Yal Wơl 13 - Sră Goh 2018

Duh khoai ală yàng ndai

¹ Dilah digùl oh mi gơs dô nă cau gơnoar hwơr, hala dô nă cau đơs lài kơnòm di ală bơta mpau, tơlik mat digùl bol mê mơ bơto yal bol mê in dô nơm tềl is hala bơta krơi,

² mơ dilah tềl is hala bơta krơi mơ khai neh đơs gơlik gơs di ngan, mơ khai đơs lah: “Bol he lòt tĕ jat ală yàng ndai” (la ală yàng mơ bol mê ò git), “mơ bol he duh khoai tĕ bol gơ,”

³ gen bol mê ò di iat ală jơnau cau gơnoar hwơr hala cau mpau hơ̆. Bơh Jehôwa Yàng Tom Trồ bol mê dê kòñ lòng bol mê nàng git bol mê jơh nùs mơ jơh hwềng soàn kòñ gơboh di Kơnràñ hala ò.

⁴ Jehôwa Yàng Tom Trồ la Bơtau bol mê pal lòt jat, mìng Kơnràñ bol mê pal rngòt, gơnoar sồr Kơnràñ dê bol mê pal prap, jơnau đơs Kơnràñ dê bol mê pal dòn bơr, bol mê rơp duh broă Kơnràñ, mơ ơm kơ̆ mơ Kơnràñ.

⁵ Cau gơnoar hwơr hala cau gơs mpau hơ̆ pal kong tơnchơt, tài bơh khai bơto tòmdră mơ Jehôwa Yàng Tom Trồ bol mê dê, la Bơtau neh tă cèng bol mê lik bơh di Ejiptơ mơ tơwài bol mê bơh di lơgar ơm dĭ, khai neh lòng pơrlac bol mê bơh di gùng Jehôwa Yàng Tom Trồ bol mê dê neh sồr bol mê lòt jat. Bol mê pal tă sang bơta iơh bơsak bơh digùl bol mê.

⁶ Dilah oh mi tòm bol mê dê, hala kòn klau kòn ùr bol mê dê, hala bau ùr mê kòñ gơboh, hala cau bơyô đềt mềr rlau jơh bol mê dê ơniai òm bol mê mơ đơs lah: “Bol he lòt tĕ duh khoai ală yàng ndai,” la ală yàng mơ bol mê mơ ală ồng pàng bol mê dê kung ò git,

⁷ ală yàng ală làng bol ơm gùt dar bol mê, bulah ơm rềp hala ơm ngài, bơh đah do nhàr tus hơ đah ne nhàr lơgar,

⁸ bañ lòt jat khai hala iat jơnau khai dê. Bañ yal tơlik bơta kòñ nđàc di khai. Bañ pơlai khai hala sền gàr khai.

⁹ Ngan la bol mê pal tơnchơt khai. Tê bol mê dê rơp lài ngan tơnchơt khai, lồc behơ̆ tus di tê jơh làng bol.

¹⁰ Cơm tĕ lŭ tơnchơt khai, tài bơh khai neh lòng pơrlac bol mê sang Jehôwa Yàng Tom Trồ bol mê dê la Bơtau neh tă cèng bol mê lik lòt bơh di Ejiptơ, bơh di lơgar ơm dĭ.

¹¹ Gen jơh Israel rơp kơno mơ rngòt, mơ ò gơs dô nă cau lơi digùl bol mê rơp lơh dô bơta iơh behơ̆ tai.

¹² Dilah bol mê kơno jơnau yal bơh dô nơm tòm ală ƀòn dờng mơ Jehôwa Yàng Tom Trồ bol mê ai bol mê in kis tòm hơ̆,

¹³ la neh gơs ală cau iơh bơsak bơtào tơngguh digùl bol mê, mơ neh tề lam làng bol ƀòn dờng bol khai dê lòt tìs nrah bơh đơs lah: “Bol he lòt lă mơ duh khoai ală yàng ndai,” la ală yàng bol mê ò git,

¹⁴ gen bol mê pal jòi lùp mơ sền sơwì nền cê. Mơ dilah jơnau hơ̆ la ngan mơ neh gơs cơng tàng la bơta iơh rmơh cù kìr hơ̆ neh lơh gơs digùl bol mê,

¹⁵ gen ngan la bol mê pal sreh tơnchơt jơh ală cau ơm tòm ƀòn dờng hơ̆. Tơnroh tĕ jơh hir làng bol mơ phan poan jơng bol khai dê.

¹⁶ Pơjum tơrgòm jơh ală phan tòmpìt geh tòm ƀlàng pơjum làng bol mơ ai ồs chu tơnroh jơh hir ƀòn dờng bal mơ jơh ală phan tòmpìt geh gơ dê lơh gơs dô nơm phan ơn chu pơrguc Jehôwa Yàng Tom Trồ bol mê in. Ƀòn dờng do pal sang lòi tơrlah tơrling gam sùm sùm, ò gơs tŭ lơi geh bơt bơtào wơl.

¹⁷ Ò gơs dô nơm phan lơi tòm ală phan neh gơkòl sang lòi tơnroh geh jòi bàn tòm tê bol mê dê tồ Yàng Jehôwa rơp tòmgơl bơta gơjrañ dờng Kơnràñ dê mơ Kơnràñ rơp yal tơlik bơta nđàc bol mê in, gơs nùs kòñ nđàc di bol mê mơ lơh khà làng bol bol mê dê geh gơbơtơl oă tòm toh jat be Kơnràñ neh ho pơgon mơ ală ồng pàng bol mê dê,

¹⁸ tài bơh bol mê dòn bơr Jehôwa Yàng Tom Trồ bol mê dê, prap gàr jơh ală jơnau sồr Kơnràñ dê mơ añ ai bol mê in tòm ngai do mơ lơh bơta di ngan di đap mat Kơnràñ dê.