Yal Tơlik 6 - Sră Goh 2018

Prau nơm ƀang kì sơnròp

¹ Chòp añ gŏ tòm tŭ Belàt Kòn tă ƀang kì sơnròp tòm poh nơm ƀang kì, gen añ kơno dô nơm phan wìn kis đơs be ntơr lah: “Tus tĕ!”

² Mơ añ gŏ, ne, gơs dô nơm ơseh kò. Cau hào ơseh gơs dô nơm àtak; mơ neh ai khai in dô nơm sơgơn bơtau, mơ khai lik lòt be cau pha lin rlau nàng geh pha lin rlau.

³ Tòm tŭ Belàt Kòn tă ƀang kì dơ̆ bàr, añ kơno phan wìn kis dơ̆ bàr đơs lah: “Tus tĕ!”

⁴ Gen gơs dô nơm ơseh ndai lik, să gơ pơrhê. Cau hào ơseh geh gơnoar tă bơta ring lơngai bơh di plai ù, tồ ală cau tơnchơt bal mơ gơp; mơ neh ai khai in dô nơm đào dờng.

⁵ Tòm tŭ Belàt Kòn tă ƀang kì dơ̆ pe, añ kơno phan wìn kis dơ̆ pe đơs lah: “Tus tĕ!” Mơ añ gŏ, ne, gơs dô nơm ơseh jù. Cau hào ơseh at di tê dô nơm phan kơr

⁶ Añ kơno digùl poan nơm phan wìn kis gơlơh be gơs jơnau đơs lah: “Dô kơr kòi mi tac dô dơnie, pe kơr kòi tac dô dơnie ai mơñà mơ tơrnòm gen bañ lơh roh.”

⁷ Tòm tŭ Belàt Kòn tă ƀang kì dơ̆ poan, añ kơno phan wìn kis dơ̆ poan đơs lah: “Tus tĕ.”

⁸ Mơ añ gŏ, ne, gơs dô nơm ơseh pàl pàl. Cau hào ơseh hơ̆ sơnđan la Bơta chơt, mơ Lơgar Làng ƀồc jat bơh tơnơ̆ khai. Neh ai bol khai in geh gơnoar tơnchơt dô pơnah poan tòm plai ù, la tơnchơt mơ đào, mơ jơgloh rung, mơ pluh plàng mơ ală phan poan jơng jàñ bơsak tòm plai ù.

⁹ Tòm tŭ Belàt Kòn tă ƀang kì dơ̆ pram, añ gŏ tòm tiah cơnòng duh khoai gơs ală hwềng soàn ală cau neh kong sreh chơt, tài bơh jơnau Yàng Tom Trồ mơ jơnau lơh cơng bol khai dê.

¹⁰ Bol khai hòi driau dô jơnau dờng lah: “Khoai Bơtau Tòm At Bồ la Bơtau sàng goh mơ song ngan, jơl tus di tŭ lơi sồng Kơnràñ cahrña mơ sal tê bơh mhàm bol hi dê di ală cau ơm tòm plai ù taih?”

¹¹ Neh ai kòp nă bol khai in dô nơm ào jrùh bò, mơ gơs jơnau đơs mơ bol khai lah pal ơm rlô dô êt jŏ tai, jơl tus di tŭ lơi geh tơl khà ală cau bơyô duh broă bal mơ bol khai mơ ală oh mi bol khai dê, la cau pal kong tơnchơt be bol khai sơl.

¹² Tòm tŭ belàt Kòn tă ƀang kì dơ̆ prau, gen añ sền gŏ, ne, gơs lơnggơr ù dờng ngan, mattơngai gơlik jù be bài sơnò kiat jù, mơ kơnhai gơlik gơs be mhàm.

¹³ Ală sơmañ hơđang trồ rung tòm plai ù, be ală plai lir chi ƀal dê gơrung jơh tòm tŭ gơs càl dờng khồm rơnggô.

¹⁴ Trồ gơpồt wơl be dô pang sră pồt mơ roh thit, mơ jơh ală mơnơm mơ bồt pơlào gơkòl cèng pơrdô bơh di tiah gơ dê.

¹⁵ Gen ală bơtau tòm plai ù, ală cau dờng ryŭ, ală kwang at bồ mpồl ling, ală cau pas gơs, ală cau gơnoar pràn, jơh ală cau dĭ gơna, mơ ală cau geh khat gơboh, bol khai pồn să he tòm ală trồm lŭ mơ digùl ală pơnai lŭ hơđang ală mơnơm.

¹⁶ Mơ bol khai hòi ală mơnơm mơ ală pơnai lŭ mơ đơs lah: “Dùh tĕ hơđang bol hi mơ pồn ndơp bol hi klàs bơh di mat Bơtau nggui hơđang sơbàn, mơ klàs bơh di bơta gơjrañ dờng Belàt Kòn dê.

¹⁷ Bơh ngai dờng bơta gơjrañ dờng Kơnràñ dê neh tus, ñcau rgơi ntào jai taih?”