Yal Wơl 16 - Sră Goh 2018

Pơjum sa Lòt Gan

¹ Prap gàr tĕ kơnhai Abip mơ pơjum sa tĕ Bơta Pơjum Sa Lòt Gan Jehôwa Yàng Tom Trồ bol mê dê, tài bơh tòm kơnhai Abip Kơnràñ neh tă cèng bol mê lik bơh di Ejiptơ tòm trồ mang.

² Ơn tĕ phan ơn pơdơng Jehôwa Yàng Tom Trồ bol mê in dô nơm phan poan jơng bơh tòm mpồl kơnrồ hala belàt bol mê dê, di tiah Yàng Jehôwa rơp sac rwah lơh gơs tiah ơm sùm sơnđan Kơnràñ dê.

³ Bañ sa gơ mơ piang lă gơs kañ, mơya tòm poh ngai sa tĕ piang lă ò gơs kañ, la piang lă bòl glar jê sồt, tài bơh bol mê sang lòi Ejiptơ dô bă sơrbac sơrbang, tồ tòm jơh rài kis bol mê dê bol mê rgơi kah wơl tŭ jơ bol mê lik lòt bơh di Ejiptơ.

⁴ Bañ lòi kañ tòm ală phan mơna bol mê dê tòm jơh lơgar bol mê dê tòm poh ngai. Bañ lòi gam wơl jơl tus diàng hìng dô pet poac lơi bol mê ơn tòm mho ngai sơnròp.

⁵ Bol mê ò di ơn phan ơn Lòt Gan tòm dô nơm ƀòn dờng lơi mơ Jehôwa Yàng Tom Trồ bol mê dê ai bol mê in,

⁶ mìng ơn di tiah Kơnràñ rơp sac rwah lơh gơs tiah ơm sùm sơnđan Kơnràñ dê. Tềng hơ̆ bol mê pal ơn phan ơn Lòt Gan tòm trồ mho, tòm tŭ mattơngai mut, tòm ngai kah wơl ngai lik lòt bơh di Ejiptơ,

⁷ Buh tĕ gơ mơ sa gơ di tiah Jehôwa Yàng Tom Trồ bol mê dê rơp sac rwah. Gen tòm àng drim hìng rê wơl hơ ală sàl ơm bol mê dê.

⁸ Bơh tòm prau ngai sa piang lă ò gơs kañ mơ tòm ngai dơ̆ poh gen pơjum tĕ dô bơta pơjum bal Jehôwa Yàng Tom Trồ bol mê in mơ bañ lơh broă lơi.

Pơjum sa ală poh

⁹ Kòp tĕ poh nơm poh bơh di ngai bol mê rơp sơntòm ngui mơ̆ toès kòi.

¹⁰ Gen pơjum sa chò hòp tĕ Ngai Pơjum sa ală poh Jehôwa Yàng Tom Trồ bol mê dê mơ bơh nùs kòñ ơn Kơnràñ in dô nơm phan ơn duh khoai jat be ală bơta lơngai lơngò mơ Jehôwa Yàng Tom Trồ bol mê dê neh ai bol mê in.

¹¹ Mơ hòn chò tĕ di đap Jehôwa Yàng Tom Trồ bol mê dê di tiah Kơnràñ rơp sac rwah lơh gơs tiah ơm sùm sơnđan Kơnràñ dê; bol mê, ală kòn klau mơ ală kòn ùr bol mê dê, ală cau klau mơ ală cau ùr duh broă bol mê dê, ală cau Lebi ơm tòm ală ƀòn dờng bol mê dê, ală cau làng bol bơdìh, ală cau kòn đòi mơ ală cau ùr bơnrau ơm kis digùl bol mê.

¹² Kah tĕ lah bol mê neh la cau dĭ tòm Ejiptơ mơ kơrhia lơh jat tĕ ală bơta lơh nền do.

Pơjum sa Sàl Ing

¹³ Pơjum tĕ ngai pơjum sa ală Sàl Ing tòm poh ngai tơnơ̆ mơ tŭ bol mê neh pơjum tơrgòm ală phan neh gơs di làn jă kòi mơ di mpal pat tơrnòm ño bol mê dê.

¹⁴ Chò hòp tĕ tòm ngai pơjum sa bol mê dê, bol mê, ală kòn klau kòn ùr bol mê dê, ală cau klau cau ùr duh broă bol mê dê, ală cau Lebi, ală cau làng bơdìh, ală cau kòn đòi, mơ ală cau ùr bơnrau ơm kis tòm ală ƀòn dờng bol mê dê.

¹⁵ Tòm poh ngai, pơjum tĕ Ngai pơjum sa Jehôwa Yàng Tom Trồ bol mê dê di tiah mơ Yàng Jehôwa rơp sac rwah. Bơh Jehôwa Yàng Tom Trồ bol mê dê rơp ai lơngai lơngò bol mê in tòm jơh ală phan bol mê rơp toès mơ tòm jơh ală broă bol mê neh lơh, mơ bơta hòn chò bol mê dê rơp geh wil tơl.

¹⁶ Kòp nam pe dơ̆, jơh ală cau klau bol mê dê pal gơs mat di đap Jehôwa Yàng Tom Trồ bol mê dê di tiah Kơnràñ rơp sac rwah; di ngai pơjum sa Piang Lă Ò Gơs Kañ, ngai pơjum sa Ală Poh mơ ngai pơjum sa Sàl Ing. Bañ gơs cau lơi tus di đap Yàng Jehôwa mơ mpàng tê gòi.

¹⁷ Kòp nă bol mê pal cèng dô nơm phan ơn tòm toh jat be Jehôwa Yàng Tom Trồ bol mê dê neh ai lơngai bol mê in.

Ală cau kwang cahrña

¹⁸ Pồ bơtào tĕ ală cau kwang cahrña mơ ală cau kwang at bồ kòp jơi bơtiàn bol mê in tòm kòp nơm ƀòn dờng mơ Jehôwa Yàng Tom Trồ bol mê dê ai bol mê in, mơ bol khai rơp cahrña làng bol dô bă song ring.

¹⁹ Bañ lơh ò tòm toh mơ bơta song ring hala dong tò dô đah lơi. Bañ dòp phan loă, bơh phan loă lơh jơngo mat cau jak chài mơ lơh rkwet rkwe ală jơnau cau song ring dê.

²⁰ Lơh jat bơta song ring mơ mìng bơta song ring lơm, tồ bol mê rgơi ơm kis mơ dòp geh lơgar Jehôwa Yàng Tom Trồ bol mê dê ai bol mê in lơh gơs phan tòm.

Bơta duh khoai ală yàng ndai

²¹ Bañ bơtào gơs jrong mơ chi nàng duh khoai Asera di gah cơnòng duh khoai mơ bol mê bơtào Jehôwa Yàng Tom Trồ bol mê in.

²² Mơ bañ bơt bơtào mơ ơn is sàng goh dô pơnai lŭ duh khoai, bơh Jehôwa Yàng Tom Trồ bol mê dê gơjrañ kơuềng di bơta hơ̆.