Yal Wơl 15 - Sră Goh 2018

Nam toh ală dồs

¹ “Tòm tŭ lồi kòp poh nam gen bol mê pal toh ală dồs cau in.

² Do la bơta pal lơh: Kòp nă cau ai càn rơp toh dồs oh mi cau Israel khai in. Khai rơp ò lùp dồs cau Israel hala oh mi khai dê, tài bơh tŭ tơngai Yàng Jehôwa dê bơh bơta toh ală dồs neh geh yal tơlik.

³ Bol mê rgơi lùp dồs di dô nă cau làng bol bơdìh, mơya bol mê pal toh dồs lơi mơ oh mi bol mê dê neh kòl mơ oh mi.

⁴ Bulah behơ̆, rơp ò gơs cau rƀah lơòi digùl bol mê, tài bơh Jehôwa Yàng Tom Trồ bol mê dê ngan rơp ai lơngai bol mê in tòm lơgar mơ Yàng Tom Trồ bol mê dê neh ai bol mê in dòp lơh gơs sre brê,

⁵ mìng dilah bol mê dòn bơr Jehôwa Yàng Tom Trồ bol mê dê dô bă wil tơl, mơ kơrhia lơh jat jơh ală jơnau gơnoar sồr mơ añ neh ai bol mê in tòm ngai do.

⁶ Bơh Jehôwa Yàng Tom Trồ bol mê dê rơp ai lơngai bol mê in jat be Kơnràñ neh ho, mơ bol mê rơp ai oă làng bol in càn mơya bol mê rơp ò càn mơ làng bol lơi. Bol mê rơp at bồ hơđang oă làng bol mơya ò gơs làng bol lơi rơp at bồ hơđang bol mê.

⁷ Dilah digùl oh mi gơs dô nă cau rƀah lơòi tòm ƀòn dờng, tòm lơgar mơ Jehôwa Yàng Tom Trồ bol mê dê ai bol mê in, gen bañ lơh kơldang nùs hala oañ kơnềs sềt pơniă gơwèt hơ oh mi rƀah lơòi bol mê dê.

⁸ Mơya pò tĕ tê mơ ai khai in càn jat be phan lơi khai pal càng.

⁹ Kơrhia tĕ bañ prap bơta kơlôi sơnơng iơh do: ‘Nam dơ̆ poh la nam toh jơh ală dồs rơp tus rềp,’ mơ bol mê ò yal tơlik nùs iơh gơwèt hơ oh mi siơ̆u siar bol mê dê mơ ò dong bol khai phan lơi. Bol khai rơp hòi lùp Yàng Jehôwa tòmdră mơ bol mê mơ bol mê rơp gơkòl àñ glài.

¹⁰ Ai tĕ khai in dô bă sơrmah sơrmài mơ bañ sềt nùs tòm tŭ lơh bơta hơ̆; tài bơh bơta hơ̆ Jehôwa Yàng Tom Trồ bol mê dê rơp ai lơngai bol mê in tòm jơh ală bơta mơ tòm jơh ală broă tê bol mê lơh.

¹¹ Rơp gơs sùm ală cau rƀah lơòi tòm lơgar. Gen tàng añ ai jơnau sồr bol mê pal pò tê gơwèt hơ ală oh mi bol mê dê, mơ gơwèt hơ ală cau rƀah siơ̆u siar tòm lơgar bol mê dê.”

Hồ toh khat gơboh ală cau duh broă

¹² “Dilah dô nă oh mi cau Hebrơ, cau klau hala cau ùr, tac să tòm khai dê bol mê in mơ duh broă bol mê tòm prau nam, tòm nam dơ̆ poh bol mê pal hồ toh khai in geh khat gơboh.

¹³ Mơ tòm tŭ bol mê hồ toh khai, bañ lòi khai lik lòt mpàng tê gòi.

¹⁴ Ai tĕ khai in bơh tòm mpồl phan poan jơng, bơh tòm làn jă kòi bol mê dê hala bơh di mpal pat tơrnòm ño bol mê dê jat be khai pal càng. Ai tĕ khai in kung be Jehôwa Yàng Tom Trồ bol mê neh ai lơngai bol mê in.

¹⁵ Kah tĕ lah bol mê la cau ơm dĭ tòm Ejiptơ mơ Jehôwa Yàng Tom Trồ bol mê dê neh dong tơwài bol mê. Tài bơh hơ̆ tàng añ ai bol mê in jơnau gơnoar sồr do tòm ngai do.

¹⁶ Mơya dilah cau duh broă bol mê dê đơs mơ bol mê lah: ‘Añ ò bài sang lòi ồng,’ tài bơh khai kòñ gơboh di bol mê mơ hìu nhă bol mê dê mơ neh niam nùs ơm duh broă bol mê,

¹⁷ gen ai tĕ dô nơm nsồc cuh bluh tồr khai di mpồng hìu, mơ khai gơlik gơs cau duh broă bol mê dê jơl jơh rài kis khai dê. Lơh tĕ ndròm bal behơ̆ gơwèt hơ cau ùr duh broă bol mê dê.

¹⁸ Bañ sền be kalke tòm tŭ bol mê hồ toh khat gơboh dô nă cau duh broă bol mê dê, tài bơh bơta khai duh broă bol mê in tòm prau nam la màng rlau bàr dơ̆ mơ jền tơngai ơpah dô nă cau lơh broă. Mơ Jehôwa Yàng Tom Trồ bol mê dê rơp ai lơngai bol mê in tòm jơh ală broă lơh bol mê dê.”

Ală kòn tơnhoa phan poan jơng dê

¹⁹ “Ơn is tĕ Jehôwa Yàng Tom Trồ bol mê in kòp nơm kòn tơnhoa dam tòm ală mpồl kơnrồ mơ ală mpồl belàt bol mê dê. Bañ kup ală kòn tơnhoa ală kơnrồ bol mê dê lơh broă, mơ bañ siat sơnò kòn tơnhoa belàt bol mê dê.

²⁰ Kòp nam bol mê mơ hìu nhă bol mê dê pal sa bol gơ di đap Jehôwa Yàng Tom Trồ bol mê dê, di tiah mơ Kơnràñ rơp sac rwah.

²¹ Dilah dô nơm phan poan jơng gơs tềl sồt, pă jơng hala jơngo mat, hala gơs tềl sồt rmàñ lơi kơnjơ̆ gen bol mê bañ ơn gơ Jehôwa Yàng Tom Trồ bol mê in.

²² Bol mê pal sa gơtòm ƀòn tòm bol mê dê. Ală cau ò goh mơ ală cau goh rgơi sa gơ, kung be sa poac il hala jùn.

²³ Mơya bol mê bañ sa mhàm; tuh tĕ tòm ù kung be tuh dà.”