Yal Tơlik 7 - Sră Goh 2018

Dô rhiang poan jơt poan rbô nă cau Israel geh tap ƀang kì

¹ Tơnơ̆ mơ hơ̆ añ gŏ poan nă cau gơnrơh ơm ntào di poan đah plai ù, kup wơl poan nơm càl plai ù dê, tồ ò gơs càl lơi khồm hơđang plai ù, hơđang dàlềng hala hơđang chi che.

² Añ gŏ dô nă cau gơnrơh ndai guh bơh đah mattơngai lik, at ƀang kì Yàng Tom Trồ gam kis sùm dê. Khai hòi driau dờng mơ poan nă cau gơnrơh gơs gơnoar lơh iơh di plai ù mơ dàlềng,

³ mơ đơs lah: “Bañ lơh iơh di plai ù, dàlềng, hala ală chi che, jơl tus di tŭ lơi bol hi neh tap ƀang kì di bìng liang ală dĭ gơna Yàng Tom Trồ bol he dê.”

⁴ Mơ añ neh kơno ntum khà ală cau geh tap ƀang kì, la dô rhiang poan jơt poan rbô nă cau bơh tòm jơh ală jơi bơtiàn kòn sau Israel dê.

⁵ Tòm jơi bơtiàn Juda dê, jơt bàr rbô nă cau geh tap ƀang kì; Tòm jơi bơtiàn Ruben dê, jơt bàr rbô nă; Tòm jơi bơtiàn Gat dê, jơt bàr rbô nă;

⁶ Tòm jơi bơtiàn Aser dê, jơt bàr rbô nă; Tòm jơi bơtiàn Neptali dê, jơt bàr rbô nă; Tòm jơi bơtiàn Manase dê, jơt bàr rbô nă;

⁷ Tòm jơi bơtiàn Simeôn dê, jơt bàr rbô nă; Tòm jơi bơtiàn Lebi dê, jơt bàr rbô nă; Tòm jơi bơtiàn Issaka dê, jơt bàr rbô nă;

⁸ Tòm jơi bơtiàn Jebulun dê, jơt bàr rbô nă; Tòm jơi bơtiàn Jôsep dê, jơt bàr rbô nă; Tòm jơi bơtiàn Benjamin dê, jơt bàr rbô nă geh tap ƀang kì.

Mpồl bol oă geh dong klàs

⁹ Tơnơ̆ mơ hơ̆ añ sền gŏ, ne, gơs dô mpồl bol oă tian gơs ò gơs cau lơi rgơi kòp, lik bơh jơh ală lơgar, jơi bơtiàn, làng bol, mơ jơnau đơs; bol khai ntào di đap sơbàn mơ di đap Belàt Kòn, bol khai soh ào jrùh bò, mơ di tê at ală nha gòl,

¹⁰ mơ hòi driau dờng lah: “Bơta dong klàs gơrê bal mơ Yàng Tom Trồ bol he dê, la Bơtau nggui hơđang sơbàn, mơ gơrê bal mơ Belàt Kòn.”

¹¹ Mơ jơh ală cau gơnrơh ntào gùt dar sơbàn, gùt dar ală cau kwang kra mơ poan nơm phan wìn kis; bol khai tơmbic să di đap sơbàn nàng duh khoai Yàng Tom Trồ,

¹² mơ đơs lah: “Amen! Bơta jòng ro, gơklŏ, jak chài, ưnngài, ryŭ ryơm, gơnap gơnoar, mơ gơnoar pràn gơrê bal mơ Yàng Tom Trồ bol he dê jơl sùm sùm ò lồi. Amen!”

¹³ Gơs dô nă tòm ală cau kwang kra ai jơnau đơs mơ añ lah: “Ală cau soh ào jrùh bò do la ñcau taih? Mơ bol khai tus bơh tiah lơi taih?”

¹⁴ Añ đơs lah: “Ơ Kơnràñ, Kơnràñ git.” Khai đơs mơ añ lah: “Hơ̆ la ală cau lik bơh bơta rung rài dờng, neh pìh mơ lơh bò ào jrùh bol khai dê tòm mhàm Belàt Kòn dê.

¹⁵ Tài bơh hơ̆ sồng bol khai ơm di đap sơbàn Yàng Tom Trồ dê, ngai mơ mang duh broă Yàng Tom Trồ tòm hìu duh khoai Kơnràñ dê; ai Bơtau nggui hơđang sơbàn rơp jơm gòm bol khai.

¹⁶ Bol khai rơp ò gam jơgloh, ò gam tơhìr tai; mattơngai hala bơta duh trơàl lơi kung rơp ò lơh iơh di bol khai sơl.

¹⁷ Bơh Belàt Kòn ơm digùl sơbàn rơp ê gàr bol khai, mơ tề lam bol khai tus hơ ală croh dà bơta kis, mơ Yàng Tom Trồ rơp jùt jơh dà mat di mat bol khai.”