Yal Wơl 23 - Sră Goh 2018

Tă sang bơh di mpồl jơnum

¹ Ò gơs cau lơi neh kriau bơh neh bơcah hala neh koh rgơi geh mut tòm mpồl jơnum Yàng Jehôwa dê.

² Ală cau lơi deh bơh mè bèp ò tòmbau hala kòn sau khai dê ò geh mut tòm mpồl jơnum Yàng Jehôwa dê, bulah tus di rài dơ̆ jơt kung ò sơl.

³ Ò gơs cau Ammôn lơi hala cau Môap lơi rgơi geh mut tòm mpồl jơnum Yàng Jehôwa dê, bulah tus di rài dơ̆ jơt kung ò sơl.

⁴ Bơh bol khai neh ò cèng piang lă mơ dà hùc tus dong kòl bol mê tòm tŭ bol mê lik lòt bơh di Ejiptơ, mơ bol khai neh ơpah Balaam kòn klau Beor bơh Phethor tòm Aram Naharaim nàng srat sơntơm bol mê.

⁵ Bulah behơ̆, Jehôwa Yàng Tom Trồ bol mê dê ò bài iat Balaam mơya Kơnràñ pơrlac bơta srat sơntơm gơlik gơs bơta ai lơngai bol mê in, tài bơh Jehôwa Yàng Tom Trồ bol mê dê kòñ gơboh di bol mê.

⁶ Jơl jơh rài kis bol mê dê bañ tŭ lơi jòi bơta ring lơngai mơ bol khai, hala lơh bơta gơs kwơ bol khai in.

⁷ Bañ cù kìr di dô nă cau Edôm tài bơh khai la oh mi bol mê dê. Bañ cù kìr di dô nă cau Ejiptơ, tài bơh bol mê neh ơm ing tòm lơgar khai dê.

⁸ Kòn sau rài dơ̆ pe bol khai dê rgơi geh mut tòm mpồl jơnum Yàng Jehôwa dê.

Bơta ò goh tòm sàl ơm

⁹ Tòm tŭ bol mê sơntơp sàl ơm tòmlơh mơ cau sò tơm bol mê dê, kơrmap gàr tĕ să he bơh di ală phan ò goh.

¹⁰ Dilah dô nă cau tòm bol mê gơlik ò goh tài bơh mpau trồ mang mơ gơlik să, gen khai pal lik đah bơdìh sàl mơ ơm tềng hơ̆.

¹¹ Mơya tus di mho khai pal um să tòm dà, mơ tòm tŭ mattơngai neh mut gen khai rgơi rê wơl tòm sàl ơm.

¹² Lơh nền lòi is dô bă tiah nàng lòt jă brê.

¹³ Tòm ală phan ngui bol mê cèng bal gen pal gơs dô nơm phan nàng tò trồm, mơ tòm tŭ bol mê lòt jă brê gen tò dô nơm trồm mơ bồr wơl.

¹⁴ Bơh Jehôwa Yàng Tom Trồ bol mê dê lòt digùl tiah sơntơp sàl ơm bol mê dê nàng sền gàr bol mê mơ jào phi ală cau sò tơm bol mê dê bol mê in. Tiah sơntơp sàl ơm bol mê dê pal gơs sàng goh tồ Kơnràñ ò gŏ phan lơi ò goh digùl bol mê mơ pơrlac bơh di bol mê.

Ală bơta boh lam ndai

¹⁵ Dilah dô nă cau dĭ dô pồn tòm hìu bol mê gen bañ jào khai wơl mơ cau tòm khai dê.

¹⁶ Lòi tĕ khai ơm digùl bol mê tòm tiah khai kòñ mơ tòm ƀòn dờng lơi khai sac rwah, bañ rồn bơklơn khai.

¹⁷ Bañ gơs cau klau hala cau ùr Israel lơi gơlik gơs cau dri tòm hìu bơmồng duh khoai.

¹⁸ Bol mê bañ cèng jền cau ùr dri hala cau klau dri lơh gơs mơ tơmut gơtòm hìu Jehôwa Yàng Tom Trồ bol mê dê nàng tơm dô jơnau srat să ho nền lơi, tài bơh Jehôwa Yàng Tom Trồ bol mê dê cù kìr di bàr bơta jền tơngai hơ̆.

¹⁹ Bañ sa jền cồng bơh di oh mi bol mê dê, bulah la bơh di jền priă hala phan sa hala bơh di phan lơi ndai mơ bol mê rgơi sa jền cồng.

²⁰ Bol mê rgơi sa jền cồng di cau làng bơdìh, mơya bañ sa jền cồng di dô nă oh mi cau Israel, tồ Jehôwa Yàng Tom Trồ bol mê dê rgơi ai lơngai bol mê in tòm jơh ală bơta mơ bol mê ơn tê hơđang tòm lơgar mơ bol mê rơp mut nàng dòp geh lơh gơs sre brê.

²¹ Dilah bol mê srat să ho nền dô jơnau lơi mơ Jehôwa Yàng Tom Trồ bol mê dê, gen bañ lơh òbat tơm wơl, bơh ngan la Jehôwa Yàng Tom Trồ bol mê dê rơp lùp bơta hơ̆ bơh di bol mê mơ bol mê gơkòl tòm bơta tìs glài.

²² Mơya dilah bol mê ò srat să ho nền gen bol mê ò gơkòl tìs glài.

²³ Jơnau lơi gơlik bơh bơr sơndồi bol mê dê gen bol mê pal kơrmap gàr mơ lơh gơs, bơh bol mê neh srat să ho nền bơh nùs kòñ mơ Jehôwa Yàng Tom Trồ bol mê dê bơh di bơr tòm bol mê dê.

²⁴ Dilah bol mê mut tòm suơn ño cau ơm rềp di bol mê, bol mê rgơi sa jơh ală plai ño bol mê kòñ, mơya bañ ơn plai lơi tòm bài bol mê dê.

²⁵ Dilah bol mê mut tòm sre cau ơm rềp bol mê dê, bol mê rgơi ai tê dòñ ală gar kòi rung tòm ù, mơya bol mê ò di ai mơ̆ siat kòi gam ntào tòm sre.