Sră Ôse 13 - Sră Goh 2018

Bơta gơjrañ dờng Yàng Jehôwa dê gơwèt hơ Israel

¹ Tòm tŭ Epraim đơs, cau rơm să rngòt; khai neh geh yò tơngguh tòm Israel. Mơya khai neh tìs glài duh khoai Baal mơ kong chơt.

² Tŭ do bol khai kư̆ tìs glài sơlo ngai sơlo gơbơtơl tai; mơ lơh gơs dô nơm rùp bol khai in, ală rùp ràk mơ priă jat be bơta git wă bol khai dê, jơh ală bol gơ la broă lơh bơh tê cau chài lơh dê. Bol khai đơs lah: “Ơn tĕ phan ơn duh khoai bol gơ in.” Làng bol cum rùp ràk kơnrồ kòn.

³ Behơ̆ tàng bol khai rơp gơlik kung be dà mơryuh àng drim, kung be dà tŭ rìng àng drim mhar roh thit, kung be nsiap càl khồm pơrdô bơh làn pơrjòt kòi, kung be ñhŭ lik bơh mpồng dềt.

⁴ Bơh Añ la Jehôwa Yàng Tom Trồ mê dê, la Bơtau neh dong tă mê lik klàs bơh lơgar Ejiptơ, rlau mơ Añ mê bañ dòp git yàng lơi ndai; ò gơs Bơtau Dong Klàs lơi ndai tai rlau mơ Añ.

⁵ Hơ̆ la Añ neh ròng siam mê tòm ƀlàng ngềt ngơt, tòm tiah rañ rsơh.

⁶ Tòm tŭ Añ ròng siam bol khai, gen bol khai geh hừh nùs, bol khai geh hừh nùs, gen nùs bol khai gơlik pơnhừ să, gen tàng bol khai neh hŭi Añ.

⁷ Tài behơ̆, Añ rơp gơlik be dô nơm klìu triă brồ tus hơ bol khai, kung be dô nơm klìu sơmañ kơp mòc di gah gùng.

⁸ Añ rơp brồ hơđang bol khai be dô nơm jơgơu neh roh kòn, Añ rơp crè lề lac ntơh jơm plai nùs bol khai dê. Tềng hơ̆, Añ rơp sa tơrging bol khai be dô nơm klìu triă, kung be dô nơm phan brê crè poac bol khai rpot rpet.

⁹ Ơ Israel, Añ rơp tơnroh mê, ñcau rơp dong kòl mê taih?

¹⁰ Tŭ do ntềng đah bơtau mê dê nàng khai dong tă mê taih? Ntềng đah ală cau kwang at bồ tòm jơh ală ƀòn dờng mê dê, nàng mê đơs mơ bol khai lah: “Ai tĕ añ in dô nă cau bơtau mơ ală cau kwang at bồ”?

¹¹ Behơ̆ tòm bơta gơjrañ Añ jê, Añ ai mê in dô nă bơtau, mơ tòm bơta gơjrañ dờng Añ jê, Añ tă tơlik cau bơtau hơ̆.

¹² Bơta tìs glài Epraim dê neh pùt wơl, tồi glài khai dê neh cih kah.

¹³ Bơta jê sồt kung be cau ùr jê deh rơp tus mơ khai, mơya khai la dô nă kòn klau ò gơs bơta jak chài; tòm tŭ jơ neh tus, khai ò tơlik mat khai di mpồng hìu kòn.

¹⁴ Añ rơp dong bol khai klàs bơh gơnap gơnoar lơgar làng ƀồc. Añ rơp tơwài bol khai klàs bơh bơta chơt sơl ơ? Ơ bơta chơt, ntềng đah bơta rung rài mê dê taih? Ơ lơgar làng ƀồc, ntềng đah bơta tơnroh mê dê taih? Bơta nđàc sơngit neh pồn ndơp bơh di mat Añ.

¹⁵ Bulah khai tơnggơs oă jơi bơtiàn digùl oh mi khai, càl đah mattơngai lik rơp tus, dô nơm càl khồm tus bơh Yàng Jehôwa, guh bơh ƀlàng ngềt ngơt, mơ croh dà khai dê rơp soat mơ hiòng dà khai dê rơp rañ. Đam jàr khai dê gen cau rơp tòmpìt ai jơh ală phan màng neh prap lòi.

¹⁶ Samari rơp àñ glài bol khai dê, tài bơh khai neh bơtào tòmdră mơ Yàng Tom Trồ bol khai dê. Bol khai rơp gơpừ bơh đào; ală kòn dềt bol khai dê rơp kong jă tơnlề tòm tiah, mơ ală cau ùr gơs bun bol khai dê rơp kong reh kơndul.