Yal Wơl 24 - Sră Goh 2018

Bơta boh lam bơta tòmlòi bau

¹ Dilah dô nă cau klau neh tòmbau mơ dô nă cau ùr, tơnơ̆ hơ̆ khai ò niam nùs tài bơh khai neh gŏ bơta lơi ò di pal bơh di cau ùr hơ̆, gen khai cih dô pang sră lòi bau, ai sră hơ̆ bau ùr khai in mơ bơtrơh tơlik khai bơh di hìu,

² mơ dilah tơnơ̆ mơ tŭ khai neh lik bơh di hìu bau klau khai dê rau mơ khai gơlik gơs bau ùr dô nă cau ndai dê.

³ Mơ bau klau dơ̆ bàr khai dê ò kòñ gơboh di khai tai mơ cih sră lòi bau, ai khai in mơ bơtrơh khai bơh di hìu bau klau khai dê, hala dilah bau klau chơt,

⁴ gen bau klau dơ̆ dùl la cau neh lòi khai, ò geh gơnoar bau wơl mơ khai tai tơnơ̆ mơ tŭ cau ùr hơ̆ neh gơlik gơs ƀơ̆ ƀơl rau. Bơta bau wơl behơ̆ rơp la dô bơta iơh rmơh cù kìr tòm gar mat Yàng Jehôwa dê. Bañ cèng bơta tồi glài tus hơđang ù tiah mơ Jehôwa Yàng Tom Trồ bol mê dê ai bol mê in lơh gơs sre brê.

⁵ Dilah dô nă cau klau pa tòmbau, khai ò di lòt tòmlơh hala sồr khai pal lơh broă lơi ndai. Khai geh khat gơboh tòm dô nam ơm tòm hìu khai dê mơ cèng tus bơta lơngai bau ùr khai in la cau khai neh bau.

⁶ Bañ tă prap mpal lŭ tơnlề kòi hala lŭ mpal hơđang lơh gơs phan cơng tàng ai càn priă, bơh lơh behơ̆ la kung be tă bơta kis dô nă cau dê nàng lơh gơs phan cơng tàng.

⁷ Dilah dô nă cau gơkòl kup tòm tŭ khai kup òm dô nă oh mi cau Israel khai dê, mơ lơh di khai kung be cau dĭ hala tac khai, gen cau kup khai pal kong tơnchơt. Bol mê pal tă sang bơta iơh bơsak bơh digùl bol mê.

⁸ Dilah gơs bơta kòp dun gen pal kơrhia lơh jat tòm toh be jơnau ală cau gơnoar ơn phan duh khoai la ală cau Lebi neh bơto sồr bol mê. Bol mê pal kơrhia lơh jat ală bơta añ neh sồr bol khai.

⁹ Kah wơl tĕ mbe Jehôwa Yàng Tom Trồ bol mê dê neh lơh di Miriam tòm gùng lòt tơnơ̆ mơ tŭ bol mê neh lik bơh di Ejiptơ.

¹⁰ Tòm tŭ bol mê ai cau in ơm rềp di bol mê càn phan lơi, gen bañ mut tòm hìu khai dê nàng ai phan lơi lơh gơs phan cơng tàng ai càn.

¹¹ Ntào tĕ đah bơdìh hìu, mơ lòi tĕ cau klau mơ bol mê neh ai càn cèng tơlik phan cơng tàng ai càn tus hơ bol mê.

¹² Dilah cau klau hơ̆ la cau rƀah, gen bol mê bañ ai phan cơng tàng hơ̆ mơ lòt bic.

¹³ Ai wơl tĕ ào jrùh khai in tòm tŭ mattơngai mut tồ khai rgơi bic mang tòm ào hơ̆. Gen khai rơp kah bơta nđàc bol mê dê, mơ bơta hơ̆ geh kòp la dô nơm broă song ring di đap mat Jehôwa Yàng Tom Trồ bol mê dê.

¹⁴ Bañ ngui cau lơh broă ơpah la cau rƀah lơòi mơ siơ̆u siar lơh gơlik cồng nha he in, bulah khai la dô nă cau Israel hala dô nă cau làng bơdìh kis tòm dô nơm tòm ală ƀòn dờng bol mê dê.

¹⁵ Tơm tĕ khai in lài mơ tŭ mattơngai mut ală jền tơngai lơh broă kòp ngai khai dê, tài bơh khai rƀah lơòi mơ pal càng jền hơ̆. Dilah ò, khai rơp hòi driau tus di Yàng Jehôwa tòmdră mơ bol mê, mơ bol mê rơp gơkòl kòp la gơs glài.

¹⁶ Ală bèp ò di kong lơh glài tơnchơt tài bơh kòn sau bol khai dê, kòn sau kung ò di gơkòl lơh glài tơnchơt tài bơh ală bèp bol khai dê; kòp nă pal kong chơt tài bơh tồi glài să tòm khai dê.

¹⁷ Bañ gơwèt ò song ring mơ cau làng bơdìh hala cau kòn đòi, hala ai ào jrùh cau ùr bơnrau dê nàng lơh gơs phan cơng tàng.

¹⁸ Kah tĕ lah bol mê neh la ală cau dĭ tòm Ejiptơ mơ Jehôwa Yàng Tom Trồ bol mê dê neh dong tơwài bol mê bơh tềng hơ̆. Tài bơh hơ̆, tàng añ ai jơnau sồr bol mê lơh bơta hơ̆.

¹⁹ Tòm tŭ bol mê ơm toès kòi tòm ƀlàng sre bol mê dê mơ bol mê lòi hŭi dô cap kòi gen bañ rê wơl nàng ai cap kòi hơ̆. Lòi tĕ gơ cau làng bol bơdìh, cau kòn đòi mơ cau ùr bơnrau in, tồ Jehôwa Yàng Tom Trồ bol mê dê rgơi ai lơngai bol mê in tòm jơh ală broă tê bol mê lơh.

²⁰ Tòm tŭ bol mê pòng ală tòm chi Ôlibe nàng ai plai gơ gen bañ pòng dơ̆ bàr di ală ntê neh pòng rau. Lòi tĕ plai gam wơl ală cau làng bol bơdìh, cau kòn đòi mơ cau ùr bơnrau in.

²¹ Tòm tŭ bol mê pic plai ño tòm suơn ño bol mê dê, bañ rê wơl nàng pic dơ̆ bàr. Lòi tĕ ală plai gam wơl cau làng bol bơdìh, cau kòn đòi mơ cau ùr bơnrau in.

²² Kah tĕ lah bol mê la ală cau dĭ tòm Ejiptơ. Tài bơh hơ̆, tàng añ ai jơnau sồr bol mê lơh bơta hơ̆.