Sră Jop 21 - Sră Goh 2018

Jop đơs lah ală cau iơh bơsak òs klàs bơh bơta lơh glài

¹ Gen Jop ho lah:

² “Dan iat tĕ nền nền ală jơnau đơs añ jê; mơ lòi bơta hơ̆ lơh gơs bơta pơndòm pơniang oh mi dê.

³ Kong ơt tĕ bal mơ añ, gen añ rơp đơs, gen tơnơ̆ mơ tŭ añ neh đơs rau, dơñŏ tơnhial tĕ.

⁴ Ai añ, jơnau yoam añ jê gơwèt mơ kòn mơnus sơl ơ? Ñchi bơh tài añ pal ò kong ơt taih?

⁵ Sền tĕ añ mơ ai lơh nrơt nrơl; mơ ai tê nàng lềt bơr oh mi dê.

⁶ Tòm tŭ añ kơlôi sơnơng bơh bơta hơ̆ gen añ rngòt rngơt, bìr bồ mơ rơm să añ.

⁷ Ñchi bơh tài cau iơh bơsak kis jŏ, tus di să kra mơ sơlo gơbơtơl gơnoar taih?

⁸ Kòn sau bol khai dê geh bơt bơtào di đap bol khai, Mơ jơi bơtiàn bol khai dê ơm di đap mat bol khai.

⁹ Hìu nhă bol khai dê geh lơngap lơngai, ò rngòt di bơta lơi, mơ gai Yàng Tom Trồ dê ò dùh hơđang bol khai.

¹⁰ Kơnrồ dam bol khai dê tơnggơs ò tŭ lơi roh, Kơnrồ me bol khai dê ò tŭ lơi rlơs.

¹¹ Bol khai sồr ală cau kòn dềt bol khai dê lik lòt be dô mpồl belàt, Ală kòn dềt bol khai dê tòmya gùt dar.

¹² Bol khai đơs chò jat sơnggơr dềt mơ pĕ kơñi che, mơ hòn chò jat sap rkèl tơliă.

¹³ Bol khai kis tòm ală ngai bol khai dê tòm bơta pas gơs, Mơ bol khai mù tòm lơgar làng ƀồc tòm bơta ring lơngai.

¹⁴ Bol khai đơs mơ Yàng Tom Trồ lah: ‘Lòi tĕ dò bol hi, bol hi ò kòñ git ală gùng dà Kơnràñ dê.

¹⁵ Ñcau la Bơtau Gơnap Gơnoar Làm Jơh mơ bol hi pal duh broă taih? Ñchi bol hi dòp geh dilah bol hi hòi dan mơ Kơnràñ taih?’

¹⁶ Ò di bơta pas gơs bol khai dê la cồng nha tòm bol khai dê ò ơ? Kai gơrmơ̆i cau iơh bơsak dê cù kìr bơh añ.

¹⁷ Mbe ồs đèng cau iơh bơsak dê gơkòl đơp chơt? Mbe bơta rung rài gơtơntus hơđang bol khai taih? Mbe Yàng Tom Trồ tòmpà bơta jê sồt tòm bơta gơjrañ Kơnràñ dê ơ?

¹⁸ Mbe bol khai gơlơh kung be rhe di đap càl? Hala kung be nsiap gơkòl càl rbut cèng pơrdô taih?

¹⁹ Gơs jơnau đơs lah: ‘Yàng Tom Trồ prap lòi bơta tồi glài bol khai dê hơđang kòn sau bol khai.’ Dan Kơnràñ tơm wơl bol khai in, nàng khai rgơi git bơta hơ̆!

²⁰ Lòi mat tòm bol khai dê sền gŏ bơta roh rui bol khai, mơ lòi khai hùc bơta gơjrañ dờng Bơtau Gơnap Gơnoar Làm Jơh dê.

²¹ Bơh ñchi bơta bol khai ơn nùs bơh hìu nhă bol khai lòi wơl taih? Tòm tŭ khà ală ngai bol khai dê neh jơh taih?

²² Gơs cau lơi rơp bơto bơta git wă Yàng Tom Trồ dê, nàng sền Kơnràñ cahrña ală cau tòm tiah jơnhoa taih?

²³ Cau do chơt tòm bơta pas gơs bềng lìu, Geh ring lơngai mơ ơm lơngai lơngò,

²⁴ but khai geh bềng dà toh, mơ khu tòm ală ntìng khai dê bềng lìu.

²⁵ Cau ndai chơt tòm bơta sràt bơtang hwềng soàn dê, Òhềt tŭ lơi geh liap bơta lơi niam.

²⁶ Bol khai ơm bic ndròm bal tòm kơmbuh ù, mơ tu rhài jơm gòm bol khai.

²⁷ Do, añ git ală bơta kơlôi sơnơng oh mi dê, mơ kai gơrmơ̆i mơ oh mi kòñ lơh iơh di añ.

²⁸ Bơh oh mi đơs lah: ‘Ntềng đah hìu cau kwang at bồ taih? Ntềng đah sàl cau iơh bơsak neh ơm taih?’

²⁹ Oh mi ò tŭ lơi lùp cau lòt gùng ơ? Oh mi ò tŭ lơi dòp jơnau lơh cơng bol khai dê ơ?

³⁰ Hơ̆ la cau iơh bơsak neh prap lòi tòm ngai rung rài, Mơ khai geh dong tă tòm ngai gơjrañ dờng?

³¹ Ñcau yal loh gùng dà bol khai dê di đap mat bol khai? Ñcau tơm wơl bơh bơta khai neh lơh taih?

³² Tòm tŭ bol khai kòl cèng tus hơ bơtô ƀồc, Mơ cau kơp gàr bơtô ƀồc bol khai dê.

³³ Ù tiah tòm thòng la bơkah lơngồt bol khai in; Jơh ală cau rơp lòt jat bơh tơnơ̆, Mơ ală cau lòt lài khai la ò jai kòp.

³⁴ Behơ̆, mbe oh mi kòñ pơndòm pơniang añ mơ ală jơnau ò kwơ taih? Ò gơs bơta lơi gam wơl tòm jơnau ho oh mi dê, mìng la jơnau ma blac.”