Sră Jop 34 - Sră Goh 2018

Elihu yal loh bơta song ring Yàng Tom Trồ dê

¹ Mơ Elihu pơnjat tai lah:

² “Ơ ală cau jak chài, iat tĕ jơnau añ; Ơ ală cau git wă, ai tồr ơm iat tĕ añ.

³ Bơh trồm tồr lòng ală jơnau đơs, Kung be bơta git bơkah liap phan sa.

⁴ Bol he sac rwah tĕ bơta lơi la di, dòp nền tĕ digùl bol he bơta lơi la niam.

⁵ Jop đơs lah: ‘Añ ò gơs glài, Mơ Yàng Tom Trồ neh tă tơlik bơta song ring añ jê.

⁶ Tòm bơta gơhào nùs bulah añ song ring, añ gơkòl kòp be dô nă cau đơs blac; tềl sồt añ jê ò rgơi sơmbòi, bulah añ ò tìs glài.’

⁷ Gơs cau lơi tòm toh be Jop sơl? Khai hùc jơnau bơtat bơtròh be hùc dà.

⁸ Khai mut tòm mpồl bal mơ ală cau lơh bơta iơh, Mơ lòt bal mơ ală cau iơh bơsak.

⁹ Bơh khai đơs lah: ‘Ò kwơ dô êt lơi tòm tŭ cau hòn chò tòm Yàng Tom Trồ.’

¹⁰ Gen tàng, iat tĕ añ ơ ală cau gơs bơta git wă, Yàng Tom Trồ ò gơs tŭ lơi lơh bơta iơh, Bơtau Gơnap Gơnoar Làm Jơh ò gơs tŭ lơi lơh tìs,

¹¹ bơh jat ală broă bol khai neh lơh gen Kơnràñ rơp tơm wơl bol khai in, mơ jat be gùng dà bol khai dê, gen Kơnràñ rơp lơh behơ̆ hơđang bol khai.

¹² Tòm bơta song ngan, la Yàng Tom Trồ rơp ò gơs tŭ lơi lơh bơta iơh, Hala Bơtau Gơnap Gơnoar Làm Jơh ò lơh rkwet rkwe bơta song ring.

¹³ Ñcau neh pồ bơtào Kơnràñ at bồ hơđang plai ù, mơ ñcau neh bơtào Kơnràñ at bồ jơh lơgar dunnia taih?

¹⁴ Dilah Kơnràñ tă hwềng Kơnràñ dê rê wơl hơ Kơnràñ, Mơ Kơnràñ tơrgòm rê wơl nhơm tă Kơnràñ dê,

¹⁵ Gen jơh ală poac să rơp kòl roh rui bal mơ gơp, mơ jơh ală kòn mơnus rê wơl hơ kơmbuh ù.

¹⁶ Dilah ồng gơs bơta git wă, iat tĕ bơta do; Ơm iat tĕ jơnau añ đơs.

¹⁷ Cau gơjrañ di bơta song ring di pal at bồ sơl? Ồng rơp lơh nền glài Bơtau song ring mơ gơnoar pràn ơ?

¹⁸ Ò di Kơnràñ la Bơtau đơs mơ ală cau bơtau lah: ‘Bol mê la cau ò kwơ.’ Mơ đơs mơ ală cau kòn bơtau lah: ‘Bol mê la cau iơh bơsak.’

¹⁹ Hơ̆ ò di Kơnràñ la Bơtau ò sền òsơp dê ală cau màng ryŭ, Ò sền cau pas gơs dờng màng rlau mơ cau rƀah, Bơh bol khai jơh tơl nă la broă lơh tê Kơnràñ dê ò ơ?

²⁰ Tòm dô êt jŏ, gen bol khai chơt; Tòm gùl mơnang làng bol rơm să rngòt mơ roh thit, mơ ală cau gơnoar pràn kong cèng pơrdô thit, ò di bơh tê kòn mơnus.

²¹ Bơh mat Kơnràñ sền sơwì ală gùng dà kòn mơnus dê, mơ Kơnràñ sền gŏ kòp cơnđòa bol khai dê.

²² Ò gơs tiah jơngo, hala klam cik lơi tềng hơ̆ ală cau lơh iơh rgơi pồn să bol khai dê.

²³ Yàng Tom Trồ ò bơtào gơs dô tŭ tơngai cau lơi in nàng tus di đap Kơnràñ tòm bơta cahrña.

²⁴ Kơnràñ tơnroh cau gơnoar pràn ò càng lùp sơwì, mơ pồ bơtào cau ndai tòm tiah bol khai dê.

²⁵ Bơh Kơnràñ git ală broă lơh bol khai dê, Kơnràñ tuh tơlup bol khai tòm trồ mang, mơ bol khai kong tơnlề jơh.

²⁶ Kơnràñ lơh glài bol khai bơh bơta iơh bơsak bol khai dê, tòm tŭ ală cau ndai ơm sền di bol khai;

²⁷ Tài bơh bol khai wèt ò lòt jat Kơnràñ, Mơ sền di ală gùng dà Kơnràñ dê.

²⁸ Tài bơh hơ̆ bol khai lơh gơs jơnau ñìm rac cau rƀah dê gơguh tus hơ Kơnràñ, mơ Kơnràñ kơno jơnau ñìm rac cau jê sồt bòl glar dê.

²⁹ Mơya dilah Kơnràñ ơm mŏ mŏ, ñcau rgơi lơh nền glài Kơnràñ taih? Dilah Kơnràñ pồn mat, ñcau rgơi gŏ Kơnràñ taih? Bulah dô nơm làng bol hala dô nă is cau dê,

³⁰ Gen tàng cau ò dòn duh ò di pal at bồ, hala ală cau pơt dă làng bol.

³¹ Dilah gơs cau lơi đơs mơ Yàng Tom Trồ lah: ‘Añ neh kong bơta lơh glài; añ rơp ò lơh tìs tai.

³² Dan bơto añ bơta lơi añ ò gŏ, dilah añ neh lơh bơta tìs glài iơh bơsak, añ rơp ò lơh behơ̆ tai.’

³³ Gen Kơnràñ rơp tơm wơl jat be jơnau ồng đơs, tài bơh ồng neh sang lòi gơ ơ? Bơh ồng pal sac rwah, ò di añ; gen tàng yal tơlik tĕ bơta lơi ồng git.

³⁴ Ală cau git wă rơp đơs mơ añ, mơ cau jak chài la cau iat añ rơp đơs:

³⁵ ‘Jop đơs mơ ò gơs bơta git wă, jơnau đơs khai dê ò gơs bơta git jak.’

³⁶ Kơp kòñ Jop rơp kong bơta gơlòng tus di lồi dut, tài bơh jơnau ho wơl khai dê be cau iơh bơsak!

³⁷ Bơh khai bơtơl bơta tòmdră di tồi glài khai dê, Khai tàp tê khai dê digùl bol hi, mơ sơlo bơtơl ală jơnau khai tòmdră mơ Yàng Tom Trồ.”