Yal Wơl 2 - Sră Goh 2018

Lòt nrah nring tòm ƀlàng ngềt ngơt

¹ “Lồc behơ̆ bol he wơlke mơ lik lòt wèt hơ đah ƀlàng ngềt ngơt rò jat gùng lòt hơ Dàlềng Pơrhê, jat bơta Yàng Jehôwa neh tề lam añ. Tòm jŏ ngai, bol hi lòt gùt dar kơnhwàl mơnơm Seir dê.

² Gen Yàng Jehôwa đơs mơ añ lah:

³ ‘Mê neh lòt gùt dar lơgar kơh mơnơm do jŏ ngai rau, tŭ do pơrlac wèt tĕ mơ lòt hơ đah đang.

⁴ Ai tĕ làng bol in jơnau sồr do: Bol mê rơp lòt gan lơgar ală oh mi bol mê dê la ală kòn sau Esau dê ơm tòm Seir. Bol khai rơp rngòt di bol mê, mơya pal kơrhia tĕ.

⁵ Bañ bơrcek bol khai tòmlơh, bơh Añ ò ai bol mê in ù tiah lơi bol khai dê, bulah dô pet dềt tơl ơn dô mpàng jơng kung ò sơl. Añ neh ai Esau in mơnơm Seir lơh gơs lơgar tòm khai dê.

⁶ Bol mê pal rwat nàng geh phan sa mơ dà hùc bơh di bol khai.

⁷ Jehôwa Yàng Tom Trồ bol mê dê neh ai lơngai bol mê in tòm jơh ală broă tê bol mê neh lơh. Kơnràñ neh sền gàr gùng dà bol mê dê lòt gan ƀlàng ngềt ngơt dờng ơnàng do. Tòm poan jơt nam do Jehôwa Yàng Tom Trồ bol mê dê neh ơm bal mơ bol mê, mơ bol mê ò siơ̆u phan lơi ò.’

⁸ Behơ̆ bol hi kư̆ lòt gùng mơ pleh bơh dê ù tiah ală oh mi bol hi dê la ală kòn sau Esau ơm tòm Seir. Bol hi pơrlac bơh di gùng Arabah la gùng lòt guh hơ Elat mơ Ejiôn Geber, mơ lòt jat rò gah gùng ƀlàng ngềt ngơt Môap dê.

⁹ Gen Yàng Jehôwa đơs mơ añ lah: ‘Bañ lơh pơnjê di cau Môap hala bơrcek bol khai tòmlơh, bơh Añ ò ai bol mê in dô pơnah lơi tòm ù tiah bol khai dê. Añ neh ai Ar ală kòn sau Lot in lơh gơs sre brê.’

¹⁰ (Bơh lài ală cau Emim òs ơm tềng hơ̆, bol khai la dô nơm làng bol pràn kơldang mơ gal ngan, dờng jơnhoa kung be ală cau Anakim.

¹¹ Kung be ală cau Anakim, ală cau Emim kung geh kòp la ală cau Rephaim, mơya ală cau Môap sơnđan bol khai la cau Emim.

¹² Ală cau Hôrim òs ơm tòm Seir, mơya ală kòn sau Esau dê neh ting bơtrơh jơh bol hơ̆. Bol khai tơnroh ală cau Hôrim bơh di đap bol khai mơ mut ơm sùm tòm tiah bol hơ̆ dê, be Israel neh lơh tòm lơgar mơ Yàng Jehôwa neh ai bol khai in lơh gơs sre brê.)

¹³ Mơ Yàng Jehôwa đơs lah: ‘Tŭ do guh tĕ mơ lòt gan thòng Jeret.’ Behơ̆ bol hi lòt gan thòng hơ̆.

¹⁴ Pe jơt phàm nam neh rlau bơh di tŭ bol hi lik lòt bơh di Kades Barnea jơl tus di tŭ bol hi lòt gan thòng Jeret. Tus di tŭ hơ̆ gen jơh dô rài ală cau klau jak tòmlơh neh roh jơh bơh di sàl ơm jat be Yàng Jehôwa neh srat să mơ bol khai.

¹⁵ Tê Yàng Jehôwa neh tòmdră mơ bol khai jơl tus di tŭ Kơnràñ neh tơnroh jơh hir bol khai bơh di sàl ơm.

¹⁶ Mơ tai, tòm tŭ ală cau klau jak tòmlơh digùl làng bol neh chơt,

¹⁷ gen Yàng Jehôwa đơs mơ añ lah:

¹⁸ ‘Ngai do mê rơp lòt gan kơnhwàl Môap tòm Ar.

¹⁹ Tòm tŭ mê tus hơ ală cau Ammônit, bañ lơh bòl glar kalke di bol khai hala bơrcek bol khai tòmlơh, bơh Añ rơp ò ai bol mê in ù tiah lơi gơrê bal mơ cau Ammôn nàng lơh gơs sre brê bol mê dê. Añ neh ai lơgar hơ̆ ală kòn sau Lot in.’

²⁰ (Hơ̆ kung kòp la dô nơm lơgar gơrê bal mơ cau Rephaim neh òs ơm tềng hơ̆; mơya cau Ammôn sơnđan bol khai la cau Jamjummim.

²¹ Bol khai la dô nơm làng bol pràn kơldang mơ gal ngan, mơ dờng jơnhoa kung be ală cau Anakim. Yàng Jehôwa neh tơnroh bol khai bơh di đap ală cau Ammôn, ală cau do neh ting bơtrơh bol khai mơ mut ơm ala tòm tiah bol khai dê.

²² Yàng Jehôwa kung neh lơh behơ̆ ală kòn sau Esau in ơm tòm Seir, tòm tŭ Kơnràñ tơnroh ală cau Hôrim bơh di đap bol khai. Bol khai ting bơtrơh bol hơ̆ mơ neh ơm tòm tiah bol khai dê jơl tus di ngai do.

²³ Mơ đah pơnah mơ cau Abim ơm tòm ală ƀòn ngài tus di Gaja gen ală cau Kaptôrim lik lòt bơh di Kaptôr tơnroh bol khai mơ ơm tòm tiah bol khai dê.)

²⁴ ‘Tŭ do ñă ntào tĕ mơ tiă croh dà Arnôn. Do, Añ neh jào tòm tê bol mê bơtau Sihôn cau Amôrit tòm Hesbôn, mơ lơgar khai dê. Sơntòm tĕ ai lơgar lơh gơs sre brê, mơ rcang tòmlơh mơ khai.

²⁵ Tòm ngai do Añ rơp sơntòm tơndùh bơta rơm să mơ rngòt rngơt bơh bol mê hơđang jơh ală làng bol ơm hơđang plai ù. Bol khai rơp kơno ală jơnau yal bơh bol mê mơ bol khai rơp rơm să mơ kơlôi rngòt tài bơh bol mê.’”

Tòmlơh alah bơtau Sihôn

²⁶ “Bơh di ƀlàng ngềt ngơt Kedemôt Añ neh sồr ală cau kong sồr lòt tus hơ Sihôn bơtau Hesbôn dê nàng jòi bơta ring lơngai mơ đơs lah:

²⁷ ‘Lòi tĕ bol hi lòt gan lơgar bol mê dê. Bol hi rơp ơm tòm gùng me; bol hi rơp ò wèt đah ma hala đah kiau.

²⁸ Tac tĕ bol hi in phan nàng sa mơ dà nàng hùc jat khà priă gơ dê. Mìng lòi bol hi lòt gan lơgar bol mê dê lơm,

²⁹ kung be ală kòn sau Esau ơm tòm Seir, mơ ală cau Môap ơm tòm Ar neh lơh bol hi in, jơl tus di tŭ bol hi tiă Jordan mơ mut tòm lơgar mơ Jehôwa Yàng Tom Trồ bol hi dê ai bol hi in.’

³⁰ Mơya Sihôn bơtau Hesbôn ò bài lòi bol hi lòt gan lơgar khai dê. Bơh Jehôwa Yàng Tom Trồ bol mê dê neh lơh hwềng khai tòmdră mơ nùs khai kră kơldang tồ jào khai tòm tê bol mê dê tòm toh jat be Kơnràñ neh lơh rau.

³¹ Yàng Jehôwa đơs mơ añ lah: ‘Do, Añ rơp sơntòm jào Sihôn mơ lơgar khai dê mê in. Tŭ do tòmlơh tĕ mơ dòp geh lơgar khai dê.’

³² Tòm tŭ Sihôn mơ jơh dô mpồl ling khai dê lik lòt mơ tòmlơh mơ bol hi tòm Jahas,

³³ Jehôwa Yàng Tom Trồ bol mê dê neh jào khai hi in; mơ bol hi neh tơnchơt khai bal mơ ală kòn klau khai dê mơ jơh dô mpồl ling khai dê.

³⁴ Tòm tŭ hơ̆, bol hi tòmpìt ai jơh ală ƀòn dờng khai dê mơ tơnroh bol khai jơh hir, jơh ală cau klau, cau ùr mơ cau kơnòm. Bol hi ò lòi dô nă cau lơi gam kis.

³⁵ Mơya ală phan poan jơng mơ ală phan tòmpìt geh bơh di ală ƀòn dờng mơ bol hi neh tòmpìt ai gen bol hi tă cèng să tòm bol hi in.

³⁶ Bơh di Arôer di gah thòng Arnôn, mơ bơh di ƀòn dờng tòm thòng, tus tơn hơ Galaat, ò gơs dô nơm ƀòn dờng lơi la pràn kơldang rlau mơ bol hi. Jehôwa Yàng Tom Trồ bol he dê neh ai jơh ală bơta bol he in.

³⁷ Mơya jat be jơnau gơnoar sồr Jehôwa Yàng Tom Trồ bol hi dê, bol mê ò di tus rềp di ù tiah lơi gơrê bal mơ cau Ammôn, kung ò di tus rềp di lơgar ơm rò gah hiòng Japbok hala ù tiah gùt dar ală ƀòn dờng ơm hơđang ală kơh mơnơm.”