Yal Tơlik 1 - Sră Goh 2018

Jơnau wàs gùng ( 1:1-20 ) Jơnau yal tơnggit

¹ Bơta yal tơlik jơnau ndơp Yàng Jesu Krist dê, mơ Yàng Tom Trồ neh ai Kơnràñ in nàng yal tơlik ală dĭ gơna Kơnràñ in ală bơta rơp gơlik tus gòñ. Kơnràñ neh sồr cau gơnrơh Kơnràñ dê lòt tus yal tơlik ală bơta hơ̆ Jang in la dĭ gơna Kơnràñ dê,

² la cau neh lơh cơng bơh jơnau Yàng Tom Trồ dê mơ bơh jơnau lơh cơng Yàng Jesu Krist dê, hơ̆ la jơh ală bơta khai neh gŏ.

³ Lơngai cau in ai jơnau đơs dờng mơ sền ală jơnau gơnoar hwơr do, mơ lơngai ală cau in iat mơ prap gàr ală bơta neh cih tòm sră do, bơh tŭ tơngai neh rềp rau.

Jơnau pơyoa poh nơm Hìu Jum Goh in tòm Asia

⁴ Jang pơyoa poh nơm Hìu Jum Goh in tòm kơnhwàl Asia: Dan oh mi in geh bơta nđàc mơ bơta lơngap lơngai tus bơh Bơtau Gam Gơs, Neh Gơs mơ Rơp Tus; mơ bơh poh Hwềng ơm di đap sơbàn Kơnràñ dê,

⁵ mơ tus bơh Yàng Jesu Krist la Bơtau lơh cơng dòn song, Bơtau sơnròp kis wơl bơh bơta chơt mơ la Bơtau at bồ ală bơtau tòm plai ù. Kơnràñ kòñ gơboh di bol he, tian gơs phi să kong chơt nàng hồ toh bol he klàs bơh di tồi glài,

⁶ mơ lơh bol he in gơlik gơs lơgar cau bơtau dê, mơ cau gơnoar ơn phan duh khoai Yàng Tom Trồ in la Bèp Kơnràñ dê. Dan bơta gơklŏ mơ gơnoar pràn gơrê bal mơ Yàng Jesu Krist sùm sùm ò lồi. Amen.

⁷ Ne, Kơnràñ ơm tòm mhwal mơ tus, mơ jơh ală gar mat rơp gŏ Kơnràñ, ală cau neh hwit Kơnràñ kung gŏ sơl; mơ jơh ală jơi bơtiàn tòm plai ù rơp ñìm rac bơh Kơnràñ. Ngan behơ̆. Amen.

⁸ Yàng la Yàng Tom Trồ, Bơtau Gam Gơs, Neh Gơs mơ Rơp Tus, la Bơtau Gơnoar Dờng Làm Jơh đơs lah: “Añ la Alpha mơ Ômega.”

Bơta gơtơnggŏ bơh Bơtau Krist

⁹ Añ la Jang, la bi oh mi dê, gơs pơnah bal mơ oh mi tòm bơta rung rài, lơgar Yàng Tom Trồ, mơ tòm bơta kong ơt tòm Yàng Jesu. Añ neh ơm tòm bồt pơlào sơnđan la Patmôs, tài bơh jơnau Yàng Tom Trồ mơ jơnau lơh cơng bơh Yàng Jesu.

¹⁰ Tòm ngai Yàng dê añ gơs Yàng Hwềng lơh rngoh rngac, mơ añ kơno bơh tơnơ̆ añ gơs jơnau ntas dờng be kơlwòk lah:

¹¹ “Cih tĕ bơta mê gŏ tòm dô dap sră mơ pơyoa poh nơm Hìu Jum Goh in: Hìu Jum Goh Ephesô, Simirnơ, Pergam, Thiatirơ, Sardis, Philadelphi, mơ Laodise.”

¹² Añ wơlke nàng sền ñcau đơs mơ añ hơ̆, mơ dơ̆ añ wơlke añ gŏ poh nơm jơng ồs đèng mơ màh,

¹³ mơ digùl ală jơng ồs đèng hơ̆ gơs dô Bơtau gơlơh be Kòn Mơnus, soh ào jrùh tus di mpàng jơng, mơ kơt che màh gùt dar ntơh.

¹⁴ Bồ mơ sŏ Kơnràñ dê bò be sơnò belàt kò, bò be piar; gar mat Kơnràñ dê be lơmpiat ồs;

¹⁵ jơng Kơnràñ dê gơlơh be kòng àng gơcrà, neh ryă tòm bơnhă ồs; mơ jơnau đơs Kơnràñ dê be jơnau ală dà nggồr.

¹⁶ Tê ma Kơnràñ dê at poh nơm sơmañ; di bơr Kơnràñ gơlik dô nơm đào sồt bàr đah mat; mơ muh mat Kơnràñ dê be mattơngai tòm tŭ pơnđàng sòl gơcrà be digùl ngai.

¹⁷ Dơ̆ añ gŏ Kơnràñ, añ gơcup blup di jơng Kơnràñ be cau chơt. Mơya Kơnràñ ai tê ma ƀư di să añ, mơ đơs lah: “Bañ rngòt, Añ la Bơtau Sơnròp mơ Bơtau Lồi Dut,

¹⁸ Añ la Bơtau Kis; Añ neh chơt, mơ do Añ kis gam sùm sùm, at ală kai mpồng Bơta chơt mơ Lơgar Làng ƀồc.

¹⁹ Tŭ do cih tĕ ală bơta mê gŏ, ală bơta gơs tŭ do mơ ală bơta rơp gơlik tus tơnơ̆.

²⁰ Ai bơta ndơp ndơr bơh poh nơm sơmañ mơ mê neh gŏ tòm tê ma Añ, mơ bơh poh nơm jơng ồs đèng mơ màh, gen poh nơm sơmañ la ală cau gơnrơh poh nơm Hìu Jum Goh dê, mơ poh nơm jơng ồs đèng la poh nơm Hìu Jum Goh.”