Sră Jop 27 - Sră Goh 2018

Jop lơh nền lah khai ò tìs glài

¹ Jop pơnjat tai yal tơlik jơnau đơs khai dê lah:

² “Ngan be Yàng Tom Trồ gam kis sùm, la Bơtau tă bơta song ring añ jê, mơ la Bơtau Gơnap Gơnoar Làm Jơh neh lơh hwềng soàn añ in kong sràt bơtang,

³ Nđò jŏ nhơm tă gam tòm añ, Mơ hwềng Yàng Tom Trồ dê gam tòm trồm muh añ,

⁴ Gen sơndồi añ rơp ò đơs jơnau tìs, mơ lơmpiat añ rơp ò đơs jơnau blac pơrlồm.

⁵ Añ rơp ò tŭ lơi dòp oh mi la di! Jơl tus di tŭ añ chơt, añ rơp ò sang lòi nùs dòn song añ jê bơh di añ.

⁶ Añ rơp sơmbat kơ̆ bơta song ring añ jê, mơ ò lòi gơ in lòt; nùs añ rơp ò lah pơrhơng añ tòm ală ngai rài kis añ.

⁷ Dan ală cau sò tơm di añ rơp kung be cau iơh bơsak, Mơ ală cau tòmdră mơ añ rơp be cau ò song ring.

⁸ Ñchi cau ò dòn duh gơn kơnòm tòm tŭ Yàng Tom Trồ tơnroh bol khai, tòm tŭ Yàng Tom Trồ tă bơta kis bol khai dê taih?

⁹ Yàng Tom Trồ rơp iat jơnau bol khai hòi dan tòm tŭ tus bơta bòl glar hơđang bol khai sơl?

¹⁰ Bol khai rơp jòi geh bơta hòn chò tòm Bơtau Gơnap Gơnoar Làm Jơh sơl? Bol khai rơp hòi dan mơ Yàng Tom Trồ sùm sùm sơl ơ?

¹¹ Añ rơp bơto ală oh mi in bơh gơnap gơnoar Yàng Tom Trồ dê, Añ rơp ò pồn ală gùng dà Bơtau Gơnap Gơnoar Làm Jơh dê.

¹² Să tòm ală oh mi neh gŏ bơta hơ̆, Gen ñchi bơh tài jơh ală oh mi dô bă bal gơlik ò kwơ taih?

¹³ Do la pơnah ală cau iơh bơsak dòp bơh di Yàng Tom Trồ, La phan jơtài cau rồn bơklơn cau ndai rơp dòp leng bơh Bơtau Gơnap Gơnoar Làm Jơh:

¹⁴ Dilah kòn sau bol khai geh bơtơl oă, hơ̆ la lòi đào in; mơ jơi bơtiàn bol khai dê ò geh tơl phan sa.

¹⁵ Kòp jê pluh plàng rơp tơp ală cau gam kis bol khai dê, Mơ ală cau ùr bơnrau bol khai dê rơp ò ñìm rac bơh bol khai.

¹⁶ Bulah bol khai tơrgòm jền priă be thul ơmul, Mơ ồi ào be ală gơnru ù kơnàng.

¹⁷ Phan lơi khai neh prap lòi gen cau song ring rơp soh gơ, Mơ ală cau ò gơs glài rơp tòmpà priă bol khai dê.

¹⁸ Bol khai bơt hìu bol khai dê be ală rsòn sềm, Kung be tum cau kơp gàr suơn ño neh lơh.

¹⁹ Bol khai bic tòm bơta pas sơm, mơya rơp ò geh behơ̆ tai; bol khai pò mat bol khai dê gen jơh ală phan ò gam tai.

²⁰ Bơta rngòt rngơt cèng pơrdô bol khai be dà kŏ; Dô ròs càl rwac khồm pơrdô thit bol khai tòm trồ mang.

²¹ Càl đah mattơngai lik yò tơngguh bol khai mơ khai roh thit; Gơ pơs tơlik bol khai bơh di tiah ơm bol khai dê.

²² Gơkhồm druh di bol khai, ò nđàc sơngit; Bol khai ntoat dô jơh pràn bơh di gơnap gơnoar gơ dê.

²³ Gơ tap tê sền òsơp; Mơ hwac di bol khai bơh di tiah ơm gơ dê.”