Yal Wơl 30 - Sră Goh 2018

Bơta lơngai lơngò cau rê wơl hơ Yàng Jehôwa

¹ Tòm tŭ jơh ală bơta do neh gơlik gơs di bol mê, bơta lơngai mơ ală bơta srat sơntơm mơ añ neh ơn di đap bol mê, dilah bol mê kah wơl gơtòm tŭ bol mê gam ơm tòm ală lơgar mơ Jehôwa Yàng Tom Trồ bol mê dê neh bơtrơh bol mê,

² mơ rê wơl hơ Jehôwa Yàng Tom Trồ bol mê dê, bol mê mơ ală kòn sau bol mê dê dòn bơr Kơnràñ jơh nùs jơh hwềng soàn, jat be kòp bơta añ neh sồr bol mê tòm ngai do,

³ gen Jehôwa Yàng Tom Trồ bol mê dê rơp tơm wơl phan mơna bol mê dê, mơ gơs nùs nđàc sơngit di bol mê, mơ pơjum tơrgòm bol mê bơh di ală lơgar mơ Kơnràñ neh rsìh bol mê.

⁴ Bulah dilah bol mê neh kong cèng pơrdô tus hơ tiah lồi dut plai ù, bơh tềng hơ̆ Jehôwa Yàng Tom Trồ bol mê dê rơp pơjum tơrgòm, mơ cèng bol mê rê wơl bơh tềng hơ̆.

⁵ Kơnràñ rơp cèng bol mê tus hơ lơgar gơrê bal mơ ală ồng pàng bol mê dê, mơ bol mê rơp dòp geh lơgar hơ̆ lơh gơs sre brê; Kơnràñ rơp lơh bol mê in geh pas gơs mơ rơ̆sơmpài ràipơjềng rlau mơ ală ồng pàng bol mê dê.

⁶ Jehôwa Yàng Tom Trồ bol mê dê rơp siat gơltau nùs bol mê dê mơ nùs ală kòn sau bol mê dê, tồ bol mê rơp jơh nùs mơ jơh hwềng soàn kòñ gơboh di Jehôwa Yàng Tom Trồ bol mê dê, nàng bol mê in geh kis.

⁷ Jehôwa Yàng Tom Trồ bol mê dê rơp tơndùh jơh ală jơnau srat sơntơm hơđang ală cau sò tơm, mơ hơđang ală cau sòdră bol mê dê, mơ kup kơryan bol mê.

⁸ Bol mê rơp dòn bơr Yàng Jehôwa tai, mơ lơh jat jơh ală jơnau sồr Kơnràñ dê mơ añ ai bol mê in tòm ngai do,

⁹ gen Jehôwa Yàng Tom Trồ bol mê dê rơp lơh bol mê in geh pas gơs tơngkah tơngkañ rlau tai tòm jơh ală broă tê bol mê lơh mơ ală plai đo hìu kòn bol mê dê, ală kòn phan poan jơng bol mê dê mơ ală plai đo ù tiah bol mê dê. Yàng Jehôwa rơp hừh nùs lơh pas sơm oh mi in tai be Kơnràñ neh hừh nùs lơh pas sơm ồng pàng bol mê in,

¹⁰ dilah bol mê dòn bơr Jehôwa Yàng Tom Trồ bol mê dê mơ prap gàr ală jơnau gơnoar sồr mơ ală bơta lơh nền Kơnràñ dê be neh cih tòm sră bơta boh lam mơ jơh nùs jơh hwềng soàn rê wơl hơ Jehôwa Yàng Tom Trồ bol mê dê.

Jơnau sồr sac rwah bơta kis

¹¹ Tŭ do, jơnau gơnoar sồr añ ai bol mê in tòm ngai do ò di la kalke oă ir bol mê in hala rlau mơ pràn bol mê dê.

¹² Gơ ò di ơm hơđang trồ tian gơs bol mê pal lùp lah: “Ñcau rơp guh hơđang trồ nàng cèng gơ bol hi in nàng bol hi kơno mơ lơh jat taih?”

¹³ Kung ò di la gơ ơm đah ne dàlềng mơ bol mê pal đơs lah: “Ñcau rơp tiă đah ne dàlềng bol hi in mơ cèng gơ bol hi in tồ bol hi in kơno mơ lơh jat gơ taih?”

¹⁴ Ò di, jơnau hơ̆ gơ ơm rềp ngan mơ bol mê; gơ ơm tòm bơr mơ gơ ơm tòm nùs bol mê dê tồ bol mê rgơi lơh jat.

¹⁵ Sền tĕ, ngai do añ ơn di đap bol mê bơta kis mơ bơta pas sơm, bơta chơt mơ bơta rung rài.

¹⁶ Dilah bol mê dòn bơr jơnau gơnoar sồr Jehôwa Yàng Tom Trồ bol mê mơ añ sồr bol mê tòm ngai do, mơ kòñ gơboh Jehôwa Yàng Tom Trồ bol mê dê, lòt tòm gùng dà Kơnràñ dê, mơ lơh jat ală jơnau gơnoar sồr Kơnràñ dê, ală bơta sồr lam, mơ ală bơta boh lam Kơnràñ dê, gen bol mê rơp geh kis mơ geh gơbơtơl oă, mơ Jehôwa Yàng Tom Trồ bol mê dê rơp ai lơngai bol mê in tòm lơgar mơ bol mê rơp mut nàng lơh gơs sre brê.

¹⁷ Mơya dilah nùs bol mê gơpơrlac ngài mơ bol mê ò kòñ iat, mơya bol mê gơkòl tìs nrah cùn khoai ală yàng ndai mơ duh broă bol gơ,

¹⁸ Añ yal loh bol mê in tòm ngai do bol mê pal kong roh rui; bol mê rơp ò kis jŏ jòng tòm lơgar mơ bol mê rơp tiă Jordan nàng mut mơ dòp geh sre brê.

¹⁹ Ngai do añ hòi trồ mơ tiah lơh cơng tòmdră mơ bol mê lah añ neh ơn di đap bol mê bơta kis mơ bơta chơt, ală bơta lơngai lơngò mơ ală bơta srat sơntơm. Sac rwah tĕ bơta kis nàng bol mê mơ ală kòn sau bol mê dê geh kis,

²⁰ kòñ gơboh tĕ Jehôwa Yàng Tom Trồ bol mê dê, dòn bơr Kơnràñ mơ ntào kơ̆ tòm Kơnràñ; hơ̆ la bơta kis bol mê in mơ ală ngai jŏ jòng tồ bol mê in kis tòm lơgar mơ Yàng Jehôwa neh srat să ai ală ồng pàng bol mê in la Abraham, Isak mơ Jakôp.