Sră Jop 40 - Sră Goh 2018

Yàng Tom Trồ bơto sồr Jop

¹ Gen bơh digùl càl rbut, Yàng Jehôwa đơs mơ Jop lah:

² “Kơt tĕ but mê dê kung be dô nă cau klau; Añ rơp lùp mê mơ mê rơp ho wơl Añ in!

³ Ngan mê rơp pơndang sang bơta cahrña song ring Añ jê ơ? Mê rơp lơh nền glài Añ nàng sơnđan să tòm mê la song ring ơ?

⁴ Mê gơs dô nơm tơwòr tê kung be Yàng Tom Trồ sơl? Mơ mê rgơi lơh ntơr kơnàs be Kơnràñ sơl?

⁵ Dilah gơs gen mê bơka tĕ să mê mơ bơta gơklŏ àng gơcrà. Tơnsoh tĕ mê in bơta jòng màng mơ ryŭ ryơm.

⁶ Tuh tơlik tĕ bơta gơhào gơjrañ dờng mê dê: Sền song dê kòp nă cau pơnhừ să mơ tơmù tĕ khai.

⁷ Sền song dê kòp nă cau pơnhừ să mơ tơnliah tĕ khai; Jă tơnlề tĕ cau iơh bơsak di tiah khai ơm.

⁸ Tơp tĕ bol khai tòm kơmbuh ù; Mơ bồr ndơp mat bol khai dê tòm ndơp ndơr.

⁹ Tŭ hơ̆, Añ rơp jòng ro mê Lah tê ma mê cèng bơta pha lin mê in.

¹⁰ Ne, sền tĕ Behemot Mơ Añ neh crơng gơs bal mơ mê; Gơ sa ñhơt kung be kơnrồ.

¹¹ Bơta pràn kơldang ò git nđò gơ dê ơm di but gơ, Gơnoar pràn ò git lơh gơ dê ơm tòm ală pet poac di kơndul gơ dê.

¹² Tiang gơ rtơs kung be tòm chi nho rề; Ară bơnô gơ dê tàñ tòmklĕ bal.

¹³ Ală ntìng gơ dê kung be ală ding mơ kòng, Ală jơng gơ dê kung be jrong lòs.

¹⁴ Gơ la phan sơnròp geh crơng gơs Yàng Tom Trồ dê; Mìng Bơtau crơng gơs gơ sồng rgơi tus tơnchơt gơ,

¹⁵ Ală mơnơm tơnggơs phan sa gơ in; La tiah jơh ală jơi phan poan jơng tòm brê kơnhơl rềp bal.

¹⁶ Gơ bic hơđơm trau dà. Pồn să tòm proh mơ tòm bŏ.

¹⁷ Trau dà jơm gơtòm tiah mƀur gơ dê; Mơ ală ntê chi nrài dà di gah croh jơm gùt dar gơ.

¹⁸ Tòm tŭ dà hiòng guh dờng ngan, gơ ò kơlôi rngòt dô êt lơi; Bulah dà hiòng Jordan gơhòr song di bơr gơ, gơ kung ơm kơ̆ nền.

¹⁹ Gơs cau lơi rgơi ngui kai kwĕ mơ lòs mơ kup gơ, Hala pơt dă mơ geh gơ mơ cuh muh gơ sơl?

²⁰ Mê rgơi ngui sề kơndàr nàng kup geh Lebiathan. Mơ ngui che nàng kơt lơmpiat gơ sơl?

²¹ Mê rgơi ngui dô dang che nàng sring muh gơ, Hala ngui dô nơm kai kwĕ mơ lòs nàng cuh bluh kang gơ sơl?

²² Gơ rơp kư̆ dan mê nđàc sơngit di gơ, Mơ gơ rơp ai ală jơnau niam lơnhơn nàng đơs mơ mê sơl?

²³ Gơ rơp bơtào bơta ho bal mơ mê, Lòi mê kup gơlơh gơs dĭ jơl jơh rài kis gơ dê sơl?

²⁴ Mê rơp ròng gơtòm hìu kung be dô nơm sềm, Hala ngui che kơt gơ mơ ai ală kòn ùr dềt mê dê kơnhơl mơ gơ sơl?

²⁵ Ală cau kă bro rơp blơi gơ sơl? Bol khai rơp tòmpà poac gơ bal mơ gơp sơl?

²⁶ Mê rgơi ngui ală gai lòs gơs sề sơmplàñ nàng srơp bluh làm gơltau gơ dê, Hala ngui mơng srơp ka mơ srơp bluh bồ gơ dê sơl?

²⁷ Dilah mê ƀư tê hơđang gơ, Mê rơp kah bơta sơbơng roh hơ̆, Mơ ò gơs tŭ lơi mê lơh behơ̆ tai!

²⁸ Bơta kơp kòñ at bồ gơ la roh lơm; Mìng gŏ gơ gen cau kung neh rơm să rngòt rau.