Yal Tơlik 16 - Sră Goh 2018

Poh bơta rung rài lồi dut dùh tòm ù

¹ Añ kơno dô jơnau dờng bơh di hìu duh khoai đơs mơ poh nă cau gơnrơh lah: “Lòt tĕ, tuh poh nơm mơngàn bơta gơjrañ dờng Yàng Tom Trồ dê tòm ù.”

² Cau gơnrơh sơnròp lik lòt mơ tuh mơngàn khai dê tòm ù, gen gơs toh kiat iơh rmơh mơ jê sồt ngan hơđang ală cau neh gơs tềl phan poan jơng dê mơ duh khoai rùp gơ.

³ Cau gơnrơh dơ̆ bàr tuh mơngàn khai dê tòm dàlềng, gen dàlềng gơlik gơs mhàm kung be mhàm cau chơt, mơ jơh ală phan kis tòm dàlềng chơt jơh.

⁴ Cau gơnrơh dơ̆ pe tuh mơngàn khai dê tòm ală hiòng dà mơ ală croh dà, gen dà gơlik gơs mhàm.

⁵ Añ kơno cau gơnrơh gơs gơnoar hơđang ală dà đơs lah: “Ơ Bơtau gam gơs mơ neh gơs, la Bơtau sàng goh, Kơnràñ la song ring tài bơh Kơnràñ neh cahrña be do.

⁶ Bơh bol khai neh lơh gơhòr mhàm ală cau sàng goh mơ ală cau gơnoar hwơr dê, gen Kơnràñ neh ai bol khai in hùc mhàm, la di pal ngan!”

⁷ Mơ añ kơno cơnòng duh khoai đơs lah: “Ngan, khoai Yàng la Yàng Tom Trồ, Bơtau Gơnoar Dờng Làm Jơh, Ală bơta cahrña Kơnràñ dê la song ngan mơ song ring.”

⁸ Cau gơnrơh dơ̆ poan tuh mơngàn khai dê hơđang mattơngai; gen mattơngai gơs gơnoar hur ală cau mơ ồs.

⁹ Mơ ală cau kòl hur mơ ồs duh ngan, gen bol khai đơs tràl sơrbil di sơnđan Yàng Tom Trồ la Bơtau gơs gơnoar hơđang ală bơta rung rài hơ̆, mơ bol khai kung ò gơjrañ sang glài mơ ò jòng ro bơta dờng ryŭ Yàng Tom Trồ sơl.

¹⁰ Cau gơnrơh dơ̆ pram tuh mơngàn khai dê hơđang sơbàn phan poan jơng dê, gen lơgar gơ dê gơlik gơs klam jơngo, mơ ală cau kap lơmpiat he bơh bơta jê sồt

¹¹ Tài bơh bơta jê sồt mơ ală toh kiat bol khai dê, gen bol khai đơs tràl sơrbil di Yàng Tom Trồ hơđang trồ, mơ ò gơjrañ sang glài bơh ală broă iơh bơsak bol khai dê.

¹² Cau gơnrơh dơ̆ prau tuh mơngàn khai dê hơđang hiòng dờng Ơphrat, gen dà soat jơh, nàng wàs gùng ală cau bơtau in tus bơh đah mattơngai lik.

¹³ Mơ añ gŏ pe nơm hwềng cà gơlơh rùp be kit mơ lik bơh di bơr nagrài, bơh di bơr phan poan jơng mơ bơh di bơr cau gơnoar hwơr ma blac.

¹⁴ Bol gơ la hwềng ală cà dê, lơh ală tềl krơi, lik lòt tus hơ ală cau bơtau tòm làm jơh dunnia, nàng pơjum bol khai tòm bơta kơlìn tòm ngai dờng Yàng Tom Trồ dê, la Bơtau Gơnoar Dờng Làm Jơh.

¹⁵ “Do, añ tus be cau kơñau. Lơngai cau lơi in drơng kơp mơ rcang ồi ào he dê, rngòt khai ơm kuh lòi rồ mơ lòt, mơ ò kòl cau gŏ bơta ƀàssìl ƀàsso khai dê!”

¹⁶ Ală hwềng cà pơjum ală cau bơtau hơ̆ tòm dô bă tiah, jat jơnau Hebrơ sơnđan la Armagedôn.

¹⁷ Cau gơnrơh dơ̆ poh tuh mơngàn khai dê tòm pah gòi, gen gơs jơnau dờng bơh di sơbàn tòm hìu duh khoai đơs lah: “Sir rau!”

¹⁸ Gen gơs ală puhlèp, jơnau ntas dờng, ntơr kơnàs mơ lơnggơr ù dờng ngan, tian gơs bơh di tŭ gơs jơi kòn mơnus hơđang ù kung òhềt gơs bơta lơnggơr ù lơi dờng mơ pràn ngan behơ̆.

¹⁹ Ƀòn dờng tơrlah gơlik gơs pe pơnah, mơ ală ƀòn ală làng bol dê tơrlah tơrling jơh, mơ Yàng Tom Trồ kah wơl Babilôn dờng gen ai gơ in ñô mơngàn bơta gơjrañ dờng gơhào khuh ngan Kơnràñ dê.

²⁰ Jơh ală bồt pơlào dô jơh, ò gam gŏ dô nơm mơnơm lơi tai.

²¹ Gơs mìu piar dờng bơh đang trồ dùh hơđang ală cau, kòp nơm piar kơnjơ̆ pơgap dô talơng, mơ ală cau đơs tràl sơrbil di Yàng Tom Trồ tài bơh bơta rung rài mìu piar hơ̆, bơh bơta rung rài hơ̆ la dờng kơnjơ̆ ngan ò git lơh.