Sră Jop 36 - Sră Goh 2018

Elihu jòng ro bơta kòñ gơboh kơ̆ dơn Yàng Tom Trồ dê

¹ Elihu đơs pơnjat tai lah:

² “Dan ơt ơl mơ añ dô êt, gen añ rơp sơnio ồng in bơh añ gam gơs dô êt jơnau nàng đơs ala Yàng Tom Trồ.

³ Añ rơp cèng bơta git wă añ jê bơh tiah ngài; mơ ràng tơlik bơta song ring mơ Bơtau Crơng Gơs añ jê.

⁴ Bơh ngan, ală jơnau đơs añ jê la ò ma blac; Dô Bơtau wil tơl tòm bơta git wă ơm mơ ồng.

⁵ Ngan la Yàng Tom Trồ gơs gơnap gơnoar pràn mơ ò sền òsơp di cau lơi; Kơnràñ la gơnap gơnoar tòm bơta pràn kơldang bơta git wă dê.

⁶ Kơnràñ ò prap gàr bơta kis cau iơh bơsak in, Mơya Kơnràñ ai cau kong rồn bơklơn jê sồt bòl glar in bơta song ring bol khai dê.

⁷ Kơnràñ ò pleh mat Kơnràñ dê bơh di cau song ring; Mơya Kơnràñ ơn ală cau bơtau hơđang sơbàn, Kơnràñ bơtào bol khai gam sùm sùm, mơ bol khai geh yò tơngguh.

⁸ Mơ dilah bol khai neh kong cap mơ che sreng, Mơ kong kơt rềt mơ che bơta jê sồt bòl glar,

⁹ Gen Kơnràñ yal loh bol khai in broă bol khai dê, Mơ bơta tìs glài iơh bơsak bol khai dê, bơh bơta pơnhừ să.

¹⁰ Kơnràñ pò tồr bol khai dê nàng iat jơnau bơto sồr, Mơ gơnoar sồr kơp kòñ bol khai rê wơl bơh bơta tồi glài iơh bơsak.

¹¹ Dilah bol khai iat mơ duh broă Kơnràñ, Gen bol khai dòp wil tơl bơta pas gơs lơngai lơngò tòm jơh rài kis bol khai dê, Mơ ală nam bol khai dê geh niam nùs.

¹² Mơya dilah bol khai ò bài iat gen bol khai rơp kong tơnroh mơ đào, Mơ chơt ò gơs bơta git wă.

¹³ Cau ò dòn duh tòm nùs prap lòi bơta gơjrañ mañ; bol khai kung ò dan dong kòl tòm tŭ Kơnràñ cap bol khai.

¹⁴ Bol khai chơt tòm tŭ gam pơnu, Rài kis bol khai dê lồi dut tòm bơta ƀàssìl.

¹⁵ Kơnràñ dong tă ală cau kong bòl glar jê sồt bơh di ală bơta bòl glar jê sồt bol khai dê, Kơnràñ pò tồr bol khai bơh bơta sò tơm.

¹⁶ Kơnràñ kung pơndòm ồng lik bơh di bơta rung rài, tơmut ồng di tiah ơnàng, tềng hơ̆ ò gam bơta kup kơryan, mơ hơđang cơnòng sa ồng dê bềng phan sa dơngi.

¹⁷ Mơya ồng gơs bềng jơnau cau iơh bơsak dê; Bơta cahrña mơ bơta song ring gơrwàng ồng.

¹⁸ Kơrhia tĕ bañ lòi bơta gơjrañ ơniai ồng gơtơmut tòm bơta dơñŏ tơnhial, mơ bañ lòi phan loă dờng ngan pơrlac ồng dô đah.

¹⁹ Bơta ñìm rac ồng dê rgơi prap ồng bơh bơta bòl glar sơl ơ? Hala jơh ală bơta pràn ồng dê sơl ơ?

²⁰ Bañ kơp kòñ trồ mang, tòm tŭ cau kòl hwài tơlik bơh di tiah ơm bol khai dê.

²¹ Kơrhia tĕ bañ wèt hơ bơta tồi glài iơh bơsak, tài bơh, bơta hơ̆ neh gơlòng ồng bơh bơta jê sồt bòl glar.

²² Sền ne, Yàng Tom Trồ geh yò tơngguh tòm gơnap gơnoar Kơnràñ dê, Ñcau la cau gơnoar bơto be Kơnràñ taih?

²³ Ñcau neh bơto sơnio Kơnràñ in git gùng dà Kơnràñ dê taih? Mơ ñcau rgơi đơs lah: ‘Yàng neh lơh tìs’ taih?

²⁴ Kah tĕ jòng ro ală broă Kơnràñ dê, Mơ bơh bơta hơ̆ kòn mơnus neh đơs chò.

²⁵ Jơh ală làng bol neh sền di bơta hơ̆, Jơh kòp nă cau kơp sền di gơ bơh tiah ngài.

²⁶ Ngan, Yàng Tom Trồ la dờng, mơ bol he ò git Kơnràñ! Khà nam Kơnràñ dê ò rgơi jòi bàn.

²⁷ Kơnràñ tơrgòm ală tơioh dà hơđang trồ; mơ kơnềng ală dà tŭ lơh gơlik mìu,

²⁸ Ală mhwal tơnhòr dà mìu, Mơ mìu bềng lìu hơđang kòn mơnus.

²⁹ Ñcau rgơi git wă mbe Kơnràñ lă ală mhwal, ntơr Kơnràñ dê nggồr bơh tiah ơm Kơnràñ dê taih?

³⁰ Sền tĕ mbe Kơnràñ rsìh puhlèp Kơnràñ dê gùt dar Kơnràñ, Mơ jơm ndơp ryas dàlềng dê.

³¹ Bơh hơ̆ Kơnràñ at bồ ală làng bol, Mơ Kơnràñ ai pà lìu làc phan sa.

³² Kơnràñ jơm tê Kơnràñ dê mơ puhlèp, Mơ gơnoar sồr gơ sreh di di tơnggu.

³³ Ntơr kơnàs Kơnràñ dê yal tơnggit bơh Kơnràñ, Kơnràñ kong ơt ơl mơ bơta gơjrañ dờng tòmdră mơ bơta tồi glài iơh bơsak.”