Yal Wơl 19 - Sră Goh 2018

Ală ƀòn dờng kìng crŭ

¹ “Tòm tŭ Jehôwa Yàng Tom Trồ bol mê dê neh tơnroh ală làng bol mơ ai bol mê in ù tiah, mơ bol mê neh ting bơtrơh bol khai mơ mut ơm tòm ală ƀòn dờng mơ hìu bol khai dê,

² gen lòi is tĕ bol mê in pe nơm ƀòn dờng ơm digùl ù tiah mơ Yàng Jehôwa neh ai bol mê in.

³ Pò ală gùng lòt tus hơ ală ƀòn dờng hơ̆, mơ tòmpà gơs pe pơnah ù tiah mơ Jehôwa Yàng Tom Trồ bol mê dê neh ai bol mê in lơh gơs sre brê, tồ cau lơi tơnchơt cau rgơi dô tus tềng hơ̆.

⁴ Do la bơta sồr lam bơh dô nă cau tơnchơt cau ntoat dô tus tềng hơ̆ nàng dong klàs bơta kis khai dê, la cau ò gơs nùs kòñ tơnchơt cau ơm rềp di khai, ò gơs bơta kơlôi sơnơng gơjrañ kơuềng lài.

⁵ Đơs pơnyơu kung be dô nă cau lòt tòm brê bal mơ cau ơm rềp di khai nàng koh lòng, mơ tòm tŭ khai yò sùng nàng kơl chi, mat sùng gơ sơntă bơh di ngkơr mơ gơ par tus di di să cau ơm rềp mơ khai mơ cau hơ̆ chơt. Khai rgơi dô tus hơ dô nơm tòm ală ƀòn dờng hơ̆ nàng dong klàs bơta kis khai dê.

⁶ Dilah ò behơ̆, cau sal tê bơh mhàm rgơi ting jat bàn khai tài bơh bơta gơjrañ, dilah gùng ntoat dô la ngài ngan, mơ tơnchơt khai bulah khai ò di pal kong tơnchơt, tài bơh khai lơh bơta hơ̆ ò di bơh nùs kơlôi lài kòñ tơnchơt.

⁷ Gen tàng añ sồr bol mê ơn is bol mê in pe nơm ƀòn dờng.

⁸ Dilah Jehôwa Yàng Tom Trồ bol mê dê pò ơnàng ù tiah lơgar bol mê dê, tòm toh jat be Kơnràñ neh srat să mơ ală ồng pàng bol mê dê, mơ ai bol mê in jơh dô nơm lơgar Kơnràñ neh ho mơ bol khai,

⁹ tài bơh bol mê neh kơrhia lơh jat jơh ală bơta boh lam mơ añ ai bol mê in tòm ngai do, hơ̆ la kòñ gơboh di Jehôwa Yàng Tom Trồ bol mê dê mơ sùm sùm lòt jat gùng dà Kơnràñ dê, gen bol mê pal ơn is pe nơm ƀòn dờng tai.

¹⁰ Lơh tĕ bơta do tồ mhàm ò gơs glài hơ̆ rơp ò gơtuh tòm lơgar bol mê dê la lơgar mơ Jehôwa Yàng Tom Trồ bol mê dê neh ai bol mê in lơh gơs sre brê, tồ bol mê rơp ò gơkòl glài bơh bơta lơh gơhòr mhàm.

¹¹ Mơya dilah dô nă cau gơjrañ kơuềng di cau ơm rềp mơ khai, kơp mòc nàng lơh mơ tơnchơt cau hơ̆, lồc behơ̆ ntoat dô tus hơ dô nơm tòm ală ƀòn dờng do,

¹² gen ală cau kwang kra tòm ƀòn dờng do rơp sồr cau kup khai, cèng brê khai wơl bơh di ƀòn dờng, mơ jào khai cau sal tê bơh mhàm in nàng tơnchơt.

¹³ Bañ nđàc di khai, bol mê pal rào goh glài lơh gơhòr mhàm ò gơs glài bơh di Israel, tồ ală bơta gơlik niam bol mê in.

¹⁴ Bañ ntròn pơnai lŭ nhàr ù tiah neh bơtào bơh ală cau neh ơm lài mơ bol mê, tòm sre brê mơ bol mê neh dòp geh, tòm lơgar mơ Jehôwa Yàng Tom Trồ bol mê dê ai bol mê in.

Ală cau lơh cơng tàng

¹⁵ Dô nă cau lơh cơng gen ò tơl nàng cahrña lơh nền glài dô nă cau gơkòl yă bơh dô nơm glài lơi hala dô bơta lơh tìs lơi mơ khai neh kòl. Dô bơta yă wơn pal geh cahrña lơh nền bơh jơnau lơh cơng bàr hala pe nă cau lơh cơng dê.

¹⁶ Dilah dô nă cau lơh cơng blac ñă ntào yă dô nă cau ndai bơh dô bơta tìs glài,

¹⁷ gen bàr nă cau hơ̆ pal ntào di đap mat Yàng Jehôwa mơ di đap ală cau gơnoar ơn phan duh khoai mơ ală cau kwang cahrña gơs gơnoar broă tòm tŭ hơ̆,

¹⁸ Ală cau kwang cahrña pal sền sơwì nền, mơ dilah cau lơh cơng la cau lơh cơng blac, yă blac tòmdră mơ oh mi khai dê,

¹⁹ gen lơh tĕ di khai tòm toh be khai kòñ lơh di oh mi khai dê. Bol mê pal tă sang bơta iơh bơsak bơh digùl bol mê.

²⁰ Jơh ală cau ndai rơp kơno bơh bơta do gen rngòt, mơ bơta iơh bơsak behơ̆ rơp ò gơs tŭ lơi gơlik gơs tai digùl bol mê.

²¹ Bañ yal tơlik bơta nđàc; bơta kis tơm bơta kis, mat tơm mat, sề tơm sề, tê tơm tê, jơng tơm jơng.”