Sră Jop 28 - Sră Goh 2018Ntềng đah jòi bàn bơta jak chài taih? 1 “Ngan gơs dô bă tiah tòm mơnơm cau tò ai priă, mơ gơs dô bă tiah nàng lơh goh màh. 2 Lòs tă bơh tòm ù, mơ kòng gơlik bơh pơnai lŭ lòs neh gơm lề. 3 Cau tò tòm mơnơm mut tus dô bă tiah lồi dut bơta klam jơngo dê; mơ jòi tus di nhàr ngài rlau jơh, pơnai lŭ lòs tòm tiah jrô klam jơngo cik. 4 Bol khai tò tòm thòng ngài bơh tiah ơm kòn mơnus dê, ală cau lòt gùng neh hŭi tiah hơ̆; Bol khai gơyồng yàt ngài bơh tiah cau ơm. 5 Kung be bơh plai ù, gơlik piang lă bơh gơ, mơya tòm hơđơm ù gơsơlơ̆u bơh ồs. 6 Ală pơnai lŭ gơ dê la tiah gơlik ală lŭ màng tơlir, mơ kơmbuh gơ dê gơs màh. 7 Gùng hơ̆ ò gơs sềm kơp mòc lơi git, mơ mat klàng bung kung òhềt sền gŏ gơ. 8 Ală phan poan jơng tòm brê jòng să òhềt cơnđòa lòt hơđang gơ, klìu triă òhềt lòt gan gơ. 9 Tê bol khai ơn tus di lŭ tơrneh, Mơ lơh sơlơ̆u ală mơnơm bơh di ryas dê. 10 Cau phàt trồm tòm ală pơnai lŭ, mơ mat bol khai gŏ jơh ală phan màng. 11 Bol khai bơt ală tồ dà ală hiòng dê; ală phan pồn ndơp bol khai cèng tơlik hơ bơta àng. 12 Mơya ntềng đah jòi bàn bơta jak chài taih? Mơ ntềng đah la tiah ơm bơta git wă dê taih? 13 Kòn mơnus ò git gùng dà lòt tus hơ gơ; mơ gơ ò jòi bàn tòm ù tiah cau kis dê. 14 Brong jrô đơs lah: ‘Gơ ò ơm tòm añ,’ Mơ dàlềng đơs lah: ‘Gơ ò ơm mơ añ.’ 15 Gơ ò rgơi blơi mơ màh, mơ bơta kas màng gơ dê ò rgơi kơr mơ priă. 16 Bơta kas màng gơ dê ò rgơi pơndròm mơ màh Ôphir, Mơ tòm lŭ kĕ màng pơrhê hala mơ lŭ màng rmit. 17 Màh hala lŭ krơh ò rgơi ndròm mơ gơ, kung ò rgơi tòmgơl mơ ală lŭ kràng màng mơ màh ngan dê. 18 Ò kòp ală phan geh lơh bơh bơkào lŭ tòm dàlềng mơ lŭ krơh àng loh; Bơta kas màng bơta jak chài di la rlau mơ ală lŭ màng. 19 Lŭ màng rmit Ethiôpi dê ò rgơi pơndròm mơ gơ; kung ò rgơi ơn bơta kas màng gơ mơ màh goh. 20 Gen bơh ntềng đah bơta jak chài neh tus taih? Mơ ntềng đah la tiah ơm bơta git wă dê taih? 21 Gơ ơm pồn ndơp bơh ală mat jơh ală jơi gơs bơta kis, Mơ pồn bơh di ală jơi sềm tòm pah gòi. 22 Brah tìng mơ bơta chơt đơs lah: ‘Bol hi neh kơno jơnau pơnro bơh gơ.’ 23 Yàng Tom Trồ git loh gùng lòt tus hơ gơ, Mìng dô nă Kơnràñ git tiah ơm gơ dê. 24 Bơh Kơnràñ sền gŏ tus di tiah lồi plai ù dê, Mơ gŏ jơh ală phan hơđơm ală tap trồ. 25 Tòm tŭ Kơnràñ ai càl in gơnoar pràn, Mơ tòmcah ală pơnah dà mơ phan was sơnoa, 26 Tòm tŭ Kơnràñ lơh dô bơta lơh nền mìu in, mơ dô nơm gùng lòt ntơr kơnàs in. 27 Gen Kơnràñ neh gŏ bơta jak chài, mơ ràng tơlik gơ; Kơnràñ bơtào kơ̆ gơ mơ jòi geh gơ. 28 Gen Kơnràñ đơs mơ kòn mơnus lah: ‘Duh rngòt di Yàng Jehôwa, hơ̆ la bơta jak chài, mơ pleh ngài bơh bơta iơh, hơ̆ la bơta git wă.’” |
© 2018 United Bible Societies. All rights reserved.
Bible Society Vietnam