Yal Wơl 20 - Sră Goh 2018

Lòt tòmlơh

¹ “Tòm tŭ bol mê lòt tòmlơh mơ ală cau sò tơm bol mê dê, mơ gŏ ală ơseh, ală rơndeh ơseh mơ dô mpồl ling dờng rlau mơ mpồl ling bol mê dê, bañ rngòt di bol khai, tài bơh Jehôwa Yàng Tom Trồ bol mê dê la Bơtau neh tă bol mê lik bơh di Ejiptơ rơp ơm bal mơ bol mê.

² Tòm tŭ bol mê rcang lòt tòmlơh gen cau gơnoar ơn phan duh khoai rơp lòt tus di đap mơ tòmbơhbơr mơ mpồl ling.

³ Khai rơp đơs lah: ‘Ơ Israel, iat tĕ do, ngai do bol mê rơp lik lòt tòmlơh mơ ală cau sò tơm bol mê dê. Bañ gơdô nùs hala rngòt; bañ rngòt rngơt mơ rơm să di đap bol khai.

⁴ Bơh Jehôwa Yàng Tom Trồ bol mê dê la Bơtau lòt bal mơ bol mê, nàng tòmlơh bol mê in tòmdră mơ ală cau sò tơm bol mê dê mơ ai bol mê in bơta pha lin rlau.’

⁵ Ală cau kwang at bồ ling rơp đơs mơ mpồl ling lah; ‘Gơs cau lơi bơt dô nơm hìu pa mơ òhềt sa mut hìu pa sơl? Lòi tĕ khai rê hơ hìu khai, rngòt khai chơt tòm bơta tòmlơh mơ gơs cau lơi ndai rơp sa mut hìu pa hơ̆.

⁶ Gơs cau lơi pa tam dô nơm suơn ño mơ òhềt sa plai gơ sơl? Lòi tĕ khai rê hìu, rngòt khai chơt tòm tiah tòmlơh mơ gơs cau lơi ndai rơp sa gơ.

⁷ Gơs cau lơi neh tòmho bau mơ dô nă cau ùr mơ òhềt bau mơ khai sơl? Lòi tĕ khai in rê hìu, rngòt khai chơt tòm tiah tòmlơh mơ gơs cau ndai bau mơ ùr hơ̆.’

⁸ Lồc behơ̆, ală cau kwang dờng at bồ ling rơp đơs bơtơl lah: ‘Gơs cau lơi rngòt mơ gơdô nùs sơl? Lòi tĕ khai in rê hìu, tồ ală oh mi khai kung rơp ò gơdô nùs sơl.’

⁹ Tòm tŭ ală cau kwang dờng at bồ mpồl ling neh đơs mơ mpồl ling rau, gen bol khai rơp pồ bơtào ală cau kwang at bồ ling.

¹⁰ Tòm tŭ bol mê lòt tus brồ lơh dô nơm ƀòn dờng, lài ngan ai tĕ làng bol hơ̆ gơs tŭ nàng bơtào bơta ho bal ring lơngai.

¹¹ Dilah bol khai dòp jơnau mơ pò ală mpồng ƀòn dờng bol khai dê gen jơh làng bol tòm ƀòn dờng hơ̆ pal kong duh broă mơ lơh dĭ bol mê in.

¹² Dilah bol khai ò bài lơh bơta ho bal ring lơngai mơ bol khai lòi bol mê tòmlơh gen gơrwàng tĕ ƀòn dờng hơ̆.

¹³ Tòm tŭ Jehôwa Yàng Tom Trồ bol mê dê jào ƀòn dờng hơ̆ tòm tê bol mê gen ai đào tơnchơt jơh ală cau klau tòm hơ̆.

¹⁴ Ai đah mơ ală cau ùr, ală cau kòn, ală phan poan jơng mơ jơh ală phan ndai tòm ƀòn dờng gen bol mê rgơi cèng bol mê in lơh gơs phan tòmpìt geh tòm bơta tòmlơh.

¹⁵ Hơ̆ la bơta mơ bol mê pal lơh jat gơwèt mơ jơh ală ƀòn dờng ơm ngài bơh di bol mê mơ ò gơrê bal mơ ală làng bol ơm tềng do.

¹⁶ Bulah behơ̆, tòm ală ƀòn dờng gơrê bal mơ ală làng bol mơ Jehôwa Yàng Tom Trồ bol mê dê ai bol mê in lơh gơs sre brê gen bañ lòi kis dô nơm phan lơi tă nhơm.

¹⁷ Tơnroh tĕ jơh hir bol khai tòm toh jat be Jehôwa Yàng Tom Trồ bol mê dê neh sồr bol mê, hơ̆ la ală cau Hetit, cau Amôrit, cau Kanaan, cau Pherijit, cau Hibit, mơ cau Jebusit.

¹⁸ Behơ̆ bol khai rơp ò bơto bol mê lơh jat jơh ală bơta iơh rmơh cù kìr mơ bol khai lơh tòm bơta duh khoai ală yàng bol khai dê, mơ bol mê rơp tìs glài tòmdră mơ Jehôwa Yàng Tom Trồ bol mê dê.

¹⁹ Tòm tŭ bol mê gơrwàng gùt dar dô nơm ƀòn dờng tòm jŏ ngai, tòmlơh tòmdră mơ gơ mơ tòmpìt ai tĕ gơ, gen bañ ai sùng koh tơnroh ală chi che gơ dê, tài bơh bol mê rgơi sa plai gơ dê. Bañ koh tơnroh bol gơ. Ală chi che tòm ƀlàng ò di la kòn mơnus mơ bol mê pal gơrwàng bol gơ.

²⁰ Bulah behơ̆, bol mê mìng kơl ală chi mơ bol mê git ò di chi sa plai, mơ kơl gơ ngui lơh gơs phan bơt bơtào gơrwàng tòmdră mơ ƀòn lơh kơlìn mơ bol mê, jơl tus di tŭ gơtơrlơm jơh.”