Yal Wơl 18 - Sră Goh 2018

Gơnoar krơi is cau gơnoar ơn phan duh khoai mơ ală cau Lebi in

¹ Ală cau gơnoar ơn phan duh khoai la ală cau Lebi, jơh dô jơi bơtiàn cau Lebi di rơp ò gơs tă khà tòmpà ù tiah lơh gơs sre brê bal mơ Israel. Bol khai rơp sa ală phan ơn pơdơng gơrê mơ Yàng Jehôwa.

² Bol khai rơp ò gơs sre brê digùl ală oh mi bol khai dê, Yàng Jehôwa la sre brê bol khai dê jat be Kơnràñ neh ho mơ bol khai.

³ Do la pơnah gơrê mơ ală cau gơnoar ơn phan duh khoai bơh di làng bol la cau ơn dô nơm kơnrồ hala dô nơm belàt: pơnì, ală kàng, mơ ală phan dơlam.

⁴ Bol mê pal ai bol khai in ală plai bồ sơnam kòi mbo bol mê dê, tơrnòm pa mơ mơñà, mơ sơnò belàt siat dơ̆ sơnròp bơh di belàt bol mê dê,

⁵ bơh Jehôwa Yàng Tom Trồ bol mê dê neh sac rwah bol khai mơ ală kòn sau bol khai dê bơh di jơh ală jơi bơtiàn nàng bol khai ai sơnđan Yàng Jehôwa ntào duh broă di đap Kơnràñ sùm sùm.

⁶ Dilah dô nă cau Lebi tă cèng hìu khai dê bơh di dô nơm tòm ală ƀòn dờng bol mê dê tòm Israel la tiah khai ơm kis, mơ jơh nùs kòñ tus hơ tiah mơ Yàng Jehôwa rơp sac rwah.

⁷ Gen khai rgơi duh broă tòm sơnđan Jehôwa Yàng Tom Trồ bol khai dê kung be jơh ală oh mi cau Lebi khai dê ơm duh broă tềng hơ̆ di đap Yàng Jehôwa.

⁸ Khai rơp dòp geh pơnah phan sa ring bal bơh tòm ală phan ơn is bol khai in, ò kòp jền priă neh tac ală phan mơna gơrê bal mơ hìu nhă.

Bơkơŭ bơta juh proh, sền dà

⁹ Tòm tŭ bol mê mut tòm lơgar mơ Jehôwa Yàng Tom Trồ bol mê dê ai bol mê in, bañ bơtê đòm jat ală gùng dà iơh rmơh ală làng bol tềng hơ̆ dê.

¹⁰ Bañ gơs cau lơi digùl bol mê ơn kòn klau hala kòn ùr he dê tòm ồs, sền tê, sền dà

¹¹ tă khà, sền nha hala gơs gru bơjơu, hala hòi lùp hwềng cau chơt.

¹² Cau lơi lơh ală bơta do la iơh rmơh cù kìr di đap Yàng Jehôwa, mơ tài bơh ală broă lơh iơh rmơh cù kìr hơ̆ mơ Yàng Tom Trồ bol mê rơp ting bơtrơh ală làng bol do di đap bol mê.

¹³ Bol mê pal ò gơs tiah geh lah pơrhơng di đap Jehôwa Yàng Tom Trồ bol mê dê.

Cau gơnoar hwơr

¹⁴ Ală làng bol mơ bol mê rơp ting bơtrơh la ală làng bol dòn jat ală cau gru bơjơu hala cau sền dà. Mơya đah mơ bol mê, Jehôwa Yàng Tom Trồ bol mê dê ò ai gơnoar bol mê in lơh jat behơ̆.

¹⁵ Jehôwa Yàng Tom Trồ bol mê dê rơp bơtào tơngguh bol mê in dô nă cau gơnoar hwơr tòm toh kung be añ bơh digùl ală oh mi tòm bol mê dê. Bol mê pal iat jơnau khai dê.

¹⁶ Bơh do la bơta mơ bol mê neh dan mơ Jehôwa Yàng Tom Trồ bol mê dê tòm Hôrep tòm ngai pơjum dờng tòm tŭ bol mê neh đơs lah: “Bañ lòi bol hi ơm iat sap đơs Jehôwa Yàng Tom Trồ bol hi dê hala sền gŏ ồs dờng do tai, rngòt bol hi rơp chơt mòn!”

¹⁷ Yàng Jehôwa neh đơs mơ añ lah: “Bơta bol khai đơs la niam.

¹⁸ Añ rơp bơtào tơngguh bol khai in dô nă cau gơnoar hwơr tòm toh kung be mê bơh digùl ală oh mi bol khai dê; Añ rơp ơn ală jơnau đơs Añ jê tòm bơr khai dê, mơ khai rơp yal bol khai in kòp jơnau Añ sồr khai.

¹⁹ Dilah gơs cau lơi ò iat ală jơnau đơs Añ jê mơ cau gơnoar hwơr ai sơnđan mơ đơs, gen să tòm Añ rơp kup glài cau hơ̆.

²⁰ Mơya dô nă cau gơnoar hwơr lơi ai sơnđan mơ đơs jơnau lơi Añ ò sồr khai đơs, hala dô nă cau gơnoar hwơr lơi ai sơnđan ală yàng ndai mơ đơs gen pal kong tơnchơt.”

²¹ Digơlan bol mê rơp đơs is mơ să tòm bol mê lah: “Mbe rgơi bol hi git tòm tŭ gơs jơnau bơto yal ò đơs bơh Yàng Jehôwa taih?”

²² Dilah jơnau dô nă cau gơnoar hwơr ai sơnđan Yàng Jehôwa mơ bơto yal mơ jơnau hơ̆ ò gơlik gơs hala ò gơlik di ngan, hơ̆ la jơnau bơto yal mơ Jehôwa Yàng Tom Trồ ò gŏ đơs. Cau gơnoar hwơr hơ̆ neh đơs jat nùs is khai dê. Bañ rngòt di khai.