Yal Tơlik 10 - Sră Goh 2018

Cau gơnrơh mơ sră pồt dềt

¹ Chòp añ gŏ dô nă cau gơnrơh pràn kơldang ndai mù bơh đang trồ, soh mhwal be ào, di bồ gơs dô nơm bơrlangkang, mat khai be mattơngai, mơ jơng khai be jrong ồs.

² Khai at di tê dô pang sră pồt dềt neh pò tơlik, jơng ma khai jă hơđang dàlềng, mơ jơng kiau khai jă hơđang ù.

³ Khai hòi driau dờng be dô nơm klìu triă ơluh ơhùm, dơ̆ khai hòi driau gen poh nơm kơnàs ntơr.

⁴ Dơ̆ poh nơm kơnàs ntơr rau gen añ kòñ cih, mơya añ kơno dô jơnau bơh đang trồ đơs lah: “Til tĕ ală jơnau poh nơm kơnàs neh đơs, mơ bañ cih.”

⁵ Cau gơnrơh mơ añ neh gŏ ntào hơđang dàlềng mơ hơđang ù, khai pò tê ma hơđang trồ,

⁶ sơnio Bơtau kis gam sùm sùm ò lồi, la Bơtau neh crơng gơs trồ mơ ală phan hơđang trồ, crơng gơs ù mơ ală phan tòm ù, crơng gơs dàlềng mơ ală phan tòm dàlềng. Mơ khai srat să lah ò gơs tŭ lơi gơn tai,

⁷ mơya tus di ală ngai cau gơnrơh dơ̆ poh rơp uh kơlwòk, gen bơta ndơp ndơr Yàng Tom Trồ dê pal gơlik di ngan, jat be jơnau Kơnràñ neh yal mơ ală dĭ gơna Kơnràñ dê la ală cau gơnoar hwơr.

⁸ Jơnau đơs mơ añ neh kơno bơh đang trồ, đơs tai mơ añ lah: “Lòt tĕ, ai sră pồt neh pò tòm tê cau gơnrơh ntào hơđang dàlềng mơ hơđang ù.”

⁹ Gen añ lòt tus hơ cau gơnrơh mơ dan khai ai añ in sră pồt dềt hơ̆. Khai đơs mơ añ lah: “Ai tĕ gơ mơ sa, gơ rơp gơlik gơs bơtang tòm kơndul mê dê, mơya gơ rơp gơlik gơs lơngồt be dà lơwe tòm bơr mê dê.”

¹⁰ Añ dòp sră pồt dềt bơh dê tê cau gơnrơh mơ sa gơ, gen tòm bơr añ gơ lơngồt be dà lơwe, mơya dơ̆ añ loan gơ rau gen tòm kơndul añ gơlik bơtang.

¹¹ Mơ gơs jơnau đơs mơ añ lah: “Dô dơ̆ tai mê pal đơs hwơr bơh oă làng bol, oă lơgar, oă jơnau đơs mơ oă cau bơtau sơl.”