Yal Tơlik 9 - Sră Goh 2018

Cau gơnrơh dơ̆ pram uh kơlwòk

¹ Cau gơnrơh dơ̆ pram uh kơlwòk, gen añ gŏ dô nơm sơmañ bơh đang trồ neh rung di plai ù, mơ neh ai gơ in kai mpồng brong jrô hùt hung dê.

² Sơmañ hơ̆ pò brong jrô hùt hung, gen gơs ñhŭ gơguh be ñhŭ dô nơm bơnhă ồs dờng; mattơngai mơ pah gòi gơlik gơs jơngo bơh ñhŭ guh bơh bơtô hơ̆.

³ Bơh di ñhŭ hơ̆ gơs ală srah nting par mù hơđang plai ù; mơ neh ai bol gơ in gơnoar pràn be gơnoar pràn ală diang tòm ù.

⁴ Gơs jơnau sồr bol gơ bañ lơh iơh di ală ñhơt tòm ù, hala di ală phan tơlir, hala di ală chi che lơi, mơya mìng lơh iơh di ală cau ò gơs tềl ƀang kì Yàng Tom Trồ dê di bìng liang bol khai.

⁵ Mơ neh ai bol gơ in gơnoar lơh bòl glar jê sồt di kòn mơnus tòm pram kơnhai, mơya ò di tơnchơt bol khai, mơ bơta bòl glar jê sồt hơ̆ la be bơta bòl glar jê sồt tòm tŭ diang cuh.

⁶ Tòm ală ngai hơ̆ ală cau rơp jòi bơta chơt mơ jòi ò bàn; bol khai rơp kòñ chơt mơya bơta chơt pleh ngài di bol khai.

⁷ Ală srah nting hơ̆ gơlơh be ală ơseh neh rcang sir nàng lik lòt tòmlơh; hơđang bồ bol gơ gơs chi lơi gơlơh be sơgơn bơtau mơ màh, mơ muh mat bol gơ be muh mat kòn mơnus.

⁸ Bol gơ gơs sŏ be sŏ cau ùr, mơ ală sề bol gơ be sề klìu triă dê.

⁹ Bol gơ soh ào tòmlơh be ào lòs, mơ jơnau ntas ală đar bol gơ dê be ntas oă rơndeh gơs ơseh hwài ntoat tòmlơh.

¹⁰ Bol gơ gơs tiang be tiang diang dê, rgơi cuh, mơ gơnoar pràn bol gơ dê ơm di tiang nàng lơh jê sồt ală cau tòm pram kơnhai.

¹¹ Bơtau bol gơ la cau gơnrơh brong jrô hùt hung dê. Sơnđan khai jat jơnau Hebrơ la Abadôn, mơ jat jơnau Grek la Apôlyôn.

¹² Bơta bòl glar sơbơng roh sơnròp neh rlau rau; do, gam bàr bơta bòl glar sơbơng roh tus tơnơ̆ tai.

Cau gơnrơh dơ̆ prau uh kơlwòk

¹³ Cau gơnrơh dơ̆ prau uh kơlwòk, gen añ kơno jơnau gơlik bơh poan nơm ngke dê cơnòng duh khoai mơ màh ơm di đap Yàng Tom Trồ.

¹⁴ Jơnau hơ̆ đơs mơ cau gơnrơh dơ̆ prau ơm at kơlwòk lah: “Hồ tĕ poan nă cau gơnrơh neh kòl cap di gah hiòng dờng Ơphrat.”

¹⁵ Behơ̆ poan nă cau gơnrơh geh hồ, bol khai neh gơs rcang sir tus di jơ, ngai, kơnhai mơ nam hơ̆, tồ tơnchơt dô pơnah pe jơi kòn mơnus.

¹⁶ Ntum khà ală cau ling hào ơseh la bàr rhiang tơlak sa; añ neh kơno khà hơ̆.

¹⁷ Tòm bơta gơtơnggŏ añ gŏ ală ơseh la be do: Ală cau hào ơseh soh ào lòs dà pơrhê be ồs, dà tơlir be lŭ màng tơlir, mơ dà rmit be siau; ală ơseh gơs bồ be bồ klìu triă, mơ bơr bol gơ gơbruh ồs, ñhŭ mơ siau.

¹⁸ Dô pơnah pe jơi kòn mơnus kong chơt bơh pe bơta rung rài hơ̆, la ồs, ñhŭ mơ siau lik bơh di bơr ală ơseh.

¹⁹ Bơh gơnoar pràn ală ơseh hơ̆ dê ơm di bơr mơ di tiang bol gơ; ală tiang bol gơ gơlơh be bơs mơ gơs bồ, kơnòm di ală bồ hơ̆ bol gơlơh jê sồt di ală cau.

²⁰ Ai ală cau gam wơl, la cau òhềt chơt bơh ală bơta rung rài hơ̆, bol khai ò gơjrañ sang glài bơh ală broă tê bol khai lơh, mơ kung ò sang lòi bơta duh khoai ală cà mơ ală rùp ràk mơ màh, priă, kòng, lŭ mơ chi, la ală phan ò rgơi gŏ, ò rgơi kơno, mơ ò rgơi lòt.

²¹ Bol khai kung ò gơjrañ sang glài bơh ală glài bol khai dê la tơnchơt cau, juh proh pơlìn, rềs àr bơrnàn, mơ ntung kơñau.