Sră Ôse 8 - Sră Goh 2018

Bơta pơndang sang Yàng cau Israel dê

¹ Ơn tĕ kơlwòk di sơndồi mê! Cau sò tơm gơlơh be klàng bung neh tus hơđang hìu Yàng Jehôwa dê, tài bơh bol khai neh sang lòi bơta ho bal Añ jê, mơ neh lòt rlau ir mơ bơta boh lam Añ jê.

² Israel hòi dan mơ Añ lah: “Khoai Yàng Tom Trồ añ jê, bol hi la cau Israel, bol hi git Kơnràñ!”

³ Mơya Israel neh sang tơlik bơta niam, cau sò tơm rơp ting jat bol khai.

⁴ Bol khai neh pồ bơtào ală cau bơtau ò di bơh Añ, bol khai sac rwah ală cau kwang at bồ mơ Añ ò dô nùs bal. Bol khai ai màh priă bol khai dê nàng lơh gơs ală rùp ràk, nàng bol khai in kong tơnroh.

⁵ Ơ Samari, rùp ràk kơnrồ kòn bol mê dê neh kòl sang lòi rau! Bơta gơjrañ dờng Añ jê neh chu pơrguc tòmdră mơ bol khai. Jơl tus tŭ lơi sồng bol khai ò rgơi tìs glài taih?

⁶ Bơh rùp ràk hơ̆ gơlik bơh Israel! Dô nă cau chài neh tŏ gơs gơ; gơ ò di la Yàng Tom Trồ. Kơnrồ kòn Samari dê rơp kong bơcah rpot rpet.

⁷ Bol khai neh sih càl mơ rơp toès rbut dờng. Kòi bol khai dê ò hòn niam; gơ rơp ò gơlik gar. Dilah gơ gơlik gar, gen cau làng bol bơdìh rơp sa loan jơh.

⁸ Làng bol Israel neh kong sa loan; Tŭ do bol khai ơm digùl ală lơgar, kung be dô nơm phan ngui ò kwơ.

⁹ Bơh bol khai neh lòt tus hơ Asiri, kung be dô nơm alàng brê lòt is gơlềng gơlàng. Epraim neh tòmpơyòm mơ ală cau khai kòñ gơboh.

¹⁰ Bulah bol khai neh tòmpơyòm bơh bơta tac rwat mơ ală làng bol, tŭ do Añ rơp pơjum tơrgòm bol khai wơl. Ò jŏ tai bol khai rơp kong pơnjê pơngkồr oă ngan hơđơm ơnòng kơnjơ̆ ală cau bơtau mơ cau kwang at bồ dê.

¹¹ Tòm tŭ Epraim bơtơl oă cơnòng duh khoai nàng ơn phan tơwài glài, gen ală cơnòng duh khoai hơ̆ sơlo lơh khai in gơlik gơs tìs glài.

¹² Bulah Añ neh cih khai in bơtơl oă bơta nting sồr Añ jê, mơya khai sền gơ kung be dô nơm phan crih mat.

¹³ Bulah bol khai ơn phan duh khoai niam Añ in, bulah bol khai sa poac, Yàng Jehôwa kung ò dòp bol khai. Tŭ do Kơnràñ kah wơl bơta tồi glài bol khai dê, mơ lơh glài bơh tồi glài bol khai dê, bol khai rơp rê wơl hơ Ejiptơ.

¹⁴ Israel neh hŭi Bơtau crơng gơs bol khai, mơ bơt bơtào ală hìu gơlang; Juda neh bơtơl oă ƀòn dờng kơ̆ cê. Mơya Añ rơp sồr ồs tus hơđang ală ƀòn dờng bol khai dê, mơ gơ rơp sa pơrguc jơh ală tiah kơ̆ cê hơ̆ bol khai dê.