Yal Wơl 17 - Sră Goh 2018

¹ “Bol mê bañ ơn Jehôwa Yàng Tom Trồ bol mê in dô nơm kơnrồ hala dô nơm belàt gơs tềl sồt hala gơs dô bơta lơi ò niam, bơh bơta hơ̆ la dô bơta cù kìr Kơnràñ in.

² Dilah dô nă cau klau hala dô nă cau ùr ơm kis digùl bol mê tòm dô nơm ƀòn dờng mơ Yàng Jehôwa neh ai bol mê in gơkòl kup bơh neh lơh dô bơta iơh bơsak di đap Jehôwa Yàng Tom Trồ lơh tìs mơ bơta ho bal Kơnràñ dê,

³ duh khoai ală yàng ndai, mơ cùn khoai bol gơ hala mattơngai hala mat kơnhai hala ală sơmañ hơđang trồ, la ală bơta añ ò sồr,

⁴ mơ bơta hơ̆ neh gơs cau yal tus hơ mê gen mê pal sền sơwì nền cê bơta hơ̆. Dilah bơta hơ̆ la gơs ngan mơ neh gơs cơng tàng bơh bơta iơh rmơh cù kìr hơ̆ neh lơh gơlik gơs tòm Israel,

⁵ gen kup tĕ cau klau hala cau ùr neh lơh bơta iơh bơsak hơ̆ mơ cèng khai tus hơ mpồng ƀòn dờng dê mơ cơm lŭ tơnchơt khai.

⁶ Jat jơnau lơh cơng bàr hala pe nă cau dê gen sồng rgơi lơh glài tơnchơt dô nă cau, mơya bañ gơs cau lơi kong lơh glài tơnchơt tài bơh gơs mìng dô nă cau lơh cơng lơm.

⁷ Tê cau lơh cơng pal sơnròp ngan cơm lŭ tơnchơt cau hơ̆, lồc behơ̆ tus di tê jơh làng bol. Bol mê pal tă sang bơta iơh bơsak bơh digùl bol mê.

⁸ Dilah gơs ală bơta yă wơn cèng tus di đap ală tiah cahrña bol mê dê la ală bơta kalke oă ir nàng cahrña, bulah la bơta lơh gơhòr mhàm, bơta yă wơn bơh broă ndai hala bơta tòmlơh bal gen cèng tĕ ală bơta hơ̆ mo tus hơ tiah Jehôwa Yàng Tom Trồ bol mê dê rơp sac.

⁹ Lòt tĕ tus hơ ală cau gơnoar ơn phan duh khoai la ală cau Lebi, mơ tus hơ cau kwang cahrña gơs gơnoar cahrña tòm tŭ hơ̆. Hòi lùp tĕ bol khai mơ bol khai rơp cahrña bol mê in.

¹⁰ Bol mê pal lơh jat tòm toh mơ ală bơta lơh nền bol khai ai bol mê in tòm tiah Yàng Jehôwa rơp sac rwah. Kơrhia tĕ lơh jat kòp bơta bol khai sồr bol mê lơh.

¹¹ Lơh jat tĕ bơta boh lam bol khai bơto bol mê mơ ală bơta lơh nền bol khai ai bol mê in. Bañ pơrlac đah ma hala đah kiau bơh di ală bơta bol khai yal bol mê in.

¹² Cau lơi tòmdră ò dòn bơr cau kwang cahrña hala cau gơnoar ơn phan duh khoai ơm ntào tềng hơ̆ duh broă Jehôwa Yàng Tom Trồ bol mê dê gen cau hơ̆ pal kong tơnchơt. Bol mê pal tă sang bơta iơh bơsak bơh di Israel.

¹³ Jơh làng bol rơp kơno mơ rngòt, mơ ò khin jòng să tai.”

Cau bơtau

¹⁴ “Tòm tŭ bol mê mut tòm lơgar mơ Jehôwa Yàng Tom Trồ bol mê dê, ai bol mi in lơh gơs sre brê mơ ơm tơn tềng hơ̆, mơ bol mê đơs lah: ‘Bol he bơtào tĕ dô nă cau bơtau at bồ hơđang bol he kung be jơh ală làng bol ndai ơm gùt dar bol he,’

¹⁵ gen kơrhia lơh nền tĕ pồ bơtào cau bơtau mơ Jehôwa Yàng Tom Trồ bol mê dê rơp sac rwah. Khai pal la cau bơh digùl ală oh mi tòm bol mê dê. Bañ bơtào dô nă cau làng bơdìh hơđang bol mê, la dô nă cau ò di la oh mi tòm Israel.

¹⁶ Rlau mơ hơ̆, cau bơtau ò di bơt bơtào he in dô mpồl gal ngan ơseh hala sồr làng bol rê wơl hơ Ejiptơ nàng jòi bơtơl tai ơseh, bơh Yàng Jehôwa neh đơs mơ bol mê lah: ‘Bol mê ò di rê wơl gùng hơ̆ tai.’

¹⁷ Cau bơtau ò di gơs oă bau ùr, rngòt nùs khai dê rơp wèt hơ bơta tìs nrah. Khai ò di pơjum tơrgòm oă priă mơ màh.

¹⁸ Tòm tŭ khai nggui hơđang sơbàn lơgar khai dê, khai pal cih wơl tòm dô nơm sră pồt să tòm khai in bơta boh lam do bơh di ală cau gơnoar ơn phan duh khoai la ală cau Lebi.

¹⁹ Pồt sră hơ̆ pal ơm mơ khai, mơ khai pal sền sră pồt hơ̆ tòm jơh ală ngai rài kis khai dê nàng khai rgơi bơtê duh rngòt di Jehôwa Yàng Tom Trồ bol khai dê mơ kơrhia lơh jat jơh ală jơnau bơta boh lam do mơ ală bơta lơh nền gơ dê,

²⁰ mơ ò di sền să tòm khai la niam rlau mơ ală oh mi khai dê, wèt ma kiau mơ sang bơta boh lam. Behơ̆ khai mơ kòn sau khai dê rơp at bồ jŏ jòng hơđang lơgar khai dê tòm Israel.”