Yal Wơl 1 - Sră Goh 2018

Pe bơta bơto Môise dê ( 1:1 – 30:20 ) Jơnau sồr lik lòt bơh di mơnơm Hôrep

¹ Do la ală jơnau Môise neh đơs mơ jơh ală cau Israel tòm ƀlàng ngềt ngơt đah ne hiòng Jordan dê, tòm ƀlàng ring tòm toh di đap Sup, digùl Pharan mơ Tôphel, Laban Hajerôt mơ Dijahap.

² (Bơh di gùng lòt jat di mơnơm Seir tòm jơt dùl ngai sồng tus hơ Kades Barnea).

³ Tòm nam dơ̆ poan jơt, tòm ngai dùl kơnhai jơt dùl, Môise bơto yal ală cau Israel in jơh ală jơnau mơ Yàng Jehôwa neh sồr khai yal wơl tòm bol khai.

⁴ Hơ̆ la tơnơ̆ mơ tŭ khai neh lơh alah Sihôn bơtau cau Amôrit neh at bồ tòm Hesbôn, mơ tòm Edrei neh lơh alah Ok bơtau Basan neh at bồ tòm Astarôt.

⁵ Tòm ù tiah cau Môap đah mattơngai lik hiòng Jordan, Môise yal tơlik bơta boh lam do, mơ đơs lah:

⁶ “Jehôwa Yàng Tom Trồ bol he dê neh đơs mơ bol he tòm tiah Hôrep lah: ‘Bol mê neh ơm jŏ ngai rau di mơnơm do.

⁷ Tă tĕ sàl mơ mut tòm lơgar mơnơm ală cau Amôrit dê; lòt tĕ hơ jơh ală làng bol ơm gùt dar tòm Arabah, tòm ală mơnơm, tòm kơnhwàl Sephelah, tòm kơnhwàl Negep mơ rò gah dàlềng, tòm lơgar cau Kanaan mơ tòm Lebanon, ngài tus hơ hiòng dờng Ơphrat.

⁸ Sền ne, Añ neh ai bol mê in lơgar do. Mut tĕ mơ dòp ù tiah lơh gơs sre brê mơ Yàng Jehôwa neh srat să ho nền ai ală ồng pàng bol mê in la Abraham, Isak mơ Jakôp, mơ ală kòn sau bol khai in.’

Bơta pồ bơtào ală cau at bồ pa

⁹ Tòm tŭ hơ̆ añ neh đơs mơ bol mê lah: ‘Bol mê la dô nơm ơnòng kơnjơ̆ ngan, mìng dô nă añ ò jai àñ ơnòng.

¹⁰ Jehôwa Yàng Tom Trồ bol mê dê neh lơh ntum khà làng bol bol mê dê gơbơtơl oă tian gơs ngai do bol mê neh gơlik oă kung be ală sơmañ hơđang trồ.

¹¹ Dan Jehôwa Yàng Tom Trồ ală ồng pàng bol mê dê bơtơl ntum khà bol mê dê dô rbô dơ̆ oă rlau, mơ ai lơngai bol mê in jat be Kơnràñ neh ho!

¹² Mơya mbe mìng dô nă añ rgơi kong jai jơh ală bơta bòl glar kalke, ală ơnòng kơnjơ̆ mơ ală bơta tòmlah tòmring bol mê dê taih?

¹³ Sac rwah tĕ ală cau jak chài, git wă mơ geh ki ngàm bơh digùl kòp jơi bơtiàn bol mê dê, nàng bol khai at bồ hơđang bol mê.’

¹⁴ Bol mê neh ho wơl mơ añ lah: ‘Bơta ồng neh đơs hơ̆ la niam.’

¹⁵ Behơ̆ añ ai ală cau klau lam bồ tòm ală jơi bơtiàn bol mê dê la ală cau jak chài mơ geh ki ngàm, mơ pồ bơtào bol khai gơs gơnoar at bồ hơđang bol mê, lơh gơs ală cau at bồ ală mpồl dô rbô nă, ală mpồl dô rhiang nă, pram jơt nă mơ jơt nă, mơ gơs cau at bồ jơi bơtiàn.

¹⁶ Mơ añ neh jào gơnoar ală cau kwang cahrña bol mê dê tòm tŭ hơ̆ mơ đơs mơ bol khai lah: ‘Iat tĕ ală bơta tòmlah tòmring digùl ală oh mi bol mê dê mơ cahrña song ngan, bulah la bơta tòmlah tòmring digùl ală oh mi cau Israel dê hala digùl dô nă tòm bol khai mơ dô nă cau làng bơdìh.

¹⁷ Bañ cahrña bơklơn hala dong tò dô đah lơi; iat tĕ cau dềt mơ cau dờng ndròm bal. Bañ rngòt dô nă cau lơi, bơh bơta cahrña gơrê bal mơ Yàng Tom Trồ. Cèng tĕ tus hơ añ bơta lơi kalke bol mê in cahrña, mơ añ rơp iat ală bơta hơ̆.’

¹⁸ Mơ tòm tŭ hơ̆ añ neh sồr bol mê jơh ală bơta bol mê pal lơh.

Sồr cau rwang còp lơgar

¹⁹ Lồc behơ̆, jat jơnau sồr Jehôwa Yàng Tom Trồ bol he dê, bol he lik bơh di Hôrep mơ lòt wèt hơ đah lơgar mơnơm ală cau Amôrit dê, lòt gan ƀlàng ngềt ngơt dờng ơnàng mơ rngòt rngơt ngan mơ bol mê neh gŏ, mơ bol he neh tus hơ Kades Barnea.

²⁰ Gen añ neh đơs mơ bol mê lah: ‘Bol mê neh tus hơ lơgar mơnơm cau Amôrit dê mơ Jehôwa Yàng Tom Trồ bol he dê neh ai bol he in.

²¹ Sền ne, Jehôwa Yàng Tom Trồ bol mê dê neh ai lơgar bol mê in. Lòt guh tĕ mơ dòp sre brê jat be Jehôwa Yàng Tom Trồ ală ồng pàng bol mê dê neh đơs mơ bol mê. Bañ rngòt, bañ gơplơ̆ nùs.’

²² Gen jơh tơl nă bol mê tus hơ añ mơ đơs lah: ‘Bol he sồr tĕ ală cau lòt lài mơ rwang còp lơgar bol he in mơ rê wơl yal bol he in git bơh gùng mơ bol he rơp lòt mơ ală ƀòn dờng mơ bol he rơp tus.’

²³ Jơnau bơyai hơ̆ gơlơh niam di tồr añ gen añ sac rwah jơt bàr nă cau tòm bol mê, dô nă tòm kòp jơi bơtiàn.

²⁴ Bol khai lik lòt mơ tus hơ lơgar kơh mơnơm, mơ tus hơ Thòng Eskôl mơ sền sơwì lơgar.

²⁵ Bol khai ai dô êt plai lơgar hơ̆ dê mơ cèng brê tus hơ bol he mơ yal lah: ‘Hơ̆ la lơgar niam mơ Jehôwa Yàng Tom Trồ bol he dê neh ai bol he in.’

Bơtào tòmdră mơ Yàng Jehôwa

²⁶ Mơya bol mê ò bài guh; bol mê bơtào tòmdră mơ Jehôwa Yàng Tom Trồ bol mê dê.

²⁷ Bol mê yoam joh tòm ală sàl ơm bol mê dê mơ đơs lah: ‘Yàng Jehôwa ò kòñ gơboh di bol he, tài behơ̆ Kơnràñ cèng bol he lik lòt bơh di Ejiptơ mơ jào phi bol he tòm tê ală cau Amôrit nàng tơnroh bol he.

²⁸ Ntềng đah bol he rgơi lòt taih? Ală oh mi bol he dê neh lơh bol he in gơplơ̆ nùs. Bol khai đơs lah: Ală làng bol tềng hơ̆ la pràn kơldang mơ jơnhoa rlau mơ bol he; ală ƀòn dờng la dờng ngan, ală dơrñang la jòng jơnhoa tus hơđang trồ. Bol hi kung neh gŏ ală cau Anakim ơm tềng hơ̆.’

²⁹ Gen Yàng Jehôwa neh đơs mơ bol mê lah: ‘Bañ rơm să; bañ rngòt di bol khai.

³⁰ Jehôwa Yàng Tom Trồ bol mê dê rơp lòt lài di đap bol mê, Kơnràñ rơp tòmlơh ala bol mê kung be Kơnràñ neh lơh bol mê in tòm Ejiptơ di đap gar mat bol mê dê,

³¹ mơ tòm ƀlàng ngềt ngơt. Tềng hơ̆ bol mê neh gŏ mbe Jehôwa Yàng Tom Trồ bol mê dê neh kơnđu bol mê, kung be dô nă bèp kơnđu kòn klau khai dê, tòm jơh gùng lòt bol mê dê jơl tus di tŭ bol mê neh tus di tiah do.’

³² Bulah neh gơs jơh ală bơta hơ̆, bol mê kung ò dòn kơnòm di Jehôwa Yàng Tom Trồ bol mê dê,

³³ la Bơtau neh lòt lài di đap bol mê tòm gùng lòt bol mê dê, trồ mang tòm jrong ồs mơ trồ ngai tòm dô puk mhwal, nàng jòi bol mê in ală tiah nàng bơtào sàl ơm, mơ sơnio bol mê in gùng bol mê pal lòt.

³⁴ Tòm tŭ Yàng Jehôwa kơno ală jơnau bol mê neh đơs, Kơnràñ gơhào gơjrañ mơ srat să lah:

³⁵ ‘Ò gơs dô nă cau lơi tòm jơi bơtiàn iơh bơsak do rơp gŏ lơgar niam mơ Añ neh srat să ho ai ală ồng pàng bol mê in,

³⁶ mìng Kalep kòn Jephune. Khai rơp gŏ lơgar hơ̆, mơ Añ rơp ai khai in mơ ală kòn sau khai in lơgar mơ khai neh jă jơng hơđang, tài bơh khai neh jơh nùs lòt jat Yàng Jehôwa.’

³⁷ Tài bơh bol mê Yàng Jehôwa kung gơhào gơjrañ di añ mơ đơs lah: ‘Mê kung rơp ò geh mut tòm lơgar hơ̆.

³⁸ Mơya cau dong broă mê la Jôsue kòn klau Nun rơp mut tềng hơ̆. Chồl nùs khai pràn kơldang tài bơh khai rơp lam Israel dòp gơlơh gơs sre brê.

³⁹ Mơ ală kòn dềt mơ mê neh đơs lah rơp kong kup cèng gơs dĭ, ală kòn sau bol mê dê la ală kòn dềt òhềt git bơta niam mơ bơta iơh, bol khai rơp mut tòm lơgar hơ̆. Añ rơp ai gơ bol khai in mơ bol khai rơp dòp geh gơlơh gơs sre brê.

⁴⁰ Mơya đah mơ bol mê, wơlke wèt tĕ mơ lik lòt hơ đah ƀlàng ngềt ngơt, jat gùng lòt hơ Dàlềng Pơrhê.’

⁴¹ Gen bol mê ho lah: ‘Bol hi neh tìs glài mơ Yàng Jehôwa. Bol hi rơp guh mơ tòmlơh jat be Jehôwa Yàng Tom Trồ bol hi dê neh sồr bol hi.’ Behơ̆ kòp nă bol mê mă àñ ală phan tòmlơh, kơlôi lah ƀuơn soh nàng lòt guh hơ lơgar kơh mơnơm.

⁴² Mơya Yàng Jehôwa đơs mơ añ lah: ‘Yal tĕ bol khai in lah: Bañ guh mơ tòmlơh, tài bơh Añ ò ơm bal mơ bol mê. Bol mê rơp kong ală cau sò tơm lơh alah.’

⁴³ Behơ̆ añ neh yal bol mê in, mơya bol mê ò bài iat. Bol mê bơtào tòmdră mơ jơnau sồr Yàng Jehôwa dê mơ tòm bơta pơnhừ să bol mê lòt guh hơ lơgar mơnơm.

⁴⁴ Ală cau Amôrit ơm tòm ală mơnơm hơ̆ lik lòt tòmlơh mơ bol mê; bol khai ting jat bol mê kung be dô mpồl lơwe mơ lơh alah bol mê tòm gùng bơh di Seir jơl tus hơ Horma.

⁴⁵ Bol mê rê wơl mơ ñìm di đap Yàng Jehôwa, mơya Kơnràñ ò kơlôi wèt hơ bơta ñìm rac bol mê dê mơ sềt tồr ò bài iat bol mê.

⁴⁶ Behơ̆ bol mê pal ơm wơl tòm Kades Barnea tòm jŏ ngai, jơh ală tŭ tơngai bol mê ơm tềng hơ̆ jŏ ngan.”