Sră Jop 42 - Sră Goh 2018Jop tơnliah să mơ geh lơngai wơl 1 Jop ho wơl mơ Yàng Jehôwa lah: 2 “Añ git lah Yàng rgơi lơh jơh ală bơta, Ò gơs cau lơi rgơi kơryan broă lơh Yàng dê. 3 Yàng neh lùp lah: ‘Cau do la ñcau, mơ neh pồn bơta kơlôi bơyai ò git wă dô êt lơi taih? Gen tàng, añ neh đơs ală bơta añ ò wă wơng, La ală bơta crih crài ngan añ in mơ añ ò git.’ 4 Yàng neh đơs lah: ‘Do iat tĕ, mơ Añ rơp đơs; Añ rơp lùp mê, mơ mê rơp ho wơl Añ in.’ 5 Añ neh kơno bơh Yàng bơh trồm tồr añ neh iat, Mơya tŭ do gar mat añ neh sền gŏ Yàng. 6 Gen tàng, añ ai lơh cù kìr bơh să tòm añ, Mơ gơjrañ sang glài tòm kơmbuh ù mơ bùh.” Ală cau bơyô Jop dê kong tơnliah să 7 Tơnơ̆ mơ tŭ Yàng Jehôwa neh đơs ală jơnau hơ̆ mơ Jop, gen Kơnràñ đơs mơ Eliphas, cau Theman lah: “Bơta gơjrañ Añ jê gơhào khuh di mê mơ di bàr nă cau bơyô mê dê; bơh bol mê ò đơs bơh Añ dô bă di pal kung be cau duh broă Añ jê la Jop neh đơs. 8 Gen tàng, tŭ do kup tĕ poh nơm kơnrồ dam mơ poh nơm belàt dam mơ lòt tus hơ Jop la cau duh broă Añ jê, mơ ơn tĕ phan ơn chu pơrguc să tòm mê in; mơ cau duh broă Añ jê la Jop rơp hòi dan bol mê in; mơ Añ rơp dòp jơnau hòi dan khai dê, mơ ò lơh bol mê in jat be bơta bơrngơl gơla bol mê dê, bơh bol mê ò đơs bơh Añ dô bă di pal kung be cau duh broă Añ jê la Jop neh đơs.” 9 Behơ̆, Eliphas cau Thema, Bildak cau Sua, Sôpha cau Naama lơh jat tòm toh be jơnau Yàng Jehôwa neh sồr bol khai; mơ Yàng Jehôwa dòp jơnau hòi dan Jop dê. 10 Mơ Yàng Jehôwa tơm wơl mơ ai Jop in geh bơta bơtoah bơtoài, tòm tŭ khai neh hòi dan ală cau bơyô khai in, mơ Yàng Jehôwa ai Jop in bàr dơ̆ oă rlau mơ ală phan khai neh gơs bơh lài. 11 Gen jơh ală oh mi ruh lŏ khai dê, mơ ală cau mòng git khai bơh lài lòt tus còp khai mơ sào bal mơ khai tòm hìu khai dê. Bol khai gơs dô bơta kơlôi sơnơng bal mơ pơndòm pơniang khai bơh ală bơta iơh mơ Yàng Jehôwa neh cèng tus hơđang khai; mơ kòp nă bol khai pà Jop in dô pet priă mơ dô nơm sơmbiat mơ màh. 12 Yàng Jehôwa ai lơngai khai in tòm ală ngai lồi dut rài kis Jop dê oă rlau mơ ală ngai sơnròp; mơ khai gơs jơt poan rbô belàt, prau rbô làkđa, dô rbô yô kơnrồ; mơ dô rbô alàng me. 13 Khai kung gơs poh nă kòn klau mơ pe nă kòn ùr. 14 Khai tơmoh sơnđan kòn ùr tơnhoa la Jemima; kòn dơ̆ bàr la Kesia, mơ kòn dơ̆ pe la Keren Hapuk. 15 Tòm làm jơh lơgar hơ̆, ò gơs dô nă cau ùr lơi hàng mơnĕ ndròm mơ ală kòn ùr Jop dê, mơ bèp bol khai dê ai bol khai in dô pơnah phan jơtài bal mơ ală lŏ klau bol khai dê. 16 Tơnơ̆ mơ ală bơta hơ̆, Jop gam kis dô rhiang poan jơt sơnam tai; khai gŏ ală kòn sau se set khai dê jơl tus di rài dơ̆ poan. 17 Behơ̆ Jop chơt, tòm tŭ neh kra mơ sơnam jòng. |
© 2018 United Bible Societies. All rights reserved.
Bible Society Vietnam