Sră Jop 39 - Sră Goh 2018

Bơta ndơp ndơr tòm dunnia ală phan kis wañ

^1-2 Mê rgơi mòc phan sa klìu triă in sơl? Mơ lơh klìu triă kòn in rài bơta gơdan sa sơl? Tòm tŭ gơ pơndêt să tòm ală wàng gơ dê hala kơp mòc tòm tiah ơm pồn gơ dê?

³ Ñcau neh ai phan sa kơnđà in taih? Tòm tŭ ală kòn kơnđà hòi tus hơ Yàng Tom Trồ? Mơ par nrah nring bơh siơ̆u phan sa?”

⁴ “Mê rgơi git tŭ lơi be brê deh kòn sơl? Mê neh sền sơwì jùn me tòm tŭ deh kòn sơl?

⁵ Mê neh kòp khà ală kơnhai gơ bun sơl? Mê git tŭ lơi gơ deh sơl?

⁶ Gơ pồn să mơ deh kòn dềt gơ dê, mơ neh dong tă kòn dềt gơ dê.

⁷ Ală kòn dềt bol gơ dê gơlik pràn mơ brồ dờng tòm ƀlàng; bol gơlik lòt mơ ò rê wơl.

⁸ Ñcau lòi alàng brê in lòt khat gơboh? Ñcau hồ che kơt gơ in taih?

⁹ Añ neh ai gơ in dơr brê lơh gơs hìu, Mơ ù tiah boh lơh gơs tiah ơm gơ in sơl?

¹⁰ Gơ ñŏ tơnhial di bơta nggồr nggàc tòm ƀòn dờng; Gơ ò gŏ kơno jơnau driau dờng cau at rơndeh dê.

¹¹ Gơ lòt làm kơh mơnơm be ƀlàng ñhơt gơ dê, Gơ jòi sa jơh ală phan tơlir.

¹² Gơs tŭ lơi be brê kòñ duh broă mê in sơl? Gơ rơp ơm jơh mang di gah bòng ñhơt mê dê sơl?

¹³ Mê rgơi kơt gơ mơ che di ngal nàng lơòr sơl? Gơ rơp sơkam tòm thòng jat mê ơ?

¹⁴ Mê rơp gơrê mơ gơ tài bơh bơta pràn kơldang gơ dê la dờng, mơ mê rơp jào broă lơh kơnjơ̆ mê dê gơ in sơl?

¹⁵ Mê gơs bơta dòn di gơ lah gơ rơp rê wơl, mơ cèng kòi mê dê tus di làn jă kòi sơl?

¹⁶ Sềm làkđa tàp pơnđar hòn chò; bulah pơnđar gơ ò gơs sơnò.

¹⁷ Bơh gơ sang lòi tap tòm ù, mơ tơnkrơm gơtòm ù.

¹⁸ Ò kơlôi lah gơs jơng cau jă trơm hơđang gơ, mơ gơs phan poan jơng ƀà rơp jă tơnlề ală tap hơ̆.

¹⁹ Gơlơh iơh mơ kòn dềt gơ dê, gơlơh be ò di kòn tòm gơ, Gơ ò kơlôi lah bơta bòl glar gơ tap rơp gơlik ò kwơ, bulah gơ ò gơs rngòt.

²⁰ Bơh Yàng Tom Trồ neh lơh gơ in hŭi bơta jak chài, mơ ò tòmpà gơ in bơta git wă.

²¹ Tòm tŭ gơlì pơnđar par jơnhoa ngan ntoat dô be par, Gen gơ ñŏ tơnhial di ơseh mơ cau hào ơseh.

²² Mê neh ai pràn ơseh in, Mơ mê neh tơnsoh ngko gơ mơ sơnò jòng sơl?

²³ Mê neh lơh gơ in sơnđoh kung be srah nting, Sap ơheh ryŭ gơ dê lơh rngòt rngơt.

²⁴ Nđias jơng gơ jàñ bơsak, tơngguh bơta pràn kơldang; Gơ brồ tus tòm tiah tòmlơh.

²⁵ Gơ ñŏ tơnhial di bơta tơrngòt, mơ ò gơdô nùs; gơ ò ruc wơl bơh di đào;

²⁶ Ding kam nggồr di wĕ gơ, tà mơ đào àng gơcrà.

²⁷ Tòm bơta gơhào gơjrañ gơ sa loan ù, Gơ ò rgơi ơm ntào tòm tŭ ntas kơlwòk.

²⁸ Tòm tŭ kơlwòk ntas, gơ nggà driau: ‘Ha! Ha!’ Gơ ƀô bơta tòmlơh bơh tiah ngài, Jơnau driau sồr ală cau kwang at bồ ling bal mơ jơnau driau nggà.

²⁹ Hơ̆ la bơh bơta jak chài mê dê klàng koat iar pò pơnđar Mơ lì pơnđar par hơ đah đơm sơl?

³⁰ Hơ̆ la bơh gơnoar sồr mê dê klàng bung par guh hơđang, mơ lơh rsòn gơtòm tiah jơnhoa sơl?

³¹ Gơ ơm hơđang pơnai lŭ mơ lơh hìu gơ dê; tòm tiah kơ̆ cê tòm cìr pơnai lŭ dê.

³² Bơh tềng hơ̆ gơ lòt jòi phan sa, Mat gơ sền gŏ bơh tiah ngài.

³³ (30) Ală kòn dềt gơ jồp mhàm, Mơ tiah lơi gơs ƀồc chơt gen gơ gơs tềng hơ̆.”

Jơnau ho wơl sơnròp Jop dê

³⁴ Yàng Jehôwa đơs tai mơ Jop lah:

³⁵ “Cau jak jòi jơnau khin tòmbơyai mơ Bơtau Gơnap Gơnoar Làm Jơh ơ? Cau lơi yă wơn Yàng Tom Trồ ho wơl tĕ mơ Kơnràñ!”

³⁶ Gen Jop ho wơl mơ Yàng Jehôwa lah:

³⁷ “Añ la dô nă cau dềt rhền, mbe añ rgơi ho wơl mơ Kơnràñ taih? Añ ai tê lềt bơr añ.

³⁸ Añ neh đơs dô dơ̆, añ ò rgơi đơs wơl; Añ neh đơs bàr dơ̆, añ ò khin đơs jơnau lơi tai.”