Yal Wơl 14 - Sră Goh 2018

Phan sa goh mơ ò goh

¹ “Bol mê la kòn sau Jehôwa Yàng Tom Trồ bol mê dê. Bañ koh să tòm bol mê dê hala koah đah đap bồ bol mê dê bơh cau neh chơt,

² bơh bol mê la dô nơm làng bol goh Jehôwa Yàng Tom Trồ bol mê in. Yàng Jehôwa neh sac rwah bol mê bơh digùl jơh ală làng bol hơđang plai ù nàng lơh gơs phan tòm kas màng Kơnràñ dê.

³ Bañ sa phan lơi ƀơ̆ ƀơl cù kìr.

⁴ Do la ală phan poan jơng mơ bol mê rgơi sa poac: kơnrồ, belàt, be,

⁵ jùn, il, be brê, belàt brê.

⁶ Bol mê rgơi sa poac phan poan jơng lơi gơs nđias sơmbah mơ bàr pơnah wil tơl mơ tơrging wơl.

⁷ Bulah behơ̆, tòm mpồl ală phan poan jơng tơrging wơl mơ gơs nđias cah bàr wil tơl, gen bol mê ò di sa poac làkđa, tơrpài ròng tòm hìu hala tơrpài tòm brê. Bulah bol gơ tơrging wơl, bol gơ ò gơs nđias cah bàr; bol gơ la ò goh bol mê in jat bơta sồr lam duh khoai dê.

⁸ Sur kung ò goh bulah gơ gơs nđias cah bàr, gơ ò tơrging wơl. Bol mê ò di sa poac bol gơ hala ƀư di ƀồc chơt gơ dê.

⁹ Bơh jơh ală phan neh geh crơng gơs ơm kis tòm dà, bol mê rgơi sa poac phan lơi gơs sơnòr mơ ngkàp.

¹⁰ Mơya phan lơi ò gơs sơnòr mơ ngkàp gen bol mê ò di sa poac; gơ la ò goh bol mê in.

¹¹ Bol mê rgơi sa poac sềm lơi goh.

¹² Mơya do la ală jơi sềm mơ bol mê ò di sa poac: klàng, klàng bung, klàng bung jù,

¹³ klàng pơrhê, klàng jù, mơ ală jơi klàng ndai,

¹⁴ ală jơi kơnđà,

¹⁵ klàng bơkào, klàng sơnò be ngke, ală jơi klàng sa iar,

¹⁶ klàng dềt, klàng dờng, klàng kò,

¹⁷ klàng tòm ƀlàng ngềt ngơt, klàng đàr ka,

¹⁸ klàng jòng ngko, ală jơi klàng ndai, mơ rềt.

¹⁹ Jơh ală tu rhài gơ par la ò goh bol mê in, bañ sa poac gơ.

²⁰ Mơya ală phan par neh geh crơng gơs la goh gen bol mê rgơi sa poac gơ.

²¹ Bañ sa phan lơi bol mê bàn neh chơt rau. Bol mê rgơi ai gơ dô nă cau làng bơdìh in ơm tòm dô nơm ƀòn dờng bol mê dê, mơ khai rgơi sa poac gơ, hala bol mê rgơi tac gơ mơ dô nă cau làng bơdìh. Mơya bol mê la dô làng bol sàng goh Jehôwa Yàng Tom Trồ bol mê in. Bañ gơm dô nơm be kòn tòm dà toh mè gơ dê.”

Ală phan ơn pơnah jơt

²² Lơh nền tĕ ơn is dô pơnah jơt tòm jơh phan gơlik gơs bơh di ƀlàng sre bol mê dê kòp nam.

²³ Sa tĕ pơnah jơt ală kòi mbo bol mê dê, tơrnòm pa mơ mơñà, mơ kòn tơnhoa tòm ală mpồl kơnrồ mơ ală mpồl belàt bol mê dê di đap mat Jehôwa Yàng Tom Trồ bol mê dê, tòm tiah Kơnràñ rơp sac rwah lơh gơs tiah ơm sơnđan Kơnràñ dê, nàng bol mê rgơi bơtê duh rngòt Jehôwa Yàng Tom Trồ bol mê dê sùm sùm.

²⁴ Mơya dilah tòm tŭ Jehôwa Yàng Tom Trồ neh ai lơngai bol mê in, mơ tiah hơ̆ la ngài ir ò rgơi cèng pơnah jơt bol mê dê, tài bơh tiah mơ Yàng Jehôwa neh sac rwah nàng ơn sơnđan Kơnràñ dê la ngài ir bơh di bol mê,

²⁵ gen tòmgơl tĕ pơnah jơt bol mê dê gơlik priă, mơ cèng priă hơ̆ bal mơ bol mê mơ lòt tus hơ tiah Jehôwa Yàng Tom Trồ bol mê dê rơp sac rwah.

²⁶ Ngui priă hơ̆ nàng blơi phan lơi bol mê kòñ: phan poan jơng, belàt, tơrnòm hala phan ñô ndai gơs kañ hala phan lơi bol mê kòñ blơi. Lồc behơ̆ bol mê mơ hìu nhă bol mê dê rơp sa tềng hơ̆ mơ hòn chò di đap mat Jehôwa Yàng Tom Trồ bol mê dê.

²⁷ Bañ lòi hŭi ală cau Lebi ơm tòm ală ƀòn dờng bol mê dê, bơh bol khai ò geh phan tă khà tòmpà hala sre brê lơh gơs phan tòm bol khai dê.

²⁸ Tòm tŭ kòp pe nam gen cèng tĕ jơh ală pơnah jơt bơh ală phan neh gơs tòm nam hơ̆ mơ prap gàr tòm ală ƀòn dờng bol mê dê,

²⁹ tồ ală cau Lebi, bơh bol khai la ală cau ò geh tòmpà ù tiah hala sre brê lơh gơs phan tòm bol khai dê, mơ ală cau làng bơdìh, ală kòn đòi mơ ală cau ùr bơnrau ơm kis tòm ală ƀòn dờng bol mê dê rgơi tus mơ sa mơ geh hòm lai, mơ geh Jehôwa Yàng Tom Trồ bol mê dê ai lơngai bol mê in tòm jơh ală broă tê bol mê lơh.