Yal Tơlik 11 - Sră Goh 2018

Bàr nă cau lơh cơng

¹ Gơs cau ai añ in dô nơm gai jra gơlơh be dô nơm gai rnoas mơ đơs lah: “Ntào tĕ, mơ was hìu duh khoai Yàng Tom Trồ dê, cơnòng guh khoai, mơ ală cau duh khoai tềng hơ̆.

² Mơya ƀlàng jơng gùng hìu duh khoai gen lòi tĕ bañ was, bơh tiah hơ̆ neh lòi ală làng bol bơdìh in; bol khai rơp jă ƀòn dờng sàng goh tòm poan jơt bàr kơnhai.

³ Añ rơp ai gơnoar bàr nă cau lơh cơng Añ jê đơs hwơr tòm dô rbô bàr rhiang prau jơt ngai, bol khai soh ào bài sơnò kiat.”

⁴ Bàr nă cau hơ̆ la bàr nơm chi Ôlibe mơ bàr nơm jơng ồs đèng ntào di đap Yàng plai ù dê.

⁵ Dilah cau lơi kòñ lơh iơh dê bol khai, gen ồs lik bơh bơr bol khai sa pơrguc ală cau sò tơm di bol khai; dilah cau lơi kòñ lơh iơh di bol khai gen pal kong tơnchơt behơ̆.

⁶ Bàr nă cau hơ̆ gơs gơnoar til ală tap trồ, nàng ò gơs mìu tòm ală ngai bol khai đơs hwơr; bol khai gơs gơnoar hơđang ală dà nàng lơh dà gơlik gơs mhàm, mơ ngui jơh ală bơta rung rài nàng lơh iơh di plai ù tŭ lơi jat nùs bol khai kòñ.

⁷ Tòm tŭ bol khai neh lơh cơng sir rau gen phan poan jơng guh bơh brong jrô hùt hung rơp tòmlơh mơ bol khai, gen gơ geh pha lin rlau mơ tơnchơt bol khai.

⁸ Ƀồc bol khai dê rơp tơmbic tòm gùng me ƀòn dờng dê, jat rùp sơnio gen sơnđan la Sôdôm mơ Ejiptơ, la tiah Yàng bol khai dê kung neh kong pơng di chi pơng.

⁹ Ală cau bơh ală làng bol, ală jơi bơtiàn, ală jơnau đơs, mơ ală lơgar rơp sền gŏ ƀồc bàr nă bol khai dê tòm pe ngai mơ gùl, mơ bol hơ̆ ò ai cau tơp ƀồc hơ̆ tòm bơtô ƀồc.

¹⁰ Ală cau ơm tòm plai ù rơp hòn chò mơ pơjum ñô sa chò hòp bơh bàr nă bol khai, mơ ai gòi phan bal mơ gơp, tài bơh bàr nă cau gơnoar hwơr hơ̆ la dô bơta jê sồt bòl glar ală cau in ơm tòm plai ù.

¹¹ Tơnơ̆ mơ pe ngai mơ gùl, gơs nhơm kis bơh Yàng Tom Trồ mut tòm bol khai; gen bol khai ñă ntào, mơ ală cau gŏ bol khai gen rngòt rngơt ngan.

¹² Chòp bàr nă cau hơ̆ kơno dô jơnau dờng bơh đang trồ đơs mơ bol khai lah: “Guh tĕ hơ do.” Bàr nă bol khai guh hơ trồ tòm mhwal, di đap mat ală cau sò tơm di bol khai.

¹³ Di di jơ hơ̆ gơs dô bơta lơnggơr ù dờng ngan, dô pơnah jơt ƀòn dờng tơrlah; poh rbô nă cau chơt tòm bơta lơnggơr ù hơ̆, ai ală cau gam kis gen rngòt ngan mơ jòng ro Yàng Tom Trồ hơđang trồ.

¹⁴ Bơta bòl glar sơbơng roh dơ̆ bàr neh rlau rau; do, bơta bòl glar sơbơng roh dơ̆ pe tus mhar.

Cau gơnrơh dơ̆ poh uh kơlwòk

¹⁵ Cau gơnrơh dơ̆ poh uh kơlwòk, gen gơs ală jơnau dờng hơđang trồ đơs lah: “Lơgar bơtau dunnia dê neh gơlik lơgar Yàng bol he dê mơ Bơtau Krist Kơnràñ dê, Kơnràñ rơp at bồ jơl sùm sùm.”

¹⁶ Bàr jơt poan nă cau kwang kra ơm nggui hơđang sơbàn di đap Yàng Tom Trồ, bol khai tơmbic să duh khoai Yàng Tom Trồ,

¹⁷ mơ đơs lah: “Ơ Yàng la Yàng Tom Trồ, bơtau Gơnoar Dờng Làm Jơh, Kơnràñ Gam Gơs mơ Neh Gơs, bol hi ưnngài Kơnràñ, tài bơh Kơnràñ neh ai gơnap gơnoar dờng Kơnràñ dê mơ neh sơntòm at bồ.

¹⁸ Ală làng bol gơhào gơjrañ, mơya bơta gơjrañ dờng Kơnràñ dê neh tus. Do la tŭ ală cau chơt kong cahrña, la tŭ ai phan ƀàn ală dĭ gơna Kơnràñ dê la ală cau gơnoar hwơr, ală cau sàng goh mơ ală cau in duh rngòt di sơnđan Kơnràñ, ală cau dềt mơ ală cau dờng; mơ la tŭ tơnroh ală cau tơnroh plai ù.”

¹⁹ Chòp hìu duh khoai Yàng Tom Trồ ơm hơđang trồ geh pò tơlik, lòi cau in gŏ tòm hìu duh khoai hơ̆ gơs Đài Bơta Ho Bal Kơnràñ dê; gen gơs puhlèp, jơnau ntas dờng, ntơr kơnàs, lơnggơr ù mơ mìu piar dờng.