Yal Tơlik 12 - Sră Goh 2018

Cau ùr mơ nagrài

¹ Lồc behơ̆, hơđang trồ gơlik gơs dô nơm tềl krơi dờng; gơs dô nă cau ùr soh mattơngai, gơs kơnhai hơđơm jơng khai dê, mơ di bồ ndau sơgơn bơtau jơt bàr nơm sơmañ.

² Khai bun mơ driau dờng bơh bơta bòl glar jê deh.

³ Hơđang trồ kung gơlik gơs dô nơm tềl krơi ndai tai sơl: Ne, dô nơm nagrài dờng, să pơrhê, poh nơm bồ, jơt nơm ngke, ală bồ gơ ndau poh nơm sơgơn bơtau.

⁴ Tiang gơ hwài dô pơnah pe ală sơmañ hơđang trồ mơ sơrbì tòm plai ù. Nagrài hơ̆ ơm ntào di đap cau ùr mòr deh, nàng gơ rgơi sa loan kòn khai dê tòm tŭ khai geh deh.

⁵ Cau ùr hơ̆ deh dô nă kòn klau, kòn klau hơ̆ rơp ngui dô nơm gai lòs nàng at bồ jơh ală làng bol. Mơya kòn klau hơ̆ geh cèng guh hơ Yàng Tom Trồ, tus hơ sơbàn Kơnràñ dê.

⁶ Ai cau ùr hơ̆ dô pleh tòm ƀlàng bràs, tềng hơ̆ khai gơs dô bă tiah Yàng Tom Trồ neh rcang sir khai in, tòm tiah hơ̆ khai geh ròng siam tòm dô rbô bàr rhiang prau jơt ngai.

Nagrài kong alah di ală cau gơnrơh

⁷ Mơ tai, hơđang trồ gơs dô bơta tòmlơh: Mikael mơ ală cau gơnrơh khai dê tòmlơh mơ nagrài, nagrài mơ ală cau gơnrơh gơ dê tòmlơh wơl.

⁸ Mơya bol gơ kong alah, mơ hơđang trồ ò gam gơs tiah lơi bol gơ in tai.

⁹ Nagrài dờng kong sơrbì, hơ̆ la bơs yau, sơnđan la Cà ràk mơ cà Satan, cau jak pơrlồm jơh dunnia; gơ kong sơrbì tòm plai ù, mơ ală cau gơnrơh gơ dê kung kong sơrbì bal mơ gơ sơl.

¹⁰ Gen añ kơno hơđang trồ gơs jơnau dờng đơs lah: “Tŭ do bơta dong klàs, gơnap gơnoar, lơgar Yàng Tom Trồ bol he dê, mơ gơnoar Bơtau Krist Kơnràñ dê neh tus, bơh cau yă wơn oh mi bol he dê neh kong sơrbì rau, hơ̆ la cau ngai mơ mang yă wơn bol khai di đap Yàng Tom Trồ bol he dê.

¹¹ Bol khai neh geh pha lin rlau mơ gơ tài bơh kơnòm dê mhàm Belàt Kòn dê, mơ kơnòm dê jơnau lơh cơng bol khai dê, bơh bol khai ò pơlai bơta kis he dê jơl chơt.

¹² Gen tàng, ơ ală tap trồ mơ ală cau ơm tềng hơ̆, hòn chò tĕ! Mơya bòl glar ù tiah mơ dàlềng in, bơh cà ràk neh gơhào gơjrañ dờng mơ mù tus hơ bol mê, tài bơh gơ git tŭ tơngai gơ dê ò gam jŏ tai!”

Nagrài kup kơryan cau ùr mơ kòn sau khai dê

¹³ Dơ̆ nagrài gŏ gơ neh kòl sơrbì tòm plai ù, gen gơ ting jat cau ùr neh deh kòn klau.

¹⁴ Mơya cau ùr geh ai bàr nơm đar klàng bung dờng, tồ khai rgơi par pleh bơh di bơs mơ tus tiah khai ơm tòm ƀlàng bràs; tềng hơ̆ khai geh ròng siam tòm dô tơngai, ală tơngai mơ nggùl tơngai.

¹⁵ Bơs broac dà bơh di bơr gơ dê gơlik gơs be dô nơm hiòng jat bơh tơnơ̆ cau ùr, nàng cèng pơrdô khai tòm hiòng dà hơ̆.

¹⁶ Mơya plai ù dong kòl cau ùr, gơ ha bơr hùc hiòng dà mơ nagrài neh broac bơh di bơr gơ.

¹⁷ Gen nagrài gơhào gơjrañ di cau ùr, mơ lòt tòmlơh mơ ală cau ndai tòm jơi bơtiàn cau ùr hơ̆ dê, la ală cau prap gàr ală bơta sồr lam Yàng Tom Trồ dê mơ gơs jơnau lơh cơng bơh Yàng Jesu.

¹⁸ Nagrài ntào hơđang bràs di gah dàlềng.