Yal Tơlik 22 - Sră Goh 2018

Lơngai ală cau geh sac rwah dê

¹ Cau gơnrơh sơnio añ in gŏ hiòng dà bơta kis ơm digùl gùng ƀòn dờng dê; hiòng hơ̆ gơcrà be krơh àng goh, mơ gơhòr lik bơh di sơbàn Yàng Tom Trồ mơ Belàt Kòn dê.

² Gơhòr mù digùl gùng ƀòn dờng. Di bàr đah ƀòng hiòng kung gơs chi bơta kis gơlik jơt bàr bơta plai, kòp kơnhai dô dơ̆ gơlik plai mơ ală nha chi hơ̆ ngui nàng sơmbòi ală làng bol.

³ Rơp ò gam gơs bơta srat rma tai, mơya tòm ƀòn hơ̆ gơs sơbàn Yàng Tom Trồ mơ Belàt Kòn dê, ală dĭ gơna Kơnràñ dê rơp duh broă Kơnràñ.

⁴ Bol khai rơp gŏ mat Kơnràñ, mơ di bìng liang bol khai dê gơs sơnđan Kơnràñ dê.

⁵ Rơp ò gam gơs mang tai; bol khai ò càng bơta àng ồs đèng dê hala bơta àng mattơngai dê tai, tài bơh Yàng la Yàng Tom Trồ rơp sòl pơnđàng bol khai in, mơ bol khai rơp at bồ jơl sùm sùm ò lồi.

Crap wơl ( 22:6-21 ) Bơta tus wơl Yàng Jesu dê

⁶ Cau gơnrơh đơs tai mơ añ lah: “Ală jơnau do la pal dòn mơ song ngan. Yàng la Yàng Tom Trồ ală hwềng ală cau gơnoar hwơr dê neh sồr cau gơnrơh Kơnràñ dê lòt tus, nàng sơnio ală dĭ gơna Kơnràñ in ală bơta rơp gơlik tus gòñ.

⁷ Do, añ tus mhar, lơngai cau lơi in prap gàr ală jơnau gơnoar hwơr tòm sră do!”

⁸ Să tòm añ la Jang neh gŏ mơ kơno ală bơta hơ̆. Dơ̆ neh kơno mơ gŏ rau, añ tơmbic să di jơng nàng duh khoai cau gơnrơh neh yal ală bơta do añ in.

⁹ Mơya khai đơs mơ añ lah: “Bañ lơh behơ̆, añ la cau bơyô duh broă bal mơ mê mơ oh mi mê dê la ală cau gơnoar hwơr, mơ ală cau prap gàr ală jơnau tòm sră do. Duh khoai tĕ Yàng Tom Trồ.”

¹⁰ Khai đơs tai mơ añ lah: “Bañ til ală jơnau gơnoar hwơr tòm sră do, bơh tŭ tơngai neh rềp rau.

¹¹ Cau lơh iơh kư̆ lòi khai lơh iơh tai, cau ngkòr ngkàc kư̆ lòi khai kòl tòm bơta ngkòr ngkàc tai, cau song ring kư̆ lòi khai lơh bơta song ring tai, cau sàng goh kư̆ lòi khai ơm sàng goh tai.”

¹² “Do añ tus mhar, mơ cèng bal phan ƀàn nàng ai kòp nă cau in jat be broă bol khai lơh.

¹³ Añ la Alpha mơ Ômega, Bơtau bồ dà mơ lồi tơnơ̆, Bơtau sơnròp mơ lồi dut.”

¹⁴ Lơngai ală cau in pìh ào he, nàng geh gơnoar lòt tus hơ chi bơta kis mơ geh mut tòm ƀòn bơh ală mpồng dờng.

¹⁵ Ai ală so, ală cau bơjơu, ală cau rềs àr bơrnàn, ală cau tơnchơt cau, ală cau duh rùp ràk, mơ jơh ală cau gơboh bơta đơs blac mơ lơh bơta blac pơrlồm, gen bol khai ơm đah bơdìh ƀòn.

¹⁶ “Añ la Jesu neh sồr cau gơnrơh añ jê lòt tus hơ bol mê nàng cèng jơnau lơh cơng do ală Hìu Jum Goh in sơl. Añ la tòm ryas mơ la kòn sau Dabit dê, la sơmañ bìng gơcrà àng drim.”

¹⁷ Yàng Hwềng mơ bau ùr pa đơs bal lah: “Tus tĕ!” Cau lơi kơno gen đơs tĕ lah: “Tus tĕ!” Cau lơi tơhìr gen tus tĕ. Cau lơi kòñ gen dòp gòi tĕ dà bơta kis.

¹⁸ Añ yal jơh ală cau lơi in kơno ală jơnau gơnoar hwơr tòm sră do: Dilah cau lơi bơtơl bơta lơi tòm sră do, gen Yàng Tom Trồ rơp bơtơl cau hơ̆ in ală bơta rung rài neh cih tòm sră do.

¹⁹ Dilah cau lơi tă sang bơta lơi bơh ală jơnau tòm sră gơnoar hwơr do, gen Yàng Tom Trồ kung rơp tă sang pơnah khai dê bơh chi bơta kis mơ bơh ƀòn dờng sàng goh, la bơta neh cih tòm sră do.

²⁰ Bơtau lơh cơng bơh ală bơta do đơs lah: “Ngan, Añ tus mhar!” Amen, khoai Yàng Jesu, dan Kơnràñ tus mhar!

²¹ Dan bơta nđàc Yàng Jesu dê ơm bal mơ jơh ală cau sàng goh. Amen.