Yal Wơl 11 - Sră Goh 2018

Kòñ gơboh mơ dòn bơr Yàng Jehôwa

¹ Kòñ gơboh tĕ Jehôwa Yàng Tom Trồ bol mê dê mơ prap gàr ală gơnoar broă Kơnràñ jào, ală bơta lơh nền Kơnràñ dê, ală bơta boh lam Kơnràñ dê mơ ală jơnau sồr Kơnràñ dê.

² Kah tĕ tòm ngai do lah ală kòn sau bol mê dê ò di la ală cau neh gŏ mơ git làm bơta lơh glài tơmàl Jehôwa Yàng Tom Trồ bol mê dê; mơya bol mê la ală cau pal dòp git bơta dờng ryŭ Kơnràñ dê, mpàng tê gơnap gơnoar Kơnràñ dê, tơwòr tê pò tơlik Kơnràñ dê,

³ ală tềl is mơ ală broă Kơnràñ neh lơh tòm Ejiptơ tòmdră mơ Pharaôn bơtau Ejiptơ mơ jơh lơgar khai dê;

⁴ bơta Kơnràñ neh lơh di mpồl ling Ejiptơ, di ală ơseh mơ ală rơndeh lòs tòmlơh gơ dê, mbe Kơnràñ tơnkram bol khai tòm Dàlềng Pơrhê tòm tŭ bol khai ting jat bol mê, mơ mbe Yàng Jehôwa neh tơndùh bơta tơnroh bol khai tus ngai do.

⁵ Ò di la ală kòn sau bol mê dê neh sền gŏ ală bơta mơ Kơnràñ neh lơh bol mê in tòm ƀlàng ngềt ngơt jơl tus di tŭ bol mê neh tus tòm tiah do,

⁶ mơ bơta Kơnràñ neh lơh di Dathan mơ Abiram, ală kòn klau Eliap sau Ruben dê, tòm tŭ ù ha bơr sa loan bol khai bal mơ hìu nhă bol khai dê, ală sàl ơm bol khai dê bal mơ jơh ală phan kis gơrê bal mơ bol khai di đap mat jơh ală cau Israel.

⁷ Mơ hơ̆ la mat tòm bol mê dê neh gŏ jơh ală broă dờng mơ Yàng Jehôwa neh lơh.

⁸ Gen tàng, prap gàr mơ lơh jat jơh ală jơnau sồr mơ añ ai bol mê in tòm ngai do, tồ bol mê rgơi gơs bơta pràn kơldang nàng mut mơ dòp lơgar mơ bol mê rơp tiă Jordan nàng dòp leng,

⁹ tồ bol mê rgơi kis jŏ tòm lơgar mơ Yàng Jehôwa neh srat să mơ ală ồng pàng bol mê dê, ai bol khai in mơ ală kòn sau bol khai in; hơ̆ la dô nơm lơgar hòr lik dà toh mơ dà lơwe.

¹⁰ Lơgar mơ bol mê rơp mut mơ tòmpìt ai ò di be lơgar Ejiptơ la tiah bơh tềng hơ̆ bol mê lik lòt, la tiah mơ bol mê neh sih gar mơ ngui jơng tuh dà kung be dô nơm suơn biap.

¹¹ Mơya lơgar mơ bol mê tiă hiòng Jordan nàng dòp geh lơh gơs phan tòm la dô nơm lơgar gơs oă mơnơm mơ thòng geh tuh dà mìu bơh đang trồ,

¹² dô nơm lơgar mơ Jehôwa Yàng Tom Trồ bol mê dê rcang gàr. Mat Jehôwa Yàng Tom Trồ bol mê dê sền gàr gơ sùm, bơh di ngai bồ sơnam jơl tus di ngai lồi sơnam.

¹³ Behơ̆ dilah bol mê dòn song lơh jat ală jơnau sồr mơ añ ai bol mê in ngai do, hơ̆ la kòñ gơboh di Jehôwa Yàng Tom Trồ bol mê dê mơ jơh nùs jơh hwềng soàn duh broă Kơnràñ,

¹⁴ gen Kơnràñ rơp dùh mìu hơđang lơgar bol mê dê di kơnhai sơnam gơ dê, mìu tòm kơnhai jrùh nha mơ mìu tòm kơnhai bơkào chi che tồ bol mê rgơi toès prap kòi mbo, tơrnòm pa mơ mơñà bol mê dê.

¹⁵ Kơnràñ rơp rcang gơs ñhơt tòm ală ƀlàng ală phan poan jơng bol mê in, mơ bol mê rơp sa mơ geh hòm lai.

¹⁶ Kơrhia tĕ, rngòt bol mê rơp gơkòl ơniai mơ wèt duh broă ală yàng ndai mơ cùn khoai di đap bol gơ.

¹⁷ Gen bơta gơjrañ Yàng Jehôwa dê rơp gơhào khuh tòmdră mơ bol mê, mơ Kơnràñ rơp til ală tap trồ tồ gơ ò dùh mìu mơ ù tiah ò gơlik plai đo, mơ bol mê rơp mhar roh rui bơh di lơgar niam mơ Yàng Jehôwa ai bol mê in.

¹⁸ Kah prap tĕ ală jơnau añ đơs do tòm nùs mơ tòm dơngoh bol mê, kơt tĕ gơ di tê bol mê dê mơ tap gơ di bìng liang bol mê dê lơh gơs ală tềl bơto tơngkah.

¹⁹ Bơto ală jơnau hơ̆ ală kòn sau bol mê in, đơs tĕ bơh ală jơnau hơ̆ tòm tŭ bol mê nggui tòm hìu mơ tòm tŭ bol mê lòt rò gùng, tòm tŭ bol mê bic rlô mơ tòm tŭ bol mê guh.

²⁰ Cih tĕ ală jơnau hơ̆ hơđang ală jrong mpồng hìu bol mê dê mơ hơđang ală mpồng dờng lik mut bol mê dê,

²¹ tồ rài bol mê dê mơ rài ală kòn sau bol mê dê rgơi geh kis jŏ jòng tòm lơgar mơ Yàng Jehôwa neh srat să ai ală ồng pàng bol mê in, jŏ jòng kung be ală tap trồ hơđang plai ù.

²² Dilah bol mê kơrhia prap gàr jơh ală jơnau gơnoar sồr do mơ añ ai bol mê in nàng lơh jat, hơ̆ la kòñ gơboh di Jehôwa Yàng Tom Trồ bol mê dê, lòt jat jơh ală gùng dà Kơnràñ dê mơ đềt mềr mơ Kơnràñ,

²³ gen Yàng Jehôwa rơp ting bơtrơh jơh ală làng bol do di đap bol mê, mơ bol mê rơp tơnroh ală làng bol dờng rlau mơ pràn rlau mơ bol mê.

²⁴ Tiah lơi mpàng jơng bol mê jă gen rơp gơrê bal mơ bol mê. Ù tiah bol mê dê rơp bơh di ƀlàng ngềt ngơt tus hơ Liban, mơ bơh di hiòng Ơphrat tus hơ dàlềng đah mattơngai mut.

²⁵ Ò gơs cau lơi rgơi ntào tòmdră mơ bol mê; jat be jơnau Jehôwa Yàng Tom Trồ bol mê dê neh ho gen Kơnràñ rơp dùh bơta rơm să mơ rngòt rngơt bơh bol mê hơđang jơh lơgar lơi mơ bol mê rơp tus.

²⁶ Sền tĕ, tòm ngai do añ neh ơn di đap bol mê dô bơta lơngai mơ dô bơta srat sơntơm,

²⁷ bơta lơngai dilah bol mê dòn bơr lơh jat ală jơnau gơnoar sồr Jehôwa Yàng Tom Trồ bol mê dê mơ añ ai bol mê in tòm ngai do,

²⁸ bơta srat sơntơm dilah bol mê ò dòn bơr lơh jat ală jơnau gơnoar sồr Jehôwa Yàng Tom Trồ bol mê dê, mơ wèt ngkòi wơl bơh di gùng mơ añ sồr bol mê lòt jat tòm ngai do mơ lòt jat ală yàng ndai mơ bol mê òhềt git.

²⁹ Tòm tŭ Jehôwa Yàng Tom Trồ bol mê dê neh cèng bol mê tus tòm lơgar mơ bol mê rơp mut nàng dòp leng, bol mê rơp ơn bơta ai lơngai hơđang mơnơm Gerijim, mơ bơta srat sơntơm hơđang mơnơm Ebal.

³⁰ Be bol mê git, ală mơnơm do ơm đah ne Jordan, đah mattơngai mut gùng lòt, rềp di tòm chi dờng Môre, tòm lơgar cau Kanaan ơm tòm Arabah tòm toh mơ Gilgal.

³¹ Bol mê rơp tiă Jordan nàng mut mơ dòp geh ù tiah Jehôwa Yàng Tom Trồ bol mê dê ai bol mê in lơh gơs phan tòm. Tòm tŭ bol mê neh dòp geh gơ rau mơ ơm kis tềng hơ̆,

³² lơh nền tĕ la bol mê dòn bơr lơh jat jơh ală jơnau lơh nền mơ ală bơta boh lam mơ añ ơn di đap bol mê tòm ngai do.