Sră Pơyoa Pol Dê Pơyoa Tit In 1 - Sră Goh 2018

Jơnau còp să

¹ Pol, dĭ gơna Yàng Tom Trồ dê mơ la cau gơnoar bơto dờng bơh Yàng Jesu Krist, nàng lam ală cau geh sac rwah Yàng Tom Trồ dê tus hơ bơta dòn mơ git wă jơnau song, la dô bơta di pal mơ bơta dòn duh,

² tòm bơta gơn kơnòm bơh bơta kis gam sùm sùm. Hơ̆ la bơta kis mơ Yàng Tom Trồ, la Bơtau ò tŭ lơi đơs blac, neh ho pơgon bơh lài mơ tŭ òhềt gơs trồ tiah,

³ mơ tus di tơngai lơh nền, Kơnràñ neh yal tơlik tòm jơnau Kơnràñ dê bơh bơta bơto yal, la bơta neh jào añ in jat be gơnoar sồr Yàng Tom Trồ dê, la Yàng Dong Klàs bol he dê.

⁴ Añ pơyoa Tit in, la kòn tòm añ jê tòm bơta dòn bal: Dan mê in geh bơta nđàc mơ bơta lơngap lơngai bơh Yàng Tom Trồ la Bèp, mơ bơh Yàng Krist Jesu la Yàng Dong Klàs bol he dê.

Broă Tit dê tòm ƀòn Kret

⁵ Añ neh lòi wơl mê tòm Kret nàng mê rơndap ală broă òhềt sir, mơ pồ bơtào ală cau kwang kra tòm kòp nơm ƀòn dờng, jat be añ neh nting sồr mê:

⁶ Cau kwang kra pal la cau ò gơs tiah geh lah pơrhơng, la cau klau gơs mìng dô nă bau ùr lơm, kòn sau kung pal dòn Yàng mơ ò gơkòl cau yă bơh bung jang hala ò dòn bơr.

⁷ Bơh cau at bồ hìu Yàng Tom Trồ dê gen pal ò gơs tiah geh lah pơrhơng, ò di lơh be tơl, ò di mhar gơjrañ, ò di tơhìr tơrnòm alak, ò di lơh rhung rhang, ò di hàm hà cồng nha ƀơ̆ ƀơl,

⁸ mơya pal git wă rò nac, gơboh di bơta niam, kràñ cê, song ring, sàng goh, git kơrhia.

⁹ Khai prap kơ̆ jơnau pal dòn be neh kơno bơto sồr, tồ khai rgơi bơto tơngkah bơh gùng jơnau song mơ bơto tơnggit cau tòmdră in.

Nùs nhơm ò niam cau Kret dê

¹⁰ Bơh gơs oă cau ò dòn duh, lài ngan la mpồl cau kòñ prap gàr bơta siat gơltau, bol khai jak đơs gơlềng gơlàng mơ la cau blac pơrlồm;

¹¹ mê pal lơh bơr bol khai in ơm mŏ mŏ; bơh cồng nha ƀơ̆ ƀơl mơ bol khai bơto bơta ò di pal bơto, mơ lơh gơprah jơh hìu nhă cau ƀà dê.

¹² Dô nă tòm mpồl bol khai, hơ̆ la cau gơnoar hwơr bol khai dê, neh đơs lah: “Cau Kret òs đơs blac, la phan poan jơng jàñ bơsak, jròk sa mơ lơh alah.”

¹³ Jơnau lơh cơng hơ̆ la song ngan. Behơ̆ pal lah pơrhơng kơnjơ̆ bol khai tồ bol khai in gơs bơta dòn pràn kơldang,

¹⁴ ò di iat jơnau gơlềng gơlàng cau Juda dê, mơ bơta sồr lam kòn mơnus la cau pơrlac sang jơnau song.

¹⁵ Jơh ală bơta la sàng goh gơwèt mơ ală cau sàng goh, mơya ò gơs bơta lơi la sàng goh gơwèt mơ ală cau ƀơ̆ ƀơl mơ cau ò dòn; gơpơrlơ̆ wơl, nùs kơlôi mơ nùs tồr bol khai dê la ƀơ̆ ƀơl lơm.

¹⁶ Bol khai đơs lah bol khai git Yàng Tom Trồ, mơya ală broă lơh bol khai dê la pơndang sang Kơnràñ; cau cù kìr di bol khai, bol khai la cau ò dòn bơr mơ ò rgơi lơh dô nơm broă niam lơi.