Yal Wơl 10 - Sră Goh 2018

Ală mpàn lŭ dơ̆ bàr

¹ Tòm tŭ hơ̆ Yàng Jehôwa đơs mơ añ lah: “Phàt tĕ bàr pang mpàn lŭ ndròm bal be ală mpàn lŭ lài mơ guh tĕ hơ Añ hơđang mơnơm. Mơ kung lơh tĕ dô nơm đài mơ mpàn chi.

² Añ rơp cih hơđang ală mpàn lŭ ală jơnau neh gơs tòm ală mpàn lŭ lài mơ mê neh jan bơcah. Gen mê pal ơn bol gơtòm đài.”

³ Behơ̆ añ neh lơh Đài Bơta Ho Bal mơ mpàn chi nho rề mơ phàt bàr pang mpàn lŭ ndròm bal kung be ală mpàn lŭ lài, mơ añ guh hơđang mơnơm gơs bàr pang mpàn lŭ tòm tê añ.

⁴ Yàng Jehôwa cih hơđang ală pang mpàn lŭ hơ̆ ală jơnau Kơnràñ neh cih lài, hơ̆ la Jơt Bơta Boh Lam mơ Kơnràñ neh yal bol mê in git hơđang mơnơm, bơh tòm ồs tòm ngai pơjum mpồl jơnum. Mơ Yàng Jehôwa ai añ in ală mpàn lŭ hơ̆.

⁵ Gen añ mù rê wơl bơh hơđang mơnơm mơ ơn ală mpàn lŭ tòm đài mơ añ neh lơh gơs, tòm toh jat be jơnau Yàng Jehôwa neh sồr añ, mơ tŭ do gơ ơm tòm hơ̆.

⁶ (Ală cau Israel lòt bơh di ală tơrlung dà Beerôt Bene Jaakan tus hơ Môsera. Tềng hơ̆ Arôn sang rài mơ geh tơp, mơ Eleajar kòn klau khai pơrdòn khai lơh gơs cau gơnoar ơn phan duh khoai.

⁷ Bơh hơ̆ bol khai lòt tus hơ Gutgôdah mơ kư̆ lòt tai tus hơ Jôtbatha la dô nơm lơgar gơs oă croh dà.

⁸ Tòm tŭ hơ̆ Yàng Jehôwa ơn is jơi bơtiàn Lebi nàng tùng Đài Bơta Ho Bal Yàng Jehôwa dê, nàng ntào di đap Yàng Jehôwa duh broă mơ ai lơngai tòm sơnđan Kơnràñ dê kung be bol khai gam lơh jơl tus ngai do.

⁹ Hơ̆ la ñchi bơh tài ală cau Lebi ò gơs pơnah sre brê lơi digùl ală oh mi bol khai dê; Yàng Jehôwa la sre brê bol khai dê, tòm toh jat be Jehôwa Yàng Tom Trồ bol mê dê neh yal bol khai in.)

¹⁰ Mơ tai, añ neh ơm hơđang mơnơm poan jơt ngai mơ mang kung be añ neh ơm dơ̆ lài, mơ Yàng Jehôwa kung neh iat jơnau añ tòm tŭ hơ̆ sơl. Ò di nùs kòñ Kơnràñ la kòñ tơnroh bol mê ò.

¹¹ Kơnràñ đơs mơ añ lah: “Lòt tĕ mơ tề lam làng bol tòm gùng dà bol khai dê tồ bol khai rgơi mut mơ dòp geh lơgar mơ Añ neh srat să ho nền mơ ală ồng pàng bol khai dê ai bol khai in.”

Rngòt di Yàng Jehôwa

¹² Mơ tŭ do, ơ Israel, bơta Jehôwa Yàng Tom Trồ bol mê dê jòi lùp bol mê la duh rngòt di Yàng Jehôwa, lòt tòm jơh ală gùng dà Kơnràñ dê, kòñ gơboh di Kơnràñ, mơ jơh nùs, jơh hwềng soàn duh broă Jehôwa Yàng Tom Trồ bol mê dê,

¹³ mơ prap gàr lơh jat ală jơnau gơnoar sồr mơ ală bơta lơh nền Kơnràñ dê mơ añ ai bol mê in tòm ngai do nàng să tòm bol mi in geh lơngai.

¹⁴ Bơh ngan, trồ mơ ală tap trồ hơđang jòng rlau jơh gơrê bal mơ Jehôwa Yàng Tom Trồ bol mê dê.

¹⁵ Bulah behơ̆ Yàng Jehôwa wèt nùs kòñ gơboh Kơnràñ mìng di ală ồng pàng bol mê dê, mơ neh sac rwah bol khai mơ kòn sau bol khai dê bơh digùl ală làng bol, be neh gŏ tòm ngai do.

¹⁶ Gen tàng, siat gơltau tĕ nùs bol mê, mơ bañ kơldang bồ tai.

¹⁷ Bơh Jehôwa Yàng Tom Trồ bol mê dê la Yàng Tom Trồ dờng, gơs gơnoar pràn mơ pal rngòt, Kơnràñ ò cah is cau lơi, ò dòp phan loă.

¹⁸ Kơnràñ dong tò ală cau kòn đòi mơ ală cau ùr bơnrau, kòñ gơboh làng bol bơdìh, ai khai in phan sa mơ ào soh.

¹⁹ Mơ bol mê kung pal kòñ gơboh di ală cau làng bơdìh bơh să tòm bol mê neh la cau làng bơdìh tòm Ejiptơ.

²⁰ Duh rngòt tĕ Jehôwa Yàng Tom Trồ bol mê dê mơ duh broă Kơnràñ. Đềt mềr tĕ mơ Kơnràñ mơ srat să tòm sơnđan Kơnràñ dê.

²¹ Kơnràñ la bơta jòng ro bol mê dê, Kơnràñ la Yàng Tom Trồ bol mê dê, Kơnràñ neh lơh gơs ală bơta krơi is pal rngòt mơ bol mê neh gŏ mơ mat tòm bol mê dê.

²² Ntum khà jơh ală ồng pàng bol mê dê neh mù tòm Ejiptơ la poh jơt nă, mơ tŭ do Jehôwa Yàng Tom Trồ bol mê dê neh lơh bol mê in gơlik gơs gal ngan kung be ală sơmañ hơđang trồ.