Yal Wơl 12 - Sră Goh 2018

Mìng dô bă tiah duh khoai

¹ Do la ală jơnau lơh nền mơ ală bơta boh lam mơ bol mê pal kơrhia lơh jat tòm pah rài mơ bol mê kis tòm lơgar mơ Jehôwa Yàng Tom Trồ ală ồng pàng bol mê dê, neh ai bol mê in dòp geh lơh gơs phan tòm.

² Tơnroh jơh hir ală tiah hơđang ală mơnơm jòng, hơđang ală mơnơm dềt mơ hơđơm ală tòm chi gơs mƀur dờng la tiah ală làng bol duh khoai ală yàng bol khai dê mơ bol mê rơp tơnroh.

³ Pòng tơrlah ală cơnòng duh khoai bol khai dê, jan bơcah ală pơnai lŭ duh khoai bol khai dê, mơ chu tòm ồs ală jrong duh khoai Asera bol khai dê; koh sang ală rùp ràk ală yàng bol khai dê mơ jùt jơh ală sơnđan bol gơ dê bơh di ală tiah hơ̆.

⁴ Bol mê ò di duh khoai Jehôwa Yàng Tom Trồ bol mê dê jat gùng bol khai dê.

⁵ Mơya bol mê pal jòi jat tiah mơ Jehôwa Yàng Tom Trồ bol mê dê rơp sac rwah bơh digùl jơh ală jơi bơtiàn bol mê dê nàng ơn sơnđan Kơnràñ dê tềng hơ̆ lơh gơs tiah ơm sùm Kơnràñ dê. Bol mê pal lòt tus tiah hơ̆;

⁶ tềng hơ̆ bol mê cèng ală phan ơn chu pơrguc mơ ală phan ơn duh khoai, ală pơnah jơt mơ ală phan ơn ndai, bơta bol mê neh ho ơn mơ ală phan ơn jat nùs kòñ mơ kòn tơnhoa tòm ală mpồl kơnrồ mơ ală mpồl belàt bol mê dê.

⁷ Tềng hơ̆, di đap mat Jehôwa Yàng Tom Trồ bol mê dê, bol mê mơ ală hìu nhă bol mê dê rơp sa mơ rơp hòn chò bơh jơh ală phan mơ tê bol mê neh lơh gơs, tài bơh Yàng Jehôwa neh ai lơngai bol mê in.

⁸ Bol mê bañ lơh kung be bol he lơh tềng do tòm ngai do, kòp nă jat bơta hàm kòñ is khai dê,

⁹ bơh bol mê òhềt tus di tiah ơm rlô mơ sre brê Jehôwa Yàng Tom Trồ bol mê dê ai bol mê in.

¹⁰ Mơya bol mê rơp tiă Jordan, mơ ơm tòm lơgar mơ Jehôwa Yàng Tom Trồ bol mê dê ai bol mê in lơh gơs sre brê, Kơnràñ rơp ai bol mê in rlô bơh di jơh ală cau sò tơm gùt dar bol mê tồ bol mê in rơp kis ring lơngai.

¹¹ Gen gơwèt hơ tiah mơ Jehôwa Yàng Tom Trồ bol mê dê rơp sac rwah lơh gơs tiah ơm sùm sơnđan Kơnràñ dê, bol mê rơp cèng tus tềng hơ̆ jơh ală phan mơ añ sồr bol mê: hơ̆ la ală phan ơn chu pơrguc mơ ală phan ơn duh khoai, ală phan pơnah jơt mơ phan ơn jat nùs kòñ, mơ jơh ală phan is bol mê sac rwah neh ho pơgon ơn Yàng Jehôwa in.

¹² Mơ tềng hơ̆ hòn chò tĕ di đap Jehôwa Yàng Tom Trồ bol mê dê, bol mê, ală kòn klau mơ kòn ùr bol mê dê, ală cau klau cau ùr duh broă bol mê dê, mơ ală cau Lebi bơh di ală ƀòn dờng bol mê dê, la ală cau ò geh tòmpà ù tiah hala sre brê lơh gơs phan tòm bol khai dê.

¹³ Kơrhia tĕ bañ ơn ală phan ơn chu pơrguc bol mê dê tòm tiah lơi bol mê kòñ ơn.

¹⁴ Ơn tĕ ală phan ơn hơ̆ di tiah mơ Yàng Jehôwa rơp sac rwah bơh di dô bă tiah tòm ală jơi bơtiàn bol mê dê, mơ tềng hơ̆ prap gàr lơh jat jơh ală bơta añ sồr bol mê.

¹⁵ Bulah behơ̆, bol mê rgơi sreh chơt ală phan poan jơng bol mê dê tòm dô nơm ƀòn dờng digùl ală ƀòn dờng bol mê dê mơ sa poac gơ kàr lơi bol mê kòñ sa, kung be sa poac jùn hala il, jat bơta lơngai lơngò mơ Yàng Jehôwa ai bol mê in. Ală cau neh geh goh jat bơta boh lam duh khoai dê bal mơ cau ò geh kung rgơi sa gơ.

¹⁶ Mơya bol mê ò di sa mhàm; tuh tĕ gơtòm ù kung be tuh dà.

¹⁷ Bol mê ò di sa tòm ală ƀòn tòm bol mê dê ală phan ơn pơnah jơt bơh kòi mbo bol mê dê, tơrnòm pa mơ mơñà, hala kòn tơnhoa mpồl kơnrồ mơ belàt bol mê dê, hala phan lơi mơ bol mê neh ho ơn, hala ală phan ơn jat nùs kòñ hala ală phan ơn ndai,

¹⁸ Gơpơrlơ̆ wơl, bol mê pal sa ală phan hơ̆ di đap mat Jehôwa Yàng Tom Trồ bol mê dê tòm dô bă tiah mơ Jehôwa Yàng Tom Trồ bol mê dê rơp sac rwah, bol mê, ală kòn klau mơ ală kòn ùr bol mê dê, ală cau klau mơ ală cau ùr duh broă bol mê dê, mơ ală cau Lebi bơh di ală ƀòn dờng bol mê dê, mơ bol mê rơp hòn chò di đap Jehôwa Yàng Tom Trồ bol mê dê bơh jơh ală phan mơ tê bol mê neh lơh gơs.

¹⁹ Kơrhia tĕ bañ lòi hŭi ală cau Lebi tòm jơh ală tŭ tơngai mơ bol mê gam kis tòm lơgar.

²⁰ Tòm tŭ Jehôwa Yàng Tom Trồ bol mê dê neh pò ơnàng lơgar bol mê dê jat be Kơnràñ neh ho mơ bol mê, mơ bol mê kòñ sa poac mơ đơs lah: “Añ kòñ sa poac,” Gen bol mê rgơi sa jat nùs bol mê kòñ sa.

²¹ Dilah tiah mơ Jehôwa Yàng Tom Trồ bol mê dê sac rwah nàng ơn sơnđan Kơnràñ la ngài ir bơh di tiah bol mê ơm, bol mê rgơi lơh poac ală phan poan jơng bơh di ală mpồl kơnrồ mơ ală mpồl belàt mơ Yàng Jehôwa neh ai bol mê in, tòm toh be jơnau añ neh sồr bol mê, mơ tòm ƀòn tòm bol mê dê bol mê rgơi sa jat nùs bol mê kòñ.

²² Sa tĕ ală phan hơ̆ be bol mê sa jùn hala il. Cau ò geh goh jat bơta sồr lam duh khoai mơ cau geh goh rgơi sa gơ.

²³ Mơya lơh nền tĕ lah bol mê bañ sa mhàm, tài bơh mhàm la bơta kis, gen bol mê bañ sa poac bal mơ bơta kis.

²⁴ Bol mê ò di sa mhàm; tuh tĕ gơtòm ù kung be tuh dà.

²⁵ Bañ sa gơ tồ ală bơta rơp gơlik niam bol mê in mơ ală kòn sau tus tơnơ̆ mơ bol mê, tài bơh bol mê pal lơh bơta di ngan di đap mat Yàng Jehôwa.

²⁶ Mơya ai tĕ ală phan neh ơn is sàng goh bol mê dê mơ phan lơi bol mê neh ho ơn Yàng in, mơ lòt tus hơ tiah mơ Yàng Jehôwa rơp sac rwah.

²⁷ Ơn tĕ ală phan ơn chu pơrguc bol mê dê hơđang cơnòng duh khoai Jehôwa Yàng Tom Trồ bol mê dê, poac bal mơ mhàm. Mhàm phan ơn duh khoai bol mê dê pal tuh di gah cơnòng duh khoai Jehôwa Yàng Tom Trồ bol mê dê, mơya bol mê rgơi sa poac.

²⁸ Kơrhia tĕ dòn bơr lơh jat jơh ală bơta sồr lam do mơ añ ai bol mê in tồ ală bơta rgơi gơlik gơs niam sùm sùm bol mê in mơ ală kòn sau tơnơ̆ mơ bol mê, tài bơh bol mê rơp pal lơh bơta niam mơ di ngan di đap mat Jehôwa Yàng Tom Trồ bol mê dê.

²⁹ Jehôwa Yàng Tom Trồ bol mê dê rơp tơnroh di đap bol mê ală lơgar mơ bol mê rơp tòmpìt mơ tơnroh. Mơya tòm tŭ bol mê neh ting bơtrơh bol khai mơ mut ơm tòm lơgar bol khai dê,

³⁰ mơ tơnơ̆ mơ tŭ bol khai neh kong tơnroh bơh di đap bol mê, kơrhia tĕ nàng ò yar dă bơh bơta jòi lùp ală yàng bol khai dê mơ lah: “Ală làng bol do duh broă ală yàng bol khai dê mbe lơi taih? Bol he kung rơp lơh ndròm bal behơ̆ sơl.”

³¹ Bol mê ò di duh khoai Jehôwa Yàng Tom Trồ bol mê dê jat gùng bol khai dê, tài bơh tòm tŭ duh khoai ală yàng bol khai dê gen bol khai kung lơh jơh ală bơta cù kìr iơh rmơh mơ Yàng Jehôwa gơjrañ. Bol khai chu ală kòn klau kòn ùr bol khai dê tòm ồs lơh gơs phan ơn ală yàng bol khai in.

³² Bol mê kơrhia tĕ lơh jat jơh ală jơnau añ sồr bol mê; bañ bơtơl jơnau lơi hala tă pơndut jơnau lơi bơh di gơ.