Sră Jop 30 - Sră Goh 2018

¹ “Mơya tŭ do, ală cau kơnòm să rlau mơ añ dơñŏ tơnhial di añ, Ồng pàng bol khai la ală cau añ sền òsơp, ơn bal mơ ală so ê mpồl belàt añ jê.

² Ñchi gơs kwơ añ in bơh bơta pràn tê bol khai dê taih? Jơh ală bơta pràn kơldang bol khai dê neh roh jơh.

³ Làm bă tiah siơ̆u siar mơ jơgloh dờng, bol khai sa kơnjah ù ro tòm tiah sang lòi ngềt ngơt.

⁴ Bol khai jòi pic nha tòm ală rlau chi, lơh ram să bol khai mơ ryas chi pơrnơs.

⁵ Bol khai kong bơtrơh tơlik bơh mpồl ƀòn lơgar, Cau driau dờng bơtrơh bol khai kung be la cau ntung kơñau.

⁶ Bol khai pal ơm tòm ală croh dà, Tòm trồm ù mơ tòm ală pơnai lŭ.

⁷ Bol khai nggà driau digùl ală rlau chi. Bic sơlồng sơlàng bal hơđơm ală rlau lò.

⁸ Bol khai la kòn sau cau bơrngơl gơla, lơh roh sơnđan màng ryŭ, bol khai kong ting bơtrơh bơh di ù.

⁹ Mơ tŭ do bol khai dơñŏ tơnhial di añ tòm bơta đơs crih; Añ la jơnau pơnđik bol khai dê.

¹⁰ Bol khai cù kìr di añ, pleh ngài bơh añ, Ò rngòt rngơt choh di mat añ.

¹¹ Tài bơh Yàng Tom Trồ neh tă che àtak añ mơ tơmù liah añ. Gen bol khai ò ki ngàm di añ tòm tŭ tìp mat añ.

¹² Tòm đah ma añ mpồl cau sơlồng sơlàng guh tòmdră; bol khai sồr añ bic tòm ù, Mơ bơtào ală gùng nàng tơnroh añ.

¹³ Bol khai sòr tơrlah gùng lòt añ jê, bol khai tơngguh bơta rung rài añ jê; Ò gơs dô nă cau lơi tơnruc bol khai.

¹⁴ Bol khai tus bơh dô nơm trồm bluh dờng, bol khai pơrlac tus digùl tiah tơrlah tơrling.

¹⁵ Ală bơta rngòt rngơt wèt wơl hơđang añ, Bơta dờng màng añ jê gơ dô roh be càl, Bơta pas gơs lơngai lơngò añ jê roh thit be dô puk mhwal.

¹⁶ Mơ tŭ do hwềng nùs añ jê gơhòr lik tòm añ; Ală ngai jê sồt bòl glar neh sơmbat kup añ.

¹⁷ Trồ mang lơh pơnjê ală ntìng añ, Bơta jê sồt sa tơrging añ sùm ò dơh.

¹⁸ Bơta pràn kơldang Kơnràñ dê gơrwàng kup ào jrùh añ: sơmbat kup añ di ngko ào añ jê.

¹⁹ Kơnràñ sơrbì añ tòm bŏ, Mơ añ gơlik gơs be thul mơ bùh.

²⁰ Añ hòi dan mơ Yàng, Yàng ò ho wơl añ; Añ ntào, mơ Yàng mìng sền di añ.

²¹ Yàng gơlik gơs rhung rhang gơwèt mơ añ, Ai tê gơnoar pràn Yàng dê brồ lơh añ.

²² Yàng yò añ hơđang càl, mơ añ hào hơđang càl, Yàng sơrbì añ tòm càl rbut nggồr ung.

²³ Añ git lah Yàng rơp cèng añ hơ bơta chơt, mơ tus hơ hìu neh lơh nền jơh ală cau kis in.

²⁴ Ngan ò gơs cau lơi pơrlơ̆ dră mơ cau siơ̆u siar, Tòm tŭ ơm tòm bơta rung rài bol khai hòi dan bơta dong kòl.

²⁵ Ò di la añ neh ñìm rac bơh cau kong bòl glar ơ? Hwềng soàn añ ò di neh moat jrùng bơh cau rƀah ò ơ?

²⁶ Mơya tòm tŭ añ kơp gơn bơta niam, gen bơta iơh neh tus; mơ tòm tŭ añ kơp gơn bơta àng, gen bơta klam jơngo neh tus.

²⁷ Bơta dơrcul tòm añ ò tŭ lơi dơh; Ală ngai bòl glar jê sồt kư̆ tus tìp añ.

²⁸ Añ lòt tòm bơta jơngo ò gơs mattơngai; Añ ñă ntào digùl mpồl jơnum mơ dan bơta dong kòl.

²⁹ Añ neh gơlik gơs dô nă oh mi mơ so brê. Mơ dô mpồl mơ sềm làkđa dê.

³⁰ Gơltau añ gơlik jù mơ gơklò, mơ ntìng añ duh be ồs sa.

³¹ Kơñi pĕ añ jê gơlik gơs ntas rac ròc, Mơ tơliă añ jê gơlik sap moat jrùng.”