Sră Jop 5 - Sră Goh 2018

Eliphas đơs pơnjat lah Yàng Tom Trồ lơh glài tơmàl Jop

¹ “Tŭ do hòi tĕ! Gơs cau lơi rơp ho wơl ồng in sơl? Mơ ñcau tòm ală cau sàng goh ồng rơp hòi dan taih?

² Bơta lơh sơềt sơềl tơnchơt cau bơrngơl gơla, Bơta ƀoah pơrhiat tơnchơt cau ƀă liă.

³ Añ neh gŏ cau bơrngơl gơla sro ryas, Mơya nisơna añ neh srat rma tiah ơm khai dê.

⁴ Kòn sau bol khai dê ngài bơh bơta lơngap lơngai, bol khai gơkòl tơnlề di mpồng ƀòn, mơ ò gơs cau lơi dong tă bol khai;

⁵ Cau jơgloh sa kơnhai toès bol khai dê, Mơ tòmpìt ai gơ bulah tòm ală rlau lò, Mơ cau tơhìr hàm kòñ phan mơna bol khai dê.

⁶ Bơta rung rài ò tus bơh ù, Mơ bơta dơrcul ò gơcat bơh ù tiah;

⁷ Mơya kòn mơnus geh deh nàng kong bòl glar, kung be lơmpiat ồs gơ par guh hơđang.

⁸ Ai añ, añ rơp jòi Yàng Tom Trồ, Añ rơp jào Kơnràñ in bơta gơrềng tus añ jê.

⁹ Kơnràñ lơh ală broă dờng ò rgơi jòi bàn, Lơh ală bơta crih crài ò rgơi kòp.

¹⁰ Kơnràñ ai mìu hơđang ù, Mơ sồr dà tus tòm ală ƀlàng sre.

¹¹ Kơnràñ ơn hơđang tiah jơnhoa ală cau bơh tiah liah, Ală cau moat jrùng ñìm rac geh yò tơngguh hơ tiah ring lơngai ngan.

¹² Kơnràñ tơnroh kai gơrmơ̆i ală cau lac lèo dê, Nàng tê bol khai ò rgơi tòmpìt geh cồng nha.

¹³ Kơnràñ kup cau jak chài tòm bơta lac lèo bol khai dê. Mơ pơndut mhar kai gơrmơ̆i cau blac chừt dê.

¹⁴ Bol khai tìp bơta klam jơngo tòm tŭ gùl ngai, mơ jòi tơbư tòm trồ gùl ngai kung be tòm trồ mang.

¹⁵ Kơnràñ dong tă cau siơ̆u siar bơh đào di bơr bol khai dê, Mơ klàs bơh di tê cau gơs gơnoar pràn.

¹⁶ Behơ̆ cau rƀah gơs bơta kơp kòñ, Mơ cau ò song ring mềm bơr wơl.

¹⁷ Lơngai cau lơi in geh Yàng Tom Trồ lah pơrhơng. Gen tàng bañ sền òsơp bơta lơh glài tơmàl Bơtau Gơnoar Dờng Làm Jơh dê,

¹⁸ Bơh Kơnràñ lơh sồt, mơya Kơnràñ pùt wơl, Kơnràñ lơh jê, mơya tê Kơnràñ sơmbòi.

¹⁹ Kơnràñ rơp dong tă ồng bơh prau bơta bòl glar; Tòm dơ̆ poh, bơta iơh rơp ò tup di ồng.

²⁰ Tòm bơta jơgloh rung, Kơnràñ rơp dong tơwài ồng bơh bơta chơt, Mơ tòm tŭ kơlìn Kơnràñ dong klàs ồng bơh gơnoar đào dê.

²¹ Ồng rơp geh pồn bơh bơta sơbơng roh lơmpiat dê, Kung rơp ò rngòt tòm tŭ bơta tơnroh tus.

²² Tòm tŭ bơta tơnroh mơ bơta jơgloh rung ồng rơp ñŏ, Kung ò rngòt di ală phan poan jơng tòm ù.

²³ Bơh ồng rơp gơs bơta ho bal mơ lŭ tòm ƀlàng sre; Mơ ală phan poan jơng tòm brê rơp gơtòmsòr bal mơ ồng.

²⁴ Ồng rơp git lah tòm sàl ồng dê geh bơta lơngap lơngai. Ồng rơp sền sơwì wơl phan poan jơng ồng dê mơ ò gŏ roh dô nơm lơi.

²⁵ Ồng rơp git lah kòn sau ồng dê rơp tơnggơs gal ngan, Mơ jơi bơtiàn ồng dê gơlik gơs oă ngan be ñhơt tòm ù.

²⁶ Ồng rơp rê tòm bơtô tòm tŭ să kra sơnam jòng, Kung be gar kòi tus hơ ƀlàng pơrjă kòi tòm kơnhai cau toès.

²⁷ Bol hi neh sền sơwì bơta hơ̆, gơ la di ngan, Iat mơ git tĕ să tòm ồng in.”