Sră Ôse 9 - Sră Goh 2018

Lơh glài gơwèt mơ tồi glài Israel dê

¹ Ơ Israel bañ hòn chò; bañ chò hòp be ală làng bol ndai; Bơh mê neh lơh dri tơlàr mơ sang lòi Yàng Tom Trồ mê dê. Mê kòñ gơboh jền tơngai dô nă cau ùr dri tơlàr dê tòm kòp nơm làn pơrjòt kòi.

² Ală làn jă kòi mơ ală yang tơrnòm rơp ò ròng siam bol khai; tơrnòm pa rơp lơh bol khai in roh bơta gơn kơnòm.

³ Bol khai rơp ò gam ơm wơl tòm lơgar Yàng Jehôwa dê; mơ Epraim rơp rê wơl hơ Ejiptơ, mơ tòm Asiri bol khai rơp sa phan sa ƀơ̆ ƀơl.

⁴ Bol khai rơp ò ơn phan duh khoai mơ tơrnòm ño Yàng Jehôwa in, ală phan ơn pơdơng bol khai dê rơp ò niam nùs Kơnràñ; ală phan ơn duh khoai hơ̆ rơp be la phan sa ală cau ñìm ƀồc; Jơh ală cau lơi sa gơ rơp gơlik ƀơ̆ ƀơl, piang lă bol khai dê rơp la phan sa lòi cau jơgloh bol khai in, gơ ò geh cèng tus hơ hìu Yàng Jehôwa dê.

⁵ Ñchi bol mê rơp lơh tòm ngai neh lơh nền bơta pơjum sa dê, mơ tòm ngai bơta pơjum sa Yàng Jehôwa dê taih?

⁶ Bulah dilah bol khai dô klàs bơh bơta tơnroh, Ejiptơ rơp pơjum tơrgòm bol khai, Memphis rơp tơp ƀồc bol khai. Rlau lò rơp tòmpìt ai ală phan màng mơ priă bol khai dê, mơ tòm lò rơp hòn tòm sàl bol khai dê.

⁷ Ală ngai lơh glài neh tus rau! Ală ngai sal tê neh tus rau! Israel ñìm nggà. Cau gơnoar hwơr gơlik bơrngơl gơla, cau gơs hwềng Yàng gơlik sơnrang sơnrồng, tài bơh tồi glài bol mê dê la kơnjơ̆ ngan, mơ bơta sòdră bol mê dê la dờng.

⁸ Cau gơnoar hwơr la cau kơp gàr Yàng Tom Trồ añ jê hơđang Epraim, mơya neh gơlik gơs cau pơt dă tòm jơh ală gùng dà khai dê, mơ la bơta sòdră tòm hìu Yàng Tom Trồ khai dê.

⁹ Bol khai gơkram jrô tòm bơta tìs nrah bol khai dê be tòm ală ngai Gibea dê. Yàng Tom Trồ rơp kah wơl bơta iơh bơsak bol khai dê, mơ rơp lơh glài tài bơh tồi glài bol khai dê.

¹⁰ Tòm tŭ Añ jòi bàn Israel, kung be jòi bàn tơrkum plai ño tòm ƀlàng ngềt ngơt; tòm tŭ Añ gŏ ală ồng pàng bol mê dê, gen kung be gŏ plai chi ƀal gơlik plai sơnròp tòm bồ sơnam. Mơya bol khai neh lòt tus hơ Baal Pheô, bol khai ơn să tòm bol khai rùp ràk ƀàssìl ƀàsso in, mơ gơlik gơs cù kìr kung be phan mơ bol khai neh kòñ gơboh.

¹¹ Bơta gơklŏ Epraim dê rơp par roh thit be sềm; ò deh, ò bun, ò ƀô bun.

¹² Bulah bol khai ròng siam kòn sau, Añ rơp tơnroh bol khai, jơl tus ò gam gơs dô nă lơi. Bòl glar ngan bol khai in tòm tŭ Añ lik bơh bol khai!

¹³ Añ neh sền gŏ Epraim kung be chi gòl tơô neh geh tam tòm ƀlàng ñhơt hàng mơnĕ ngan; mơya tŭ do Epraim pal lam kòn sau khai dê tus nàng kong tơnchơt!

¹⁴ Ơ Yàng Jehôwa, dan ai tĕ bol khai in. Ñchi bơta Kơnràñ rơp ai bol khai in taih? Dan ai bol khai in hìu kòn gơyò rlơs mơ toh ro rañ.

¹⁵ Jơh ală bơta iơh bơsak bol khai dê sơntòm tòm Gilgal; tềng hơ̆ Añ tus nàng gơjrañ di bol khai. Tài bơh ală broă iơh bơsak bol khai neh lơh, Añ rơp ting bơtrơh bol khai lik bơh hìu Añ. Añ rơp ò kòñ gơboh dê bol khai tai; Jơh ală cau kwang at bồ bol khai dê la cau tòmdră.

¹⁶ Epraim kong tơnroh, ryas bol khai neh ro. Bol khai rơp ò gơlik plai tai; bulah bol khai deh kòn, añ kung rơp tơnchơt kòn sau kòñ gơboh hìu kòn bol khai dê.

¹⁷ Tài bơh bol khai ò iat jơnau Kơnràñ, Yàng Tom Trồ añ jê rơp sang lòi bol khai; bol khai rơp gơlik gơs ală cau nrah nring tòm ală lơgar.