Sră Jop 26 - Sră Goh 2018

Jop đơs lah bơta ryŭ ryơm Yàng Tom Trồ dê bol he ò rgơi git wă

¹ Gen Jop ho wơl lah:

² “Nđò ồng neh dong kòl cau ò gơs gơnoar pràn! Nđò ồng neh dong kòl tê cau ò pràn!

³ Nđò ồng neh bơto sồr cau ò gơs bơta jak chài taih? Mơ neh ai tơnggit oă bơta bơyai niam!

⁴ Ñcau neh dong ồng đơs ală jơnau do taih? Mơ hwềng lơi neh lik bơh di ồng taih?

⁵ Cau neh chơt ơm rơm să tòm tiah hơđơm, Ală dà mơ jơh ală phan ơm tềng hơ̆.

⁶ Lơgar làng ƀồc ơm kuh di đap Yàng Tom Trồ, Mơ lơgar brah tìng ò gơs phan jơm gòm.

⁷ Kơnràñ dă ală tap trồ đah đang tòm pah gòi: Kơnràñ yồng plai ù hơđang ò gơs phan lơi.

⁸ Kơnràñ klơm ală dà tòm ală mhwal Kơnràñ dê, Mơya ală mhwal ò sèt bluh bơh gơ.

⁹ Kơnràñ cang ndơp mat kơnhai àng dar, Mơ dă mhwal Kơnràñ dê hơđang gơ.

¹⁰ Kơnràñ treh gùng jơng trồ hơđang nha dà, Lơh gơs nhàr digùl bơta àng mơ bơta jơngo.

¹¹ Ală jrong ală tap trồ dê gơlơnggơr. Mơ mơp dơl bơh jơnau lah pơrhơng Kơnràñ dê.

¹² Kơnràñ ai gơnap gơnoar Kơnràñ dê lơh ring drik dàlềng, Bơh bơta jak chài Kơnràñ dê Kơnràñ tơnchơt Rahap.

¹³ Bơh càl Kơnràñ dê ală tap trồ gơlik hàng mơnĕ; Tê Kơnràñ srơp bluh bơs ntoat dô.

¹⁴ Ngan, hơ̆ mìng la đah bơdìh ală broă lơh Kơnràñ dê: bol he mìng kơno đơs chều dô êt bơh Kơnràñ lơm! Mơya ntơr gơnap gơnoar Kơnràñ dê ñcau rgơi git wă taih?”