Yal Tơlik 19 - Sră Goh 2018

Bơta đơs chò jòng ro hơđang trồ

¹ Tơnơ̆ mơ hơ̆ añ kơno hơđang trồ gơs jơnau driau dờng gơlơh be mpồl bol oă đơs lah: “Haleluya! Bơta dong klàs, bơta gơklŏ, mơ gơnap gơnoar gơrê bal mơ Yàng Tom Trồ bol he dê.

² Bơh ală bơta cahrña Kơnràñ dê la song ngan mơ song ring; Kơnràñ neh lơh nền glài cau ùr dri tơlàr dờng, la cau neh ai bơta rềs àr bơrnàn khai dê nàng lơh ồm lề plai ù, mơ Kơnràñ neh sal tê di khai bơh mhàm ală dĭ gơna Kơnràñ dê.”

³ Bol khai đơs dô dơ̆ tai lah: “Haleluya! Ñhŭ ồs khai dê gơguh hơđang jơl sùm sùm ò lồi.”

⁴ Bàr jơt poan nă cau kwang kra bal mơ poan nơm phan wìn kis tơmbic să duh khoai Yàng Tom Trồ la Bơtau nggui hơđang sơbàn, mơ đơs lah: “Amen. Haleluya!”

⁵ Bơh di sơbàn hơ̆ gơs jơnau đơs lah: “Ơ jơh ală bol mê la dĭ gơna Kơnràñ dê mơ ală cau duh rngòt di Kơnràñ, ală cau dềt mơ ală cau dờng, Jòng ro tĕ Yàng Tom Trồ bol he dê.”

Bơta pơjum sa tòmbau Belàt Kòn

⁶ Chòp añ kơno jơnau gơlơh be jơnau dô mpồl bol oă, be jơnau oă dà hòr, mơ be jơnau ntơr kơnàs dờng, đơs lah: “Haleluya! Bơh Yàng la Yàng Tom Trồ bol he dê, la Bơtau Gơnoar Dờng Làm jơh, gơs gơnoar at bồ.

⁷ Bol he hòn chò mơ hừh hơh tĕ, jòng ro tĕ Kơnràñ; Bơh bơta tòmbau Belàt Kòn dê neh tus rau, mơ bau ùr Kơnràñ dê neh sơmpô să sir rau.

⁸ Neh ai khai in soh ào bài che dơmài lơbơn àng gơcrà mơ sàng goh bơh bài che dơmài lơbơn hơ̆ la ală broă song ring ală cau sàng goh dê.”

⁹ Cau gơnrơh sồr añ lah: “Cih tĕ jơnau do: Lơngai ală cau in neh geh jà tus pơjum sa tòm bơta tòmbau Belàt Kòn dê.” Khai đơs tai lah: “Hơ̆ la jơnau song ngan Yàng Tom Trồ dê.”

¹⁰ Gen añ tơmbic să di jơng khai nàng duh khoai khai, mơya khai đơs mơ añ lah: “Bañ lơh behơ̆, añ la cau bơyô duh broă bal mơ mê mơ oh mi mê sơl, la ală cau lơh cơng bơh Yàng Jesu. Duh khoai tĕ Yàng Tom Trồ. Bơh jơnau song mơ Yàng Jesu neh ràng tơlik la bơta lơh rngoh rngac ală cau gơnoar hwơr in.”

Bơtau hào ơseh kò

¹¹ Chòp añ gŏ trồ gơ pò, ne, gơs dô nơm ơseh kò. Bơtau hào hơđang ơseh hơ̆ sơnđan la Bơtau Dòn Song mơ Song Ngan; Kơnràñ cahrña mơ tòmlơh jat bơta song ring.

¹² Gar mat Kơnràñ dê be lơmpiat ồs, bồ ndau oă sơgơn bơtau; gơs cih dô sơnđan, sơnđan hơ̆ rlau mơ Kơnràñ ò gơs cau lơi git.

¹³ Kơnràñ soh ào ñòm mhàm, sơnđan Kơnràñ la Jơnau Yàng Tom Trồ dê.

¹⁴ Ală mpồl ling hơđang trồ soh ào bài che dơmài lơbơn, bò mơ goh, hào ơseh kò lòt jat Kơnràñ.

¹⁵ Gơs dô ngkơr đào sồt lik bơh di bơr Kơnràñ nàng lơh ală làng bol; Kơnràñ rơp ngui gai lòs nàng at bồ bol khai. Kơnràñ rơp jă mpal pat tơrnòm bơta gơjrañ dờng gơhào khuh ngan Yàng Tom Trồ dê, la Bơtau Gơnoar Dờng Làm Jơh.

¹⁶ Hơđang ào mơ di bơnô Kơnràñ dê gơs cih dô sơnđan lah: BƠTAU ALĂ BƠTAU DÊ MƠ YÀNG ALĂ YÀNG DÊ.

Pha rlau mơ phan poan jơng mơ cau gơnoar hwơr ma blac

¹⁷ Gen añ gŏ dô nă cau gơnrơh ntào tòm mattơngai; khai hòi driau dờng, sồr jơh ală sềm par digùl trồ lah: “Lòt tus tĕ pơjum tòm bơta pơjum sa dờng Yàng Tom Trồ dê,

¹⁸ nàng sa poac ală cau bơtau dê, poac ală cau kwang dờng tòmlơh, poac ală cau pràn kơldang, poac ală ơseh mơ ală cau hào ơseh, mơ poac jơh ală cau dê, cau geh khat gơboh mơ cau dĭ gơna, cau dềt mơ cau dờng.”

¹⁹ Añ gŏ phan poan jơng mơ ală cau bơtau hơđang plai ù bal mơ ală mpồl ling bol khai dê pơjum bal nàng tòmlơh mơ Bơtau hào ơseh bal mơ mpồl ling Kơnràñ dê.

²⁰ Phan poan jơng kòl kup bal mơ cau gơnoar hwơr ma blac la cau neh lơh ală tềl krơi di đap gơ, nàng pơrlồm ală cau neh dòp tềl phan poan jơng dê mơ ală cau duh khoai rùp gơ; bàr nă bol khai gam kis mơ kong sơrbì tòm brong ồs hơng mơ siau.

²¹ Ală cau gam wơl gen kong sreh chơt mơ đào lik bơh di bơr Bơtau hào ơseh, mơ jơh ală sềm geh sa hòm mơ poac bol khai dê.