Yal Tơlik 5 - Sră Goh 2018

Sră Pồt mơ Belàt Kòn

¹ Chòp añ gŏ tòm tê ma Bơtau nggui hơđang sơbàn gơs dô pang sră pồt cih tòm đah dơlam mơ đah bơdìh, mơ tap poh nơm ƀang kì.

² Añ kung gŏ dô nă cau gơnrơh gơs gơnoar pràn ai jơnau dờng yal lah: “Ñcau di pal pò sră do mơ tă ală ƀang kì gơ dê taih?”

³ Bulah hơđang trồ, tòm ù, hala hơđơm ù, kung ò gơs cau lơi rgơi pò sră hơ̆ hala sền gơ.

⁴ Tài bơh ò gŏ cau lơi di pal pò sră hơ̆ hala sền gơ, gen añ ñìm oă ngan.

⁵ Gen gơs dô nă tòm ală cau kwang kra đơs mơ añ lah: “Bañ ñìm, ne, Klìu triă jơi bơtiàn Juda, kòn sau Dabit dê, neh pha lin rlau gen rgơi pò sră hơ̆ mơ tă poh nơm ƀang kì gơ dê.”

⁶ Digùl sơbàn mơ poan nơm phan wìn kis, mơ digùl ală cau kwang kra, añ gŏ dô nơm Belàt Kòn ntào gơlơh be neh kong sreh chơt, gơs poh nơm ngke mơ poh nơm gar mat, la poh Hwềng Yàng Tom Trồ dê kong sồr lòt tus làm jơh plai ù.

⁷ Belàt Kòn lòt tus, ai sră pồt bơh di tê ma Bơtau nggui hơđang sơbàn.

⁸ Tòm tŭ Belàt Kòn neh ai sră rau, gen poan nơm phan wìn kis mơ bàr jơt poan nă cau kwang kra tơmbic să di đap Belàt Kòn, kòp nă cau at dô nơm kơñi pĕ mơ ală gri mơ màh bềng kơlhô, hơ̆ la ală jơnau hòi dan ală cau sàng goh dê.

⁹ Bol khai đơs chò dô bơta đơs chò pa lah: “Kơnràñ di pal ai sră pồt mơ tă ală ƀang kì gơ dê, Bơh Kơnràñ neh kong sreh chơt, ai mhàm Kơnràñ dê tơwài Yàng Tom Trồ in, ală cau tòm jơh ală jơi bơtiàn, jơnau đơs, làng bol, mơ lơgar,

¹⁰ Mơ Kơnràñ neh lơh ală cau hơ̆ in gơlik gơs lơgar bơtau dê mơ cau gơnoar ơn phan duh khoai Yàng Tom Trồ bol he dê; mơ bol khai rơp at bồ tòm plai ù.”

¹¹ Lồc behơ̆ añ sền gŏ, mơ kơno jơnau oă ngan cau gơnrơh gùt dar sơbàn, ală phan wìn kis mơ ală cau kwang kra, ò git nđò tơlak tơmàn cau gơnrơh.

¹² Bol khai đơs bal dô jơnau dờng lah: “Belàt Kòn neh kong sreh chơt la Bơtau di pal dòp geh gơnap gơnoar, bơta pas sơm, bơta jak chài, gơnoar pràn, bơta ryŭ ryơm, bơta gơklŏ mơ bơta jòng ro”

¹³ Añ kơno jơh ală phan crơng gơs hơđang trồ, tòm ù, hơđơm ù, tòm dàlềng, mơ jơh ală phan tòm ală tiah hơ̆ đơs chò bal lah: “Dan Bơtau nggui hơđang sơbàn bal mơ Belàt Kòn geh bơta jòng ro, bơta ryŭ ryơm, bơta gơklŏ mơ gơnoar pràn jơl sùm sùm ò lồi.”

¹⁴ Mơ poan nơm phan wìn kis ho wơl lah: “Amen.” Mơ ală cau Kwang kra tơmbic să mơ duh khoai.