Yal Tơlik 21 - Sră Goh 2018

Trồ tiah pa mơ Jerusalem pa

¹ Chòp añ gŏ trồ pa mơ tiah pa; bơh trồ sơnròp mơ tiah sơnròp neh roh, dàlềng kung ò gam sơl.

² Añ gŏ ƀòn dờng sàng goh la Jerusalem pa, mù bơh đang trồ bơh dê Yàng Tom Trồ; gơ neh rcang sir be dô nă bau ùr pa neh bơka să ơm gơn bau klau khai dê.

³ Añ kơno dô jơnau dờng lik bơh di sơbàn, đơs lah: “Ne, tiah ơm Yàng Tom Trồ dê ơm digùl jơi kòn mơnus. Kơnràñ rơp ơm bal mơ bol khai, mơ bol khai rơp lơh gơs làng bol Kơnràñ dê, să tòm Yàng Tom Trồ rơp ơm bal mơ bol khai, mơ lơh gơs Yàng Tom Trồ bol khai dê.

⁴ Kơnràñ rơp jùt jơh dà mat di mat bol khai, bơta chơt ò gam tai, kung ò gơs bơta moat jrùng, ò gơs bơta nggà ñìm, ò gơs bơta jê sồt tai, bơh ală bơta yau neh roh jơh rau.”

⁵ Bơtau ơm nggui hơđang sơbàn đơs lah: “Do, Añ lơh gơs pa jơh ală bơta.” Mơ đơs tai lah: “Cih tĕ jơnau do, bơh ală jơnau do la pal dòn kơnòm mơ song ngan.”

⁶ Kơnràñ đơs tai mơ añ lah: “Sir rau. Añ la Alpha mơ Ômega, Bơtau sơnròp mơ lồi dut. Cau lơi tơhìr, gen Añ rơp ai dà hùc be phan pà gòi bơh croh dà bơta kis.

⁷ Cau lơi geh pha lin rlau rơp geh ală bơta hơ̆ lơh gơs sre brê; Añ rơp lơh gơs Yàng Tom Trồ khai dê mơ khai rơp lơh gơs kòn Añ jê.

⁸ Ai ală cau rngòt ò khin cha, ală cau ò gơs bơta dòn, ală cau ngkòr ngkàc, ală cau tơnchơt cau, ală cau rềs àr bơrnàn, ală cau bơjơu, ală cau duh rùp ràk, mơ jơh ală cau đơs blac, pơnah bol khai dê ơm tòm brong ồs hơng mơ siau, hơ̆ la bơta chơt dơ̆ bàr.”

⁹ Gơs dô nă tòm poh nă cau gơnrơh neh at poh nơm mơngàn bềng poh bơta rung rài lồi dut, lòt tus đơs mơ añ lah: “Tus tĕ hơ do, añ rơp sơnio mê in ƀan, la bau ùr Belàt Kòn dê.”

¹⁰ Añ gơs rngoh rngac bơh Yàng Hwềng, mơ cau gơnrơh cèng añ tus hơ dô nơm mơnơm dờng mơ jơnhoa, sơnio añ in gŏ ƀòn dờng sàng goh la Jerusalem mù bơh đang trồ bơh dê Yàng Tom Trồ.

¹¹ Gơ gơs bơta gơklŏ Yàng Tom Trồ dê, bơta àng gơcrà ƀòn dê ndròm be lŭ màng gơcrà, be lŭ bò gơcrà, sàng be krơh àng goh.

¹² Ƀòn hơ̆ gơs dô nơm dơrñang dờng mơ jơnhoa, gơs jơt bàr nơm mpồng dờng, dê ală mpồng hơ̆ gơs jơt bàr nă cau gơnrơh, mơ gơs cih ală sơnđan jơt bàr jơi bơtiàn kòn sau Israel dê.

¹³ Đah mattơngai lik gơs pe nơm mpồng, đah đang gơs pe nơm mpồng, đah đơm gơs pe nơm mpồng, đah mattơngai mut gơs pe nơm mpồng.

¹⁴ Dơrñang ƀòn hơ̆ gơs jơt bàr nơm lŭ lơh gơs mơnàng, di ală lŭ hơ̆ gơs sơnđan jơt bàr nă cau gơnoar bơto dờng Belàt Kòn dê.

¹⁵ Cau gơnrơh ơm đơs mơ añ, khai at dê tê dô nơm gai rnoas mơ màh nàng was ƀòn dờng, ală mpồng dờng mơ dơrñang gơ dê sơl.

¹⁶ Ƀòn dờng gơs poan đah ring bal, đah ơnàng mơ đah jòng la ring bal. Khai ai gai rnoas nàng was ƀòn, gơs pơgap bàr rbô poan rhiang kơsồ; đah jòng, đah ơnàng, đah jơnhoa ring bal lơm.

¹⁷ Khai kung was dơrñang ƀòn, gơs prau jơt pram met jơnhoa, jat be rnoas kòn mơnus, hơ̆ la rnoas cau gơnrơh dê.

¹⁸ Dơrñang geh bơt mơ lŭ bò màng gơcrà; ƀòn dờng geh bơt mơ màh ngan, sàng be krơh.

¹⁹ Ală mơnàng dơrñang ƀòn dờng dê geh bơka mơ jơh ală bơta lŭ màng. Mơnàng sơnròp mơ lŭ màng gơcrà, mơnàng bàr mơ lŭ màng tơlir trồ, mơnàng pe mơ lŭ kĕ màng, mơnàng poan mơ lŭ màng tơlir ñhơt,

²⁰ mơnàng pram mơ lŭ kĕ pơrhê, mơnàng prau mơ lŭ màng pơrhê, mơnàng poh mơ lŭ màng rmit, mơnàng phàm mơ lŭ màng tơlir dà, mơnàng sin mơ lŭ kĕ gur, mơnàng jơt mơ lŭ gơcrà tơlir, mơnàng jơt dùl mơ lŭ màng gur tơlir, mơnàng jơt bàr mơ lŭ màng gur.

²¹ Jơt bàr nơm mpồng dờng la jơt bàr nơm lŭ kràng màng, kòp nơm mpồng la dô nơm lŭ kràng màng. Gùng ƀòn dờng dê mơ màh lơm, sàng be krơh.

²² Tòm ƀòn dờng hơ̆ añ ò gŏ hìu duh khoai lơi, bơh Yàng la Yàng Tom Trồ, Bơtau Gơnoar Dờng Làm Jơh, mơ Belàt Kòn la hìu duh khoai ƀòn hơ̆ dê.

²³ Ƀòn dờng ò càng mattơngai mơ kơnhai nàng pơnđàng sòl, bơh bơta gơklŏ Yàng Tom Trồ dê àng gơcrà, mơ Belàt Kòn la bơta àng ƀòn dê.

²⁴ Ală làng bol rơp lòt rê tòm bơta àng ƀòn dê, mơ ală cau bơtau hơđang plai ù rơp cèng bơta gơklŏ bol khai dê tơmut tòm hơ̆.

²⁵ Ală mpồng dờng ƀòn dê ò gơs tŭ lơi til tòm trồ ngai, mơ tềng hơ̆ ò gơs trồ mang.

²⁶ Bơta gơklŏ mơ bơta ryŭ ryơm ală làng bol dê rơp geh cèng tơmut tòm hơ̆.

²⁷ Ò gơs bơta ngkòr ngkàc lơi, ò gơs cau cù kìr lơi hala cau blac chừt lơi geh mut tềng hơ̆, mơya mìng ală cau neh geh cih sơnđan mat tòm sră bơta kis Belàt Kòn dê geh mut lơm.