Sră Ôse 5 - Sră Goh 2018

Bơta cahrña tòmdră mơ Israel

¹ Ơ ală cau gơnoar ơn phan duh khoai, iat tĕ! Ơ hìu Israel, ai tĕ tồr iat! Ơ hìu nhă cau bơtau dê, ơm iat tĕ! Do la bơta cahrña gơrê mơ bol mê. Bol mê la dă pơt tòm Mispa, mơ la bơtơng dang hơđang Thabôr;

² mơ la dô nơm trồm neh tò jrô tòm Sittim; mơya Añ rơp lơh glài jơh tơl nă bol khai.

³ Añ git Epraim, mơ Israel ò geh pồn ndơp bơh di Añ. Ơ Epraim, bơh mê neh lơh dri tơlàr, Israel neh gơlik ƀơ̆ ƀơl.

⁴ Broă lơh bol khai dê ò ai gơnoar bol khai rê wơl hơ Yàng Tom Trồ bol khai dê. Nùs nhơm dri tơlàr neh gơs tòm bol khai, bol khai ò git Yàng Jehôwa.

⁵ Bơta pơnhừ să Israel dê lơh cơng tòmdră wơl mơ bol khai, Epraim gơpừ tòm tồi glài bol khai dê; Juda kung gơplơ̆ bal mơ bol khai sơl.

⁶ Bol khai cèng bal ală mpồl belàt mơ ală mpồl kơnrồ bol khai dê nàng jòi jat Yàng Jehôwa; mơya bol khai rơp ò bàn Kơnràñ; Kơnràñ neh lik bơh di bol khai.

⁷ Bol khai ò dòn song mơ Yàng Jehôwa, bol khai deh ală kòn ò di pal. Tŭ do, ngai Dùl lik rơp sa loan bol khai bal mơ ală ƀlàng sre bol khai dê.

⁸ Uh tĕ kơwào tòm Gibea, uh tĕ kơlwòk tòm Rama. Driau dờng yal tơnggit tĕ tòm Bet Aben, Ơ Benjamin sền rmê tĕ bơh đah ngkòi mê.

⁹ Epraim rơp gơlik gơs tiah ngềt ngơt tòm ngai bơta lơh glài. Digùl ală jơi bơtiàn Israel dê, Añ yal tơnggit ală bơta rơp gơlik gơs nền cê ngan.

¹⁰ Ală cau kwang at bồ Juda dê gơlik gơs be ală cau ntròn lŭ nhàr ù; Añ rơp tuh bơta gơjrañ dờng Añ jê hơđang bol khai kung be tuh dà.

¹¹ Epraim kong rồn bơklơn, kong jă tơnlề tòm bơta cahrña, tài bơh khai neh lơh nền lòt jat ală bơta roh lơm.

¹² Gen tàng añ lơh kung be mŏ tu hơ Epraim, kung be bơta ồm lề hơ làng bol Juda.

¹³ Tòm tŭ Epraim neh gŏ bơta kòp jê khai dê, mơ Juda neh gŏ tềl sồt, gen Epraim lòt tus hơ cau Asiri, mơ sồr lòt tus hơ bơtau dờng. Mơya khai ò rgơi sơm bơta kòp jê bol mê hala sơmbòi ală tềl sồt bol mê dê.

¹⁴ Bơh Añ rơp kung be dô nơm klìu triă gơwèt hơ Epraim, dô nơm klìu triă brồ dam gơwèt hơ hìu Juda. Să tòm Añ rơp crè bol khai mơ lòt ngài; Añ rơp cèng pơrdô bol khai, mơ ò gơs dô nă cau lơi rơp dong tă.

¹⁵ Gen Añ rơp rê wơl hơ tiah ơm Añ jê, jơl tus di tŭ bol khai đal git tồi glài bol khai dê, mơ jòi jat muh mat Añ; Tòm bơta bòl glar, bol khai rơp jơh nùs rac dan bơta niam nùs Añ jê.