Yal Wơl 31 - Sră Goh 2018

Jơnau tơngac mơ bơta chơt Môise dê ( 31:1 – 34:12 ) Jôsue pơrdòn gơnoar broă Môise dê

¹ Lồc behơ̆ Môise tơlik mat mơ đơs ală jơnau do mơ jơh Israel:

² “Tŭ do añ neh dô rhiang bàr jơt nam mơ añ ò rgơi tề lam bol mê tai. Yàng Jehôwa neh đơs mơ añ lah: ‘Mê rơp ò tiă Jordan ò.’

³ Să tòm Jehôwa Yàng Tom Trồ bol mê dê rơp tiă lài mơ bol mê. Kơnràñ rơp tơnroh ală làng bol do di đap bol mê, mơ bol mê rơp dòp geh lơgar bol khai dê lơh gơs sre brê tòm bol mê dê. Jôsue kung rơp tiă đah ne lài mơ bol mê jat be Yàng Jehôwa neh đơs.

⁴ Mơ Yàng Jehôwa rơp lơh di bol khai tòm toh kung be Kơnràñ neh lơh di Sihôn mơ Ok la ală cau bơtau cau Ammôn dê mơ Kơnràñ neh tơnroh bal mơ ù tiah lơgar bol khai dê.

⁵ Yàng Jehôwa rơp jào bol khai tòm tê bol mê, mơ bol mê pal lơh di bol khai jat be jơh ală jơnau gơnoar sồr mơ añ neh sồr bol mê.

⁶ Lơh tĕ pràn kơldang mơ khin cha. Bañ rngòt cù kìr tài bơh bol khai, bơh Jehôwa Yàng Tom Trồ bol mê dê lòt bal mơ bol mê, Kơnràñ rơp ò tŭ lơi sang bol mê hala lòi bol mê.”

⁷ Lồc behơ̆ Môise hòi Jôsue mơ đơs mơ khai di đap mat jơh Israel lah: “Lơh tĕ pràn kơldang mơ khin cha, bơh mê pal lòt bal mơ làng bol do mut tòm lơgar mơ Yàng Jehôwa neh srat să mơ ală ồng pàng bol mê dê nàng ai bol khai in, mơ bol mê pal tòmpà gơ digùl bol khai nàng lơh gơs sre brê bol khai dê.

⁸ Să tòm Yàng Jehôwa rơp lòt di đap bol mê mơ rơp ơm bal mơ bol mê, Kơnràñ rơp ò tŭ lơi sang bol mê hala lòi bol mê. Bañ rngòt; bañ gơplơ̆ nùs.”

Sền sră bơta boh lam

⁹ Behơ̆ Môise cih bơta boh lam do mơ ai gơ ală cau gơnoar ơn phan duh khoai in, la ală cau tùng Đài Bơta Ho Bal Yàng Jehôwa dê, mơ kung ai gơ jơh ală cau kwang kra Israel in.

¹⁰ Lồc behơ̆ Môise ai jơnau gơnoar sồr khai lah: “Di di tŭ lồi kòp poh nam, tòm nam toh dồs, tòm tŭ pơjum sa Ngai wèr Sàl Ing dê,

¹¹ tòm tŭ jơh Israel lòt tus pơjum di đap Jehôwa Yàng Tom Trồ bol mê dê di tiah mơ Kơnràñ rơp sac rwah, bol mê pal sền bơta boh lam do di đap jơh Israel nàng bol khai in iat.

¹² Hòi pơjum tĕ làng bol, ală cau klau, ală cau ùr mơ ală cau kơnòm, ală cau làng bơdìh ơm kis tòm ală ƀòn dờng bol mê dê, tồ bol khai rgơi ơm iat mơ bơtê duh rngòt di Jehôwa Yàng Tom Trồ bol mê dê mơ kơrhia lơh jat jơh ală jơnau bơta boh lam do dê,

¹³ gen tàng kòn sau bol khai dê la ală cau ò git bơta boh lam do, bol khai rgơi iat mơ bơtê nàng duh rngòt di Jehôwa Yàng Tom Trồ bol mê dê, nđò jŏ bol mê gam kis tòm lơgar mơ bol mê rơp tiă Jordan nàng dòp geh.”

Môise mơ Jôsue dòp gơnoar broă Yàng Tom Trồ dê

¹⁴ Yàng Jehôwa đơs mơ Môise lah; “Ngai chơt mê dê neh rềp rau. Hòi tĕ Jôsue mơ să tòm mê pal lòt tus ntào tòm Sàl Tòm Mat, la tiah Añ rơp ai jơnau gơnoar sồr khai in.” Behơ̆ Môise mơ Jôsue lòt tơlik mat să tòm bol khai tòm Sàl Tòm Mat,

¹⁵ mơ Yàng Jehôwa tơlik mat tòm Sàl tòm dô puk mhwal; mơ puk mhwal gơ ơm di mpồng mut tòm Sàl.

¹⁶ Yàng Jehôwa đơs mơ Môise lah: “Tŭ do mê rơp bic mơ ală ồng pàng mê dê. Ai làng bol do rơp lơh dri tơlàr mơ ală yàng lơgar bơdìh tòm lơgar mơ bol mê rơp mut, bol khai rơp sang lòi Añ mơ ò prap gàr jơnau ho bal mơ Añ neh bơtào mơ bol khai.

¹⁷ Tòm ngai hơ̆ Añ rơp gơhào gơjrañ di bol khai. Añ rơp sang lòi bol khai mơ Añ rơp pồn mat Añ bơh di bol khai; mơ bol khai rơp gơlik gơs phan ƀuơn kòl tơnroh, mơ oă bơta rung rài bòl glar kalke rơp tus hơđang bol khai. Tòm ngai hơ̆ bol khai rơp đơs lah: ‘Ò di ală bơta rung rài bòl glar kalke tus hơđang bol hi la tài bơh Yàng Tom Trồ bol he dê ò ơm bal mơ bol he ò ơ?’

¹⁸ Tòm ngai hơ̆ ngan Añ rơp pồn mat Añ jê tài bơh jơh ală bơta tồi glài iơh bơsak tòm bơta wèt mat hơ ală yàng ndai.

¹⁹ Tŭ do cih tĕ mê in jơnau đơs chò do, mơ bơto ală cau Israel in; mơ sồr bol khai đơs chò jơnau hơ̆ tồ gơlik gơs dô jơnau lơh cơng tòmdră mơ làng bol Israel.

²⁰ Tòm tŭ Añ neh cèng bol khai mut tòm lơgar bềng lìu dà toh mơ dà lơwe, la lơgar Añ neh ho mơ srat să mơ ală ồng pàng bol khai dê, mơ tòm tŭ bol khai neh sa hòm mơ lơmă rau, gen bol khai wèt mat hơ ală yàng ndai mơ duh khoai bol gơ, sền òsơp dê Añ mơ sang lòi bơta ho bal Añ jê.

²¹ Mơ tòm tŭ gơs oă bơta rung rài bòl glar gơtơntus di bol khai gen bơta đơs chò do rơp lơh cơng tòmdră mơ bol khai tài bơh ală kòn sau bol khai dê rơp ò hŭi bơta đơs chò do. Bơh Añ git lài rau ñchi bơta bol khai rơp lơh tòm tŭ Añ cèng bol khai mut tòm lơgar mơ Añ neh ho ai bol khai in.”

²² Behơ̆ Môise neh cih jơnau bơta đơs chò do tòm ngai hơ̆ mơ bơto ală cau Israel in.

²³ Yàng Jehôwa ai jơnau gơnoar sồr do Jôsue in kòn klau Nun dê mơ đơs lah: “Lơh tĕ pràn kơldang mơ khin cha bơh mê rơp cèng ală cau Israel mut tòm lơgar mơ Añ neh ho ai bol khai in, mơ Añ rơp ơm bal mơ mê.”

²⁴ Tòm tŭ Môise neh cih sir tòm dô nơm sră pồt ală jơnau bơta boh lam do bơh sơnròp tus di lồi dut,

²⁵ gen khai ai jơnau gơnoar sồr do ală cau Lebi in la cau tùng Đài Bơta Ho Bal Yàng Jehôwa dê mơ đơs lah:

²⁶ “Ai tĕ Sră Bơta Boh lam do mơ ơn gơ di gah Đài Bơta Ho Bal Jehôwa Yàng Tom Trồ bol mê dê. Tềng hơ̆ gơ rơp ơm kung be dô nơm cơng tàng tòmdră mơ bol mê.

²⁷ Bơh añ git bol mê la dô nơm làng bol jak tòmdră mơ kơldang bồ. Dilah bol mê neh bơtào tòmdră mơ Yàng Jehôwa tòm tŭ añ gam kis digùl oh mi, tơ ài lah tơnơ̆ mơ tŭ añ neh chơt rau gen bol mê rơp bơtào tòmdră oă rlau tai!

²⁸ Hòi pơjum tĕ di đap añ jơh ală cau kwang kra ală jơi bơtiàn bol mê dê mơ jơh ală cau kwang duh broă bol mê dê nàng añ rgơi đơs mơ bol khai tòm tồr bol khai dê, mơ hòi trồ mơ tiah lơh cơng tòmdră mơ bol khai.

²⁹ Bơh añ git lah tơnơ̆ mơ tŭ añ neh chơt rau gen ngan la bol mê gơlik gơs iơh rmơh mơ pơrlac sang gùng dà mơ añ neh bơto sồr bol mê. Tòm ală ngai rơp tus, oă bơta rung rài rơp dùh hơđang bol mê tài bơh bol mê rơp lơh bơta iơh bơsak di đap mat Yàng Jehôwa mơ bơrcek Kơnràñ gơhào gơjrañ bơh ală broă tê bol mê neh lơh.”

Bơta đơs chò Môise dê

³⁰ Gen Môise đơs ală jơnau bơta đơs chò do, bơh sơnròp tus di lồi jơh mpồl jơnum Israel in ơm iat: