Yal Wơl 25 - Sră Goh 2018

Ală gơnoar sồr ndai

¹ Tòm tŭ bàr đah gơs bơta tòmlah tòmring bal, bol khai pal cèng bơta hơ̆ tus dê tiah cahrña mơ ală cau kwang rơp cahrña, dong tò cau ò gơs glài mơ lơh nền glài cau tìs glài.

² Dilah cau tìs glài pal kong pù ơlih, gen cau kwang cahrña rơp sồr khai bic tòm tiah mơ sồr cau pù khai di đap mat cau kwang, pù nđò tê jat be khai pal kong pù,

³ mơya cau kwang ò di pù khai rlau mơ poan jơt tê. Dilah cau oh mi bol mê dê kong pù rlau mơ poan jơt tê gen khai rơp kong sền òsơp di đap mat bol mê.

⁴ Bañ gla bơr kơnrồ tòm tŭ gơ pơrjòt kòi.

⁵ Dilah ală oh mi ơm kis bal tòm dô nơm hìu mơ gơs dô nă chơt mơ ò gơs kòn lòi wơl gen cau ùr bơnrau khai dê, ò di bau mơ cau bơdìh hìu nhă bau klau neh chơt hơ̆ dê. Oh mi bau klau khai dê rơp bau mơ khai mơ lơh gơlik gơs wil tơl broă tòm dô nă cau oh mi bau klau khai dê gơwèt hơ khai.

⁶ Kòn klau tơnhoa khai deh rơp tơrbŏ sơnđan cau bi neh chơt khai dê, tồ sơnđan khai dê rơp ò gơkòl jùt bơh di Israel.

⁷ Bulah behơ̆, dilah dô nă cau klau ò bài bau mơ bau ùr bi khai dê gen cau ùr hơ̆ rơp lòt tus hơ ală cau kwang kra ơm di mpồng ƀòn dờng mơ đơs lah: “Cau oh bau klau añ jê ò bài tơrbŏ sơnđan cau bi khai dê tòm Israel. Khai rơp ò lơh gơlik gơs wil tơl broă tòm dô nă cau oh mi bau klau añ jê gơwèt mơ añ.”

⁸ Gen ală cau kwang kra ƀòn dờng khai dê hòi khai tus mơ tòmbơhbơr mơ khai. Dilah khai kư̆ kơ̆ nùs mơ đơs lah; “Añ ò bài bau mơ ùr hơ̆,”

⁹ gen cau ùr bơnrau bi khai dê rơp lòt tus di đap khai, hồ dô nơm gơltau jă khai dê, choh dà diau di mat khai mơ đơs lah: “Do la bơta neh lơh di dô nă cau klau ò bài bơt bơtào mpồl hìu nhă oh mi khai dê.”

¹⁰ Mpồl hìu nhă cau hơ̆ dê rơp kong pơnro tòm Israel la hìu nhă cau gơkòl hồ gơltau jă.

¹¹ Dilah bàr nă cau klau ơm tòmlơh bal, mơ bau ùr dô nă tòm bàr nă hơ̆ dê lòt tus nàng dong tă bau klau khai dê bơh di cau lơh khai, mơ cau ùr hơ̆ pò tê mơ kup cau klau hơ̆ di di tiah ndơp khai dê,

¹² bol mê pal koh tê cau ùr hơ̆ dê. Bañ gơs nùs nđàc sơngit di khai.

¹³ Bol mê bañ ơn bàr nơm phan kơr tòm kơldung bol mê dê, dô nơm nggòc mơ dô nơm kơnjơ̆.

¹⁴ Bol mê bañ ơn tòm hìu bol mê dê bàr nơm phan was, dô nơm dờng mơ dô nơm dềt.

¹⁵ Bol mê pal gơs ală phan kơr mơ ală phan was tòm toh di sơnoa rnoas mơ song ngan tồ bol mê rgơi geh kis jŏ jòng tòm lơgar mơ Jehôwa Yàng Tom Trồ bol mê dê ai bol mê in.

¹⁶ Bơh Jehôwa Yàng Tom Trồ bol mê dê cù kìr di kòp nă cau lơi lơh lòt ò song ngan.

¹⁷ Kah tĕ bơta mơ ală cau Amalek neh lơh di bol mê tòm gùng bol mê lik lòt bơh di Ejiptơ.

¹⁸ Tòm tŭ bol mê neh bòl glar òsô, bol khai lòt tus tòm mat mơ bol mê rò gùng bol mê dê mơ brồ lơh ală cau lòt bơh ngkòi; bol khai ò duh rngòt di Yàng Tom Trồ.

¹⁹ Tòm tŭ Jehôwa Yàng Tom Trồ bol mê dê ai bol mê in ơm rlô lơngai bơh di jơh ală cau sò tơm bol mê dê ơm gùt dar bol mê tòm lơgar bol mê dòp geh lơh gơs sre brê, bol mê rơp jùt sang bơta yal yau bơh Amalek bơh hơđơm ală tap trồ. Bañ lòi hŭi bơta hơ̆!