Yal Wơl 21 - Sră Goh 2018

Phan ơn tơwài glài bơh bơta tơnchơt cau mơ ò git cau tơnchơt

¹ “Dilah jòi bàn dô nơm ƀồc cau tơnchơt lòi tòm ƀlàng gơrê bal mơ ù tiah Jehôwa Yàng Tom Trồ bol mê dê ai bol mê in lơh gơs phan tòm, mơ ò git ñcau neh tơnchơt cau hơ̆,

² gen ală cau kwang kra mơ ală cau kwang cahrña bol mê dê rơp lik lòt mơ was bơh di ƀồc tus hơ ală ƀòn dờng gùt dar.

³ Gen ală cau kwang kra ƀòn dờng rềp rlau jơh di ƀồc rơp kup dô nơm kơnrồ dra òhềt tŭ lơi lơh broă mơ òhềt tŭ lơi buh yô,

⁴ mơ tề gơ tus hơ dô nơm thòng ò gŏ lơòr hala tùc tam phan lơi mơ tềng hơ̆ gơs dô nơm croh dà hòr. Tòm croh dà hơ̆ bol khai pal tơrpă ngko kơnrồ hơ̆.

⁵ Ală cau gơnoar ơn phan duh khoai, ală kòn klau Lebi rơp cơnđòa lòt hơđap, bơh Jehôwa Yàng Tom Trồ bol mê dê neh sac rwah bol khai nàng duh broă mơ ai sơnđan Yàng Jehôwa mơ ai lơngai, mơ lơh nền jơh ală bơta tòmlah tòmlơh.

⁶ Gen jơh ală cau kwang kra ƀòn dờng ơm rềp rlau jơh di ƀồc rơp rào tê bol khai hơđang kơnrồ dra neh tơrpă ngko tòm thòng,

⁷ mơ bol khai rơp yal tơlik lah: ‘Tê bol hi dê ò gŏ lơh gơhòr mhàm do, mơ gar mat bol hi kung ò sền gŏ mbe neh gơlik gơs bơta hơ̆.

⁸ Ơ Yàng Jehôwa, dan dòp phan ơn tơwài glài do bơh Israel la làng bol Kơnràñ dê mơ Kơnràñ neh tơwài, mơ bañ kup glài làng bol Kơnràñ dê bơh mhàm dô nă cau ò gơs glài.’ Mơ bơta lơh gơhòr mhàm geh toh.

⁹ Behơ̆ bol mê pal tă sang bơh di să tòm bol mê dê bơta tồi glài lơh gơhòr mhàm ò gơs glài, bơh bol mê pal lơh bơta di ngan di đap mat Yàng Jehôwa.”

Tòmbau mơ cau ùr gơkòl kup

¹⁰ “Tòm tŭ bol mê lòt tòmlơh mơ ală cau sò tơm bol mê dê mơ Jehôwa Yàng Tom Trồ bol mê dê jào phi bol khai tòm tê bol mê mơ bol mê kup cèng bol khai,

¹¹ dilah tòm bol mê jòi gŏ digùl ală cau gơkòl kup gơs dô nă cau ùr hàng mơnĕ mơ kòñ gơboh di khai, gen cau hơ̆ rgơi bau mơ khai.

¹² Lam khai tus tòm hìu mê dê mơ koah sŏ di bồ khai dê, koh nđias tê khai dê,

¹³ mơ tă sang ồi ào khai neh soh tòm tŭ gơkòl kup cèng. Tòm tŭ khai neh kis tòm hìu mê dê mơ ñìm rac bơh mè bèp khai tòm jơh dô kơnhai, gen mê rgơi tus hơ khai mơ lơh gơs bau klau khai dê, mơ khai lơh gơs bau ùr mê dê.

¹⁴ Dilah mê ò niam nùs di khai gen lòi tĕ khai lik lòt tiah lơi khai kòñ. Mê ò di tac khai hala gơwèt mơ khai kung be dô nă cau dĭ, tài bơh mê neh bau mơ khai.”

Gơnoar kòn tơnhoa dê

¹⁵ “Dilah dô nă cau klau gơs bàr nă bau ùr, mơ khai kòñ gơboh bau ùr do mơ ò kòñ gơboh di bau ùr ne, mơ jơh bàr nă deh kòn klau khai in mơya kòn klau tơnhoa la kòn klau bau ùr khai ò kòñ gơboh,

¹⁶ tòm tŭ khai tòmpà sre brê khai dê ală kòn klau khai in, khai ò di ai gơnoar kòn tơnhoa dê kòn klau bau ùr khai kòñ gơboh in ala kòn klau tơnhoa ngan la kòn klau bau ùr mơ khai ò kòñ gơboh.

¹⁷ Khai pal dòp kòn klau bau ùr khai ò kòñ gơboh la kòn klau tơnhoa mơ ai khai in bàr pơnah tòm jơh ală phan mơna khai gơs. Kòn klau hơ̆ la tềl sơnròp bơh bơta pràn kơldang bèp khai dê. Gơnoar kòn tơnhoa gơrê bal mơ khai.”

Dô nă kòn klau jak tòmdră

¹⁸ “Dilah dô nă cau klau gơs dô nă kòn klau kơldang bồ mơ jak tòmdră, ò dòn bơr mè bèp khai, mơ rơp ò iat bol khai tòm tŭ bol khai lơh glài tơmàl khai,

¹⁹ gen mè bèp khai rơp kup khai mơ cèng khai tus hơ ală cau kwang kra di mpồng ƀòn dờng dê.

²⁰ Bol khai rơp đơs mơ ală cau kwang kra lah: ‘Kòn klau do bol hi dê la dô nă kòn kơldang bồ mơ jak tòmdră. Khai ò dòn bơr bol hi. Khai la dô nă kòn klau ơm gơlềng gơlàng jròk ñô sa.’

²¹ Gen jơh ală cau klau tòm ƀòn dờng khai dê rơp cơm lŭ tơnchơt khai. Bol mê pal tă sang bơta iơh bơsak bơh digùl bol mê. Jơh Israel rơp kơno bơta hơ̆ mơ rngòt.”

Ală bơta boh lam ndai

²² “Dilah dô nă cau tìs glài pal kong tơnchơt mơ ƀồc khai dê gam yồng hơđang dô nơm jrong,

²³ gen bol mê bañ lòi ƀồc khai dê hơđang chi mang àng. Lơh nền tĕ tơp khai tòm ngai hơ̆, tài bơh dô nă cau kong yồng hơđang jrong la ơm hơđơm bơta srat sơntơm Yàng Tom Trồ dê. Bol mê bañ lơh ƀơ̆ ƀơl ù tiah mơ Jehôwa Yàng Tom Trồ bol mê dê ai bol mê in lơh gơs sre brê.”