ, hơ̆ la ală kòn sau ò gơs bơta dòn song.

²¹ Bol khai lơh Añ in ƀoah pơrñat bơh bơta ò di la yàng, mơ bơrcek Añ gơjrañ bơh ală rùp ràk bol khai dê. Behơ̆ Añ rơp lơh bol khai in ƀoah pơrñat bơh dô làng bol ò di la làng bol, bơrcek bol khai gơjrañ bơh dô làng bol tùl gơla.

²² Bơh dô nơm ồs neh sa hơng bơh bơta gơjrañ dờng Añ jê, mơ chu pơrguc tus di tiah jrô lơgar làng ƀồc; gơ sa loan plai ù mơ ală phan gơlik bơh gơ, mơ chu tòm ồs ală mơnàng ală mơnơm dê.

²³ Añ rơp bơtơl gơnru ală bơta rung rài hơđang bol khai, mơ pañ ală kam Añ jê tòmdră mơ bol khai.

²⁴ Añ rơp sồr bơta jơgloh rung tơnroh bol khai, bơta duh trơàl chu pơrguc bol khai, rung rài bơh bơta pluh plàng. Añ rơp sồr sề gơnèng phan poan jơng tòm brê tòmdră mơ bol khai, bal mơ bơta bih khih ală phan wìn nsròng tòm ù lơh iơh bol khai.

²⁵ Tòm gùng kong tơnroh bơh đào, mơ tòm dơlam hìu gơs bơta rngòt rngơt, cau pơnu mơ cau ơruh, kòn gam pô mơ cau kra sŏ kò kung behơ̆ sơl.

²⁶ Añ neh đơs lah Añ rơp rsìh bol khai mơ jùt sang bơta kirsơnre bol khai dê bơh di jơi kòn mơnus,

²⁷ mơya Añ kìr ơmìr jơnau chồl bơchồt cau sò tơm dê, kìr ơmìr di cau sò tơm bol khai dê kơlôi tìs mơ đơs lah: ‘Tê bol hi dê neh pha lin rlau; Yàng Jehôwa neh ò lơh ală bơta hơ̆.’

²⁸ Bol khai la dô nơm làng bol siơ̆u bơta jak chài; ò gơs bơta git wă tòm bol khai.

²⁹ Dilah bol khai la jak chài gen bol khai pal git wă bơta do; bol khai pal git loh làng bơh bơta lồi dut bol khai dê la mbe lơi!

³⁰ Dô nă cau mbe rgơi ting bơtrơh dô rbô nă, hala bàr nă cau mbe rgơi ting bơtrơh jơt rbô nă ntoat dô; mìng dilah Pơnai Lŭ bol khai dê neh tac bol khai, mơ Yàng Jehôwa neh sang lòi bol khai?

³¹ Bơh Pơnai Lŭ bol khai dê ò di be Pơnai Lŭ bol he dê, ală cau sò tơm bol he dê la bơrngơl gơla.

³² Chi ño bol khai dê tus bơh tòm ño Sôdôm, bơh di ală suơn ño Gômôrơ dê. Ală plai ño bol khai dê la plai bih khih, mơ ală dơrkum plai ño bol khai dê sràt bơtang.

³³ Ală tơrnòm bol khai dê la bih khih bơs dê, la bơta bih khih tơnchơt cau bơs tur dê.

³⁴ Añ ò di neh prap gàr bơta hơ̆ tòm tiah prap lòi mơ prap kơ̆ bơta hơ̆ tòm tiah prap phan ò ơ?

³⁵ Bơta sal tê gơrê mơ Añ, Añ rơp tơm wơl, bơh tŭ jơng bol khai rơp ntiar; tài bơh ngai rung rài bol khai dê neh tus rềp, mơ khà lơh nền rài kis bol khai dê neh tus mhar.”

³⁶ Ngan Yàng Jehôwa rơp cahrña làng bol Kơnràñ dê, mơ gơs nùs nđàc sơngit di ală cau duh broă Kơnràñ dê, tòm tŭ Kơnràñ gŏ bơta pràn kơldang bol khai dê ò gam tai, bulah cau dĭ hala cau khat gơboh kung ò gam wơl.

³⁷ Kơnràñ rơp đơs lah: “Tŭ do ntềng đah ală yàng bol khai dê, mơ ntềng đah pơnai lŭ mơ bol khai kìng crŭ,

³⁸ la ală yàng neh sa dơngi ală phan ơn duh khoai chu pơrguc bol khai dê mơ ñô tơrnòm ño ơn duh khoai bol khai dê taih? Lòi tĕ bol khai guh mơ dong kòl bol mê! Lòi tĕ bol khai gơlik gơs tiah kìng crŭ bol mê in!

³⁹ Sền tĕ tŭ do, Añ la Bơtau hơ̆! Ò gơs yàng lơi ndai rlau mơ Añ. Añ tơnchơt mơ lơh kis wơl, Añ lơh sồt jê mơ rơp sơmbòi wơl; ò gơs cau lơi rgơi dong tă bơh di tê Añ.

⁴⁰ Bơh Añ pò tê Añ jê hơđang trồ mơ srat să: Be Añ kis gam sùm sùm,

⁴¹ tòm tŭ Añ tồl mat đào àng gơcrà Añ jê mơ tê Añ at gơtòm bơta cahrña; Añ rơp sal wơl di ală cau sò tơm di Añ mơ tơm wơl di ală cau gơjrañ kơuềng di Añ.

⁴² Añ rơp lơh ală kam àtak Añ jê bơñul bơh mhàm, tòm tŭ đào Añ jê sa loan poac: mhàm ală cau kong koh tơnchơt mơ ală cau kong kup cèng, mơ bồ ală cau kwang cau sò tơm dê.”

⁴³ Hòn chò tĕ, ơ ală lơgar bal mơ làng bol Kơnràñ dê bơh Kơnràñ rơp sal wơl bơh mhàm ală cau duh broă Kơnràñ dê; Kơnràñ rơp sal wơl di ală cau sò tơm Kơnràñ mơ lơh gơs bơta tơwài glài lơgar làng bol Kơnràñ in.

⁴⁴ Môise lòt tus bal mơ Jôsue kòn klau Nun dê mơ đơs jơh ală jơnau tòm bơta đơs chò do làng bol in iat.

⁴⁵ Tòm tŭ Môise neh sir đơs jơh ală jơnau do jơh Israel in,

⁴⁶ khai đơs mơ bol khai lah: “Prap gàr tĕ tòm nùs bol mê dê jơh ală jơnau mơ añ neh yal tơlik bol mê in tòm ngai do dô bă kràñ cê ngan, tồ bol mê rgơi sồr kòn sau bol mê dê kơrhia dòn bơr jơh ală jơnau tòm bơta boh lam do.

⁴⁷ Gơ ò di mìng la ală jơnau đơs gòi bol mê in, gơ la bơta kis bol mê dê. Kơnòm di gơ bol mê rơp kis jŏ jòng tòm lơgar mơ bol mê rơp tiă Jordan nàng dòp geh.”

Môise sàng rài hơđang mơnơm Nebô

⁴⁸ Kung tòm ngai hơ̆, Yàng Jehôwa neh đơs mơ Môise lah:

⁴⁹ “Guh tĕ hơđang mơnơm Abarim, di bồ mơnơm Nebô tòm Môap đah ne Jerikô mơ sền gŏ Kanaan la lơgar mơ Añ ai ală cau Israel in lơh gơs sre brê tòm bol khai dê.

⁵⁰ Tềng hơ̆, hơđang mơnơm mơ mê neh guh, mê rơp chơt mơ geh pơjum tơrgòm mơ gơp bơtiàn mê dê, kung be bi mê dê la Arôn neh chơt hơđang mơnơm Hôr mơ neh geh cèng brê hơ ồng pàng khai dê.

⁵¹ Hơ̆ la tài bơh bàr nă bol mê ò dòn Añ di đap ală cau Israel tòm tiah dà Meriba Kades tòm ƀlàng ngềt ngơt Jin, mơ tài bơh mê ò bơtào dờng màng bơta sàng goh Añ jê digùl ală cau Israel.

⁵² Gen tàng mê mìng sền gŏ lơgar bơh di tiah ngài; mê rơp ò mut tềng hơ̆ tòm lơgar mơ Añ rơp ai làng bol Israel in.”